Dünya 12:44 09.03.2023

Çinin sülh planı müharibənin yayda bitməsinə hesablanıb - "Nikkei"

Çin Rusiyanın Ukraynaya qarşı müharibəsindəki qəfil "sülh planı”nı çinli hərbi ekspertlərin müharibənin 2023-cü ilin yayında bitəcəyi və Rusiyanın üstünlüyü olacağı proqnozu ilə əlaqələndirir.

Qaynarinfo xəbər verir ki, bu barədə "Nikkei.asia” nəşri yazır.

Nəşr hesab edir ki, Çinin gözlənilməz "sülh təklifi”nin arxasında çox güman ki, Çin hərbi ekspertlərinin müharibənin bu yay bitəcəyi ilə bağlı proqnozları dayanır.

Xüsusilə, bir neçə ay əvvəl Pekində aparıcı beyin mərkəzinin hesabatı dərc olunub. Nəşr Çinin mövqeyinin qəfil dəyişməsini bu hesabatla əlaqələndirir.

Hərbi elmlər akademiyası (AMS) birbaşa Xalq azadlıq ordusuna tabedir.

O, Çin ordusu üçün ən yüksək qərar qəbul edən orqan olan Kommunist Partiyasının Mərkəzi Hərbi Komissiyasına müntəzəm olaraq tövsiyələr və hesabatlar təqdim edir. Akademiyaya nazirlər kabineti səviyyəsində məmur rəhbərlik edir.

Dekabr ayında AMS Ukraynadakı münaqişənin simulyasiyasını tamamlayıb, Çin hökumətinə yaxın mənbələrə görə, bu, təəccüblü nəticəyə gətirib çıxarıb.

Simulyasiya nəticələrinə görə, müharibə təxminən 2023-cü ilin yayında başa çatacaq və Rusiya üstünlük əldə edəcək.

Hesabatda deyilir ki, həm Rusiya, həm də Ukrayna iqtisadiyyatları yayda müharibəni davam etdirmək üçün çox "yorğun” olacaqlar.

Ehtimal olunur ki, Moskvanın tərəfini tutan Çin rəhbərliyini razı salmaq üçün nəticələr Rusiyanın xeyrinə qiymətləndirilib.

AMS-in proqnozunu dinlədikdən sonra Pekin müharibənin ildönümü üçün sülh təklifi hazırlayıb. Avropa ilə münasibətlərin bərpası da daxil olmaqla, üç məqsədə nail olmaq niyyəti güdülür.

Pekin hesab edir ki, Avropa hələ də Çinə birbaşa sərmayə və texnologiya transferinə açıqdır və regionla münasibətlərin yaxşılaşması iqtisadiyyatın bərpasına gətirib çıxaracaq.

Bunu nəzərə alaraq, Çin hökumətində bir çoxları atəşkəs danışıqları başlamazdan əvvəl Pekini bu işə qoşulmağa çağırır.

İkinci məqsəd Ukrayna ilə dostluq münasibətlərini saxlamaqdır.

Qeyd olunur ki, hətta əksər Qərb ölkələri insan haqlarının pozulması ilə bağlı xəbərlərə görə Çinə hücum edəndə belə, Ukrayna bu mövzuda susub.

"Rusiya ilə birlikdə biz Ukraynanı itirməyi gözə ala bilmərik", - Çin hökumətindəki mənbə bildirib.

Sülh planına iqtisadiyyatın bərpası üçün müddəa daxildir ki, bu da Çinin artıq iqtisadi yardım göstərməyi nəzərdən keçirdiyini göstərir. Arzu edilən əsas məqsəd atəşkəsin əldə olunmasında Çinin aparıcı rol oynamasıdır.

Çin prezidenti Si Szinpin Rusiya prezidenti Vladimir Putinin Moskvaya dəvətini qəbul etməyi düşünür.

"Rusiyaya səfər nə çox erkən, nə də çox gec ola bilər”, - Çin diplomatiyasına bələd olan mənbə bildirib.

Çin üçün ən yaxşı senari Çin liderinin Putinə sülh planını təqdim etməsindən sonra Rusiya və Ukraynanın danışıqlara başlaması olardı.

Qeyd olunur ki, Çin uğurlu vasitəçi ola bilməsə, bunun nəticələri Si Szinpinin nüfuzunu sarsıdacaq.

Nizami Bağırov