Ölkə 20:47 04.09.2022

Lerikdə pir ziyarətindən qayıdanlar qəzaya düşdü: 8 nəfər ölüb, 8 yaralı var (ADLAR/YENİLƏNİB)

Lerikdə qəzada ölənlərin tam siyahısı məlum olub.

Qaynarinfo-nun məlumatına görə ölənlərdən biri Göyşaban kənd sakini Xəlilova Dilarə İslam qızıdır.

Digər 7 nəfər isə Boladi kəndinin sakinləridir. Həmin şəxslərin adı aşağıdakılardır:

Həşimova Sərvər Əhməd qızı;

Axundova Saray İslam qızı;

Ağayeva Təcrübə Ağababa qızı;

Cəfərova Güldəstə Məmmədağa qızı;

Rzayeva Səmayə Ağababa qızı;

Rəhimova Nazxanım İsabala qızı;

Tahirova Zərnitac İslam qızı.

Xəstəxanadan verilən məlumata görə, hazırda 8 yaralıdan sürücü Səyyadov Səyyad Hacıbala oğlunun vəziyyəti stabilləşdiyindən paltaya köçürülüb.

Reanimasiyada olan 7 nəfərin vəziyyəti ağır olsa da stabilləşməyə doğru gedir.

17.43

Lerikdəki avtobus qəzasında ölənlərdən bəzilərinin kimliyi müəyyənləşib.

Qaynarinfo xəbər verir ki, hadisə zamanı Səyyadova Səyyad Hacıbala qızı (1959-cu il təvəllüdlü), Kərimova Nazilə Ağəli qızı (1958), Fərəcova Şərafət Ənvər qızı (1959), İbrahimova Əsbət Ağabala qızı (1952) və Qurbanova Gülər Məmmədağa qızı (1959) həlak olub.

17.36

Lerik rayonunun Günəşli kəndində baş verən qəza ilə bağlı TƏBİB-in tabeliyində fəaliyyət göstərən Lerik, Lənkəran və Masallı Rayon Mərkəzi Xəstəxanalarının təcili tibbi yardım briqadaları hadisə yerinə cəlb olunub.

TƏBİB-dən Qaynarinfo-ya verilən məlumata görə, qəza nəticəsində xəsarət alanlardan 3 nəfər Lerik Rayon Mərkəzi Xəstəxanasına, 5 nəfər isə Lənkəran Rayon Mərkəzi Xəstəxanasına yerləşdirilib.

Hazırda onlara tibbi yardım göstərilir.

Xəsarət alanların vəziyyəti ilə bağlı əlavə məlumat veriləcək.

17.04

Lerikdə baş verən qəzaya hərəkətdə olan "Ford" markalı mikroavtobusun əyləcinin işləməməsi səbəb olub.

Bu barədə Qaynarinfo-ya Lerik rayon İcra Hakimiyyəti başçısının müavini Habil Məlikov məlumat verib.

İcra başçısının müavini bildirib ki, ilkin məlumata görə, mikroavtobus bir qurup Lənkəran sakinini Lerikə pir ziyarətinə aparıb və hadisə ziyarətdən qayıdarkən baş verib.

"Ford" markalı mikroavtobusun sürücüsü Boladi kənd sakini olub. Lerikin Günəşli kəndində mikroavtobusun əyləcinin işləməməsi səbəbindən qəza baş verib. Ölənlərin hamısı qadındır. Yaralılardan ikisinin vəziyyəti ağır, dörd nəfərin vəziyyəti nisbətən ağırdır. Onlar xəstəxanaya yerləşdirilib. Məsələ ilə bağlı hüquq-mühafizə orqanları araşdırma aparır", Habil Məlikov deyib.

Lənkəran Mərkəzi Xəstəxanasından Qaynarinfo-ya verilən məlumata görə, 5 nəfər hadisə yerində, 3 nəfər isə xəstəxanada dünyasını dəyişib.