Son illərdə Böyük Britaniya Rusiyanın gözündə əsas "xalq düşməninə” çevrilib. Londonu Rusiyadakı aerodromlara pilotsuz uçuş aparatları ilə zərbələr planlaşdırmaqda, "Şimal axını” kəmərini partlatmaqda və Rusiyanın ərazisinə "terrorçu” reydlərə rəhbərlik etməkdə ittiham ediblər.

Qaynarinfo xəbər verir ki, bunu "The Guardian" yazıb.

Nəşrin yazdığına görə, Moskvanın Donald Tramp administrasiyası ilə münasibətləri bərpa etməyə çalışdığı bir vaxtda Böyük Britaniya ABŞ-a məxsus olmuş rolu – Kremlə əsas rəqib və onun təbliğat müharibəsində ən rahat hədəf rolunu öz üzərinə götürüb.

"Rusiya özünü Amerika Birləşmiş Ştatlarına bərabər hesab edir. İndi onlar Trampı birbaşa tənqid edə bilmirlər, bəs öz faciələrinə – Ukraynada itkilərə, milyonlarla qurbana görə kimi günahlandırsınlar? Ən yaxındakını – britaniyalıları. Britaniyanın Rusiyanın bütün problemlərinin kökü olduğunu təsəvvür etmək onlar üçün asandır”, deyə Britaniyanın Moskvadakı keçmiş hərbi attaşesi Con Forman bildirib.

Tarixi rəqabət yeni mərhələyə keçir

"The Guardian" qeyd edir ki, Rusiya ilə Böyük Britaniya arasındakı rəqabət XIX əsrə, imperiya dövründə iki dövlətin Mərkəzi Asiyadakı nüfuz uğrunda mübarizəsinə gedib çıxır.

Soyuq müharibə dövründə də qarşılıqlı rəqabət və casusluq heç vaxt dayanmasa da, Kremlin təsəvvüründə Böyük Britaniya ABŞ-la əsas qarşıdurma fonunda ikinci dərəcəli təhlükə kimi qəbul olunurdu.

Lakin Ukraynaya qarşı genişmiqyaslı hücum münasibətləri yeni minimuma endirib. Nəşr yazır:

"Böyük Britaniyanın büdcəsi və imkanları ABŞ-dan xeyli kiçik olsa da, britaniyalılar Ukraynaya hərbi yardım və kəşfiyyat məlumatları sahəsində riskə getməyə və sərhədləri genişləndirməyə çox vaxt amerikalı həmkarlarından daha hazır olublar”.

"Britaniyalılar ilk gündən bir addım öndə idilər”, deyə Ukrayna kəşfiyyatındakı mənbə bildirib.

"Ruslar Avropanı sevmirlər, britaniyalılara isə nifrət edirlər”

London Kral Kollecinin müdafiə araşdırmaları üzrə professoru Maykl Klark deyib ki, Rusiya rəhbərliyi indi sanki hər bir sui-qəsdin arxasında Londonun dayandığını iddia etməklə Böyük Britaniyaya tərs kompliment verir.

"Mənim ruslarla söhbətlərimdən aldığım təsəvvür budur: onlar Avropanı sevmirlər, amma britaniyalılara həqiqətən nifrət edirlər”, deyə Moskvadakı yüksək vəzifəli bir Avropa diplomatı bildirib.

Oslo Sülh Araşdırmaları İnstitutunun tədqiqat professoru Pavlo Baev ehtimal edir ki, bu, Ukraynaya hərbi dəstəyin Britaniya ictimaiyyəti və bütün siyasi qüvvələr tərəfindən geniş şəkildə dəstəklənməsi ilə bağlı ola bilər. Digər Avropa ölkələrində isə bu məsələ daha çox mübahisə doğurur.

"Nəticədə, Moskva Avropanın yenidən silahlanması planlarını pozmaq üçün potensial vasitə kimi Almaniya və Fransaya daha çox diqqət ayırır”, deyə Pavlo Baev qeyd edib.

Aydın