Ukrayna hərbçilərinin məzarları ilə sürətlə dolan Lvovdakı Lıçakov qəbiristanlığında savaşın gələcəyi və mümkün sülh şərtləri barədə bir-biri ilə ziddiyyət təşkil edən səslər eşidilir.

Qaynarinfo "Reuters”ə istinadla yazır ki, ABŞ administrasiyası ağrılı ərazi güzəştlərini tələb edə biləcək yeni nizamlanma planını irəlilədirkən, ön xəttdə həlak olanların ailələri müharibənin necə başa çatmalı olduğu ilə bağlı öz baxışlarını götür-qoy edirlər.

50 yaşlı Olya Kaçmarık, oğlu Aleksandrı itirmiş bir ana, qan tökülməsini dayandıracaq planı dəstəkləməyə hazır olduğunu deyir - hətta bu, ərazinin bir hissəsini itirmək demək olsa belə. "Onlar (ruslar) bu yolla nə qədər çox gedirlərsə, bir o qədər çox istəyirlər”, deyə o, rus qoşunlarının şərqdə yüzlərlə kilometr irəlilədiyi bir vaxtda Lvovda oğlunun məzarı yanında dayanaraq bildirir.

Aleksandr Lıçakov qəbiristanlığının yeni hərbi sahəsində dəfn edilən minlərlə ukraynalı hərbçidən biridir. Yerli hakimiyyət orqanlarının sözlərinə görə, boş yerlər demək olar ki, qalmayıb və yaxınlıqda artıq yeni məzar yerləri hazırlanır.

Mərasimlər hər gün davam edir

Mavi-sarı bayraqlar və qış küləyi arasında ailələr yeni həlak olanlarla vidalaşırlar. Növbəti dəfn mərasimi yeni bitmişdi ki, rəsmilər gələcək məzarlar üçün ərazini yoxlayırdı – ekskavatorların uğultusu yerin getdikcə azaldığını göstərirdi. İyunda həyat yoldaşını itirmiş Oksana Rımaruk deyir ki, uşaqların gələcəyi naminə danışıqları dəstəkləyir.

"Qoy elə etsinlər ki, övladlarımız azad torpaqda qaça bilsinlər – və öz ata-analarının məzarlarını sərbəst şəkildə ziyarət edə bilsinlər”, deyə 25 yaşlı qadın qucağında yaş yarımlıq uşağı, bildirir.

Onun sözlərinə görə, Lıçakivdəki itkilərin miqyası "həqiqətən təsiredicidir”.

Əksər ukraynalılar hələ də güzəştlərin əleyhinədir

Kiyevə kompromisə getməsi üçün edilən təzyiqlərə – xüsusilə də Tramp administrasiyasının irəli sürdüyü yeni plana – baxmayaraq, Ukrayna cəmiyyəti sərt mövqedə qalır: KMIS sorğusu göstərib ki, vətəndaşların cüzi çoxluğu ərazilərdən imtinanın əleyhinədir.

Prezident Volodimir Zelenski keçən həftə bəyan edib ki, ölkə müharibənin başlanğıcından bəri "ən çətin anını” yaşayır, lakin o, "Ukraynanın maraqlarını pis sazişə imza atmaqla satmayacaq”.

"Oğlum nə üçün öldü?”

41 yaşlı oğlu Maryanı itirmiş 68 yaşlı Antonina Rışko əlinə oğlunun şəklini alaraq qəti danışır.

"Ukrayna heç bir halda daha çox torpaq verməməlidir. O zaman oğlum nə üçün ölüb?”, deyə o bildirir.

O, təklif olunan sülh sazişini kəskin şəkildə rədd edir: "Qoy onu yenidən yazsınlar”.

Qeyd edək ki, ABŞ Prezidenti Donald Tramp Ukraynada sazişin Şükran Gününə qədər bağlanması barədə öz müddətindən geri çəkilib, baxmayaraq ki, hələ də özünü sülhyaradıcı kimi göstərmək istəyir.

CNN yazır ki, Zelenski pis sazişlə heç bir saziş olmaması arasında dəhşətli bir seçim qarşısında dayanıb.

Bundan əvvəl ABŞ dövlət katibi Marko Rubio Avropadakı müttəfiqlərinə bildirib ki, ABŞ Ukraynaya təhlükəsizlik zəmanətləri verməzdən əvvəl sülh sazişinin bağlanmasını istəyir. Eyni zamanda Ağ Ev bəyan edib ki, sülh sazişinə baxmayaraq, sənəddə təhlükəsizlik zəmanətləri göstəriləcək.

Həmçinin Tramp guya sülh sazişi imzalanmayınca Zelenskini Ağ Evə dəvət etməməyi qərara alıb.

Alpər