Evin həbsxanasında nə baş verib? - İran xaosa sürüklənir (ŞƏRH)

Qaynarinfo xəbər verir ki, ilkin rəsmi açıqlamalarda hadisə zamanı 4 nəfərin öldüyü bildirilib. Lakin hökumətin nəzarətindən kənar mənbələr ölənlərin sayının bundan bir neçə dəfə çox olduğunu iddia edirlər. İran İnsan Haqları Təşkilatı BMT-ni hadisə ilə bağlı müstəqil araşdırma aparmağa çağırıb. Təşkilat iddia edib ki, İran hakimiyyəti həqiqəti gizlədir. Bundan sonra ölənlərin sayının 8-ə çatdığı açıqlanıb. İranın dövlət televiziyası isə əvvəlcə yanğın zamanı 40 nəfərin öldüyü barədə məlumat yayıb. Sonradan məlumat təkzib edilib. Yerli fəallar hesab edir ki, dövlət televiziyasının açıqladığı rəqəm həqiqətə yaxındır. 

Almaniyada mühacirət həyatı yaşayan iranlı hüquqşünas Nağı Mahmudinin sözlərinə görə, məlumatın təkzib edilməsi hökumətin təzyiqi nəticəsində baş verib. 

"Dövlət televiziyası belə səhvə yol verməz. Görünür, İrandakı rejim ölənlərin sayının çox olmasının Məhsa Əminin ölümü ilə bağlı aksiyaların daha da alovlanmasına rəvac verəcəyindən ehtiyatlanıb. Ona görə də 40 nəfərin ölümü barədə məlumat təkzib olunub”, deyə Nağı Mahmudi bildirib. 

Hüquqşünas həbsxananın qəsdən yandırılması barədə iddialara da toxunub. 

"Açığı hadisənin qəsdən törədlib-törədilmədiyi dəqiq bilinmir. Lakin o bəllidir ki, bir neçə gün əvvəl Evin həbsxanasında aksiya olub. Aksiyaya səbəb 4 siyasi məhbusun həbsxanadan köçürülməsidir. Aksiyanı siyasi məhbuslar başlayıb. Qeyri-siyasi məhbuslar da onlara dəstək verib. Bu fakt həbsxananın qəsdən yandırıla biləcəyi ehtimallarını artırır”, deyə iranlı mühacir vurğulayıb. 

İran rəsmiləri əvvəlcə həbsxanada yanğını orada keçirilən aksiyalarla əlaqələndiriblər. Lakin sonradan açıqlama verilib ki, yanğın geyim anbarında baş verib. Yanğın zamanı partlayış və atəş səslərinin eşidilməsi də həbsxananın qəsdən yandırıldığını iddia edənlər üçün əlavə arqumentə çevrilib.