Milyonlarla insan üçün avtomobil almaq həyatboyu edəcəyi ən böyük sərmayələrdən biridir. Buna görə də yeni bir avtomobilin yalnız təhlükəsizlik standartlarını ödəməsi kifayət deyil: insanların sadiq qalmasını təmin etmək üçün ağıllı hazırlanmış marketinq strategiyası da lazımdır.

Həftəsonu yarış pistində sürət həvəsi və ya işə gedərkən axtarılan rahat səssizlik... Avtomobillər, dünyaya əks etdirdiyimiz imicimizin ən güclü hissəsidir və buna görə də hər zaman qəlbimizdə xüsusi yer tutur.

Rəqabətin nəfəs kəsdiyi avtomobil sektorunda markanın kimliyini əks etdirən loqolar yalnız bir simvol deyil: eyni zamanda dərin tarix və ruhun ifadəsidir.

Qaynarinfo xəbər verir ki, dünyanın ən ikonik klassik avtomobil loqolarını və onların arxasındakı təsirli hekayələri təqdim edir:

Dörd halqa: Audi

1930-cu illərdəki Böyük Depressiya Almaniyadakı istehsalçıları çətin vəziyyətə saldı. İqtisadi çətinlikdən çıxmaq istəyən Saksoniya Əyalət Bankı dörd böyük istehsalçının bir çətir altında birləşməsini təklif etdi. Bu birləşmənin tərkib hissələrindən biri 1899-cu ildə qurulan və qurucusunun soyadının latınca qarşılığı olan "Audi" şirkəti idi. Digər tərəfdaşlar isə buxar maşınları ilə tanınan DKW, velosipeddən avtomobilə keçən "Wanderer" və "Horch" oldu.

Bu dörd istehsalçı "Auto Union AG" adı altında birləşdikdə, bu gün hamının tanıdığı iç-içə keçmiş dörd halqa loqosu yarandı. Bu loqo dörd şirkətin sarsılmaz əməkdaşlığını simvolizə edir. "Audi" zamanla bu ortaq quruluşdan sağ çıxan yeganə marka olsa da, mirasına sadiq qalaraq halqaları istifadə etməyə davam edir.

Həvəs ruhu: Rolls-Royce

Lüks deyəndə ilk ağla gələn marka olan "Rolls-Royce" onilliklərdir zərifliyin təmsilçisidir. Markanın iki R hərfindən ibarət loqosu dünya miqyasında tanınsa da, əsl ikon fiqur kapotun üzərində yüksələn "Spirit of Ecstasy" heykəlciyidir. Mühəndis Henri Roys avtomobil sahiblərinin radiator qapaqlarına taxdığı kobud bəzəklərdən narahat olduqda, sənətçi Çarles Sakesdən rəsmi bir fiqur hazırlamasını istədi.

Sakes Yunan heykəlindən ilham alaraq "Rolls-Royce"un zərifliyini əks etdirən qadın fiquru yaratdı. 1911-ci ildə qeydiyyatdan keçən bu heykəlcik, qollarını arxaya açmış, küləkdə uçan paltarları ilə qanadlanmağa hazır bir qadını təsvir edir. Əvvəllər istəyə bağlı olan bu fiqur, 1939-cu ildən etibarən markanın əvəzolunmaz hissəsinə çevrildi.

Küllərindən doğan quş: Pontiac

1967-ci ildə "Pontiac Trans Am" Ford Mustanq ilə rəqabət üçün bazara çıxdıqda onu digər modellərdən fərqləndirəcək xüsusi bir görünüşə ehtiyac vardı. Dizayner Bill Porter, qanadlarını açmış meydan oxuyan bir yırtıcı quş amblemi hazırladı. Lakin baş ofis bu dizaynı əvvəlcə sərt şəkildə rədd etdi.

İllər sonra başqa bir dizayner bu emblemi qara bir avtomobilin üzərinə qızılı sarı rəngdə tətbiq edərək yenidən təqdim etdi. Bu dəfə qəbul edilən və "Screaming Chicken" ("Qışqıran Toyuq”) adlandırılan dev quş fiquru Trans Amin ən vəhşi və unudulmaz simvoluna çevrildi.

Corcetto imzası: BMW M

BMW artıq ikonik loqoya sahib idi, amma "M" seriyası avtomobilləri tam fərqli bir dünyanı təmsil edirdi. 1978-ci ildə M1 modeli ilə yollara çıxan bu performans seriyası üçün xüsusi vizual kimlik tələb olunurdu. İtalyan dizayn efsanəsi Corcetto Cucaro üç meylli xətt və bir "M" hərfindən ibarət məşhur dizaynı yaratdı.

Loqodakı rənglərin də öz mənası var: Mavi BMW markasını, qırmızı motor idmanını, bənövşəyi isə ikisi arasındakı əlaqəni simvollaşdırır. Bəzi söz-söhbətlər qırmızının keçmişdə "Texaco" sponsorluğundan gəldiyini iddia etsə də, "Giugiaro M" loqosu bu gün hələ də sürət və gücün universal simvolu hesab edilir.

Cizgi filmindən ilham: Plymouth

1968-ci ildə "Plymouth" gənc sürücülərə xitab etmək və "Pontiac GTO" ilə rəqabət aparmaq üçün bir ad axtarırdı. Məhsul planlama meneceri Jak Smit uşaqları ilə cizgi film izləyərkən ilham aldı: Rəqiblərini həmişə geridə qoyan "Road Runner".

"Warner Brothers" ilə uzun danışıqlardan sonra obrazın istifadəsi hüquqları alındı. "Plymouth Road Runner" öz kornası və loqosu ilə bazara çıxanda reklam kampaniyası tam olaraq bu sürətli obrazın xarakterinə əsaslandı. Bu strategiya o qədər uğurlu oldu ki, marka avtomobil dünyasında nadir rast gəlinən bir populyarlıq qazandı.

Qələbənin qanadları: Honda

"Honda" avtomobilləri bu gün adətən "H" loqosu ilə tanınsa da, qurucu Soiçiro Hondanın əsas ilham mənbəyi qələbə tanrıçası "Nike" idi. Soiçiro üçün bu qanad loqosu yalnız vizual deyil, həm də Yaponiyadan çıxaraq dünyaya açılma arzusunun sözüdür.

1947-ci ildə ilk dəfə motosikletin yanacaq çənində görünən qanad teması illər ərzində dəyişsə də, təsirini itirmədi. Bu qanadlar bu gün də "Honda" motosikletlərində davam edir.

Viskonti ilanı: Alfa Romeo

1910-cu ildə Milanda qurulan "Alfa Romeo" şəhərin zəngin tarixini loqosuna daşıdı. Dizayner Romano Cattaneo Milanın soylu Viskonti ailəsinin armasında yer alan və bir insanı yutan ilan fiqurunu (Biscione) istifadə etdi. Loqonun digər yarısında isə ağ fonda qırmızı xaç orta əsr cəngavərlərinin simvoludur.

Loqo illər keçdikcə sadələşsə də, ilan və xaç fiquru markanın Milan köklərinə sadiqliyini simvollaşdırmağa davam edir.

Vəhşi pişiyin dönüşü: Jaguar

"Jaguar"ın hekayəsi əslində bir az məcburiyyətdən doğub. Markanın orijinal adı "Swallow Sidecar" yəni qısaca "SS Motors" idi. Lakin II Dünya müharibəsindən sonra "SS" qısaltması qaranlıq keçmişi xatırlatdığı üçün qurucu Ulyam Lyons adı "Jaguar" olaraq dəyişdirdi.

Markanın gücünü və çevikliyini simvolizə edən məşhur "tullanan jaguar" heykəli (The Leaper) də bu dəyişimin bir hissəsi olaraq avtomobil dünyasında yerini aldı.

Hesablı sürətin simvolu: Dodge Super Bee

"Plymouth"un "Road Runner" ilə qazandığı uğuru görən "Dodge" oxşar strategiya ilə "Super Bee" modelini təqdim etdi. "Warner Brothers"a müəllif haqqı ödəmək istəməyən "Dodge" öz maskotunu yaratdı: Kaska bürünmüş, hırslı və sürətli bir arı. Bu loqo həm münasib qiymətli performans avtomobilini simvollaşdırır, həm də markanın o dövrdəki əyləncəli marketinq üslubunu əks etdirirdi.

Ştutqartın şahlanan atı: Porsche

Zərif və nəcib görünüşü ilə tanınan "Porsche" armasının hekayəsi markanın qurulmasından bir neçə il sonra başladı. İlk "Porsche" modellərində hər hansı bir loqo yox idi. Amerikalı idxalçının təzyiqi ilə Ferdinand Porsşe markanın kimliyini əks etdirəcək bir simvol yaratmağa qərar verdi. Loqoda yer alan şahlanan at, markanın mənşəyi olan Ştutqart şəhərinin at yetişdirmə mərkəzi köklərini təmsil edir. Ətrafındakı buynuzlar və qırmızı-qara zolaqlar isə regionun ənənəvi rənglərini simvollaşdırır.

Aydın