İsmayıllıda generalın adı ilə 2500 manatlıq dələduzluq

Qaynarinfo-nun əldə etdiyi məlumata görə, İsmayılı rayon Kürdmaşı tam orta məktəbinin rus dili müəlliməsi Dilşad İsgəndərli qohumu İlqar Mustafayevi işə düzəltdirmək istəyirmiş. Bundan xəbər tutan həmkəndlisi Vüsal Ələkbərov Dilşad xanıma zəng vuraraq özünü Hərbi Hava Qüvvələrinin komandan müavini, general-mayor Zaur Rüstəmov kimi təqdim edib. Onun məhz Zaur Rüstəmovun adından istifadə etməsi generalın da əslən Kürdmaşı kəndindən olması ilə bağlıdır. Vüsal Ələkbərov da bundan yararlanaraq Dilşad İsgəndərlinin etibarını qazanıb və söhbət əsnasında ona hər bir işdə köməklik göstərə biləcəyini deyib. Qarşı tərəf isə öz növbəsində qohumu İlqar Mustafayevi işə düzəltmək istədiyini bildirib. Vüsal Ələkbərov həmin şəxsi Hərbi Hava Qüvvələrinə işə düzəldə biləcəyini söyləyib və bunun üçün Dilşad İsgəndərlidən 2500 manat pul istəyib. 

Vüsal Ələkbərov həmin məbləği şəxsi ehtiyaclarına xərclədikdən sonra yenidən Dilşad İsgəndərliyə zəng edərək əlavə 3000 manat lazım olduğunu bildirib. Lakin bu dəfə qarşı tərəf onunla danışan şəxsin Zaur Rüstəmov olmadığından şübhələnib və Vüsal Ələkbərovdan görüntülü zəng vurmağı tələb edib. Təbii ki, Vüsal görüntülü zəng vurmayıb. Bir neçə gün sonra isə Dilaşd İsgəndərli onunla danışanın Vüsal olduğunu öyrənib və bu barədə həmin şəxsin anasına xəbərdalıq edərək polisə üz tutacağını bildirib. 

Vüsal Ələkbərovun əməlləri bununla yekunlaşmayıb. O, başqa bir şəxsdən də 1500 manat alaraq qızına sosial pensiya düzəldəcəyini deyib. Lakin bu vədini yerinə yetirməyib. 

Polisə edilən müraciət əsasında saxlanılan Vüsal Ələkbərova Cinayət Məcəlləsinin 178.2.2-ci maddəsi ilə ittiham irəli sürülüb. Həmçinin barəsində məhkəmənin qərarı ilə polisin nəzarəti altına vermə qətimkan tədbiri seçilib. Cinayət işinin məhkəmə istintaqı İsmayıllı Rayon Məhkəməsində aparılıb. Vüsal Ələkbərov məhkəmə prosesi zamanı ona verilmiş ittihamla özünü təqsirli bilib. 

Məhkəmənin hökmü ilə ona 2 il 6 ay müddətinə azadlıqdan məhrum etmə cəzası təyin edilib. Vüsal Ələkbərovun şübhəli şəxs qismində saxlanıldığı 2 gün ona təyin edilmiş cəzadan çıxılıb və üzərində qəti olaraq 2 il 5 ay 28 gün müddətə azadlıqdan məhrum etmə cəzası saxlanılıb.