Estoniya hökuməti Kremlin Baltikyanı regiondakı uzaq bir monastır vasitəsilə Avropaya qarşı aparılan hibrid müharibə çərçivəsində rus təbliğatını yaymaq üçün rahibələrdən istifadə etdiyini bildirir.

Qaynarinfo xəbər verir ki, bu barədə "The Telegraph" nəşri məlumat yayıb.

Söhbət ölkənin şərqində yerləşən və rəsmi olaraq dünyəvi işlərdən uzaq olduğunu bəyan edən Pühtitsa monastırından gedir. Lakin hökumət oranın Qərbdə guya din azadlığının təhlükə altında olduğu ilə bağlı Kreml təbliğatını yaydığını iddia edir.

Məlumata görə, Rusiya Pravoslav Kilsəsinə (RPK) tabe olan rahibələr Estoniya hakimiyyəti ilə gərgin münasibətlərdədir. Səbəb isə yeni qanundur. Bu qanun dini qurumların Moskvadakı patriarx Kirill ilə əlaqələrini kəsməsini tələb edir. Kirill isə Rusiya-Ukrayna müharibəsinin açıq tərəfdarı kimi tanınır. Lakin monastır bu tələbi rədd edir və kilsənin "geosiyasi məsələlərdə neytral” qalmaq hüququna malik olduğunu bildirir.

Estoniyanın Daxili İşlər Nazirliyi isə bu "neytrallığı” qəbul etmir və monastırı Rusiyanın informasiya müharibəsinin bir hissəsi adlandırır. Nazirlik bildirir ki, bu kampaniyada məqsəd Qərbi günahlandırmaq və guya günahsız pravoslav rahibələrin təzyiqə məruz qaldığı görüntüsünü yaratmaqdır.

Estoniya hökumətinin nümayəndəsi Martin Tulit bildirib ki, monastır sadəcə dini bir qurum deyil, Rusiya dövlətinin və Moskva patriarxlığının təşviq etdiyi "Rus dünyası" ideologiyasının simvoludur. Bu ideologiya isə din, millətçilik və imperiya nostaljisini birləşdirir.

Tulitin sözlərinə görə, monastırın baş rahibəsi Filareta Kalaçova 2011-ci ildə şəxsən patriarx Kirill tərəfindən təyin olunub və bu səbəbdən onun Estoniyanın tarixini Rusiyanın baxışı ilə təqdim etməsi təəccüblü deyil.

Rusiya ilə sərhəddə yerləşən və onu mövcudluğuna təhdid kimi qəbul edən Estoniya Ukraynaya tam dəstək versə də, eyni zamanda ölkədə təxminən 300 min rusdilli sakin yaşayır. Bu isə Estoniyanın daxili siyasətində balans axtarışını çətinləşdirir.

Monastırın baş rahibəsi Filareta isə hər hansı siyasi fəaliyyəti inkar edir. Onun sözlərinə görə, rahibələr sadəcə dua və əmək yolu ilə Allaha xidmət etmək istəyirlər: "Biz dünyadan uzaqlaşaraq Allaha qulluq etmək üçün buradayıq".

Moskva patriarxlığının müharibəyə dəstəyinə və Ukrayna şəhərlərinə hücumlardan əvvəl silahların dualarla təqdis edilməsinə münasibət bildirən Filareta deyib ki, onlar patriarxın bəyanatlarına görə məsuliyyət daşımırlar.

"İstənilən müharibə faciədir. Orada təkcə hərbçilər deyil, uşaqlar, qadınlar, yaşlı insanlar da ölür. Güllələr və qranatlar qarşısındakının uşaq, yoxsa əsgər olduğunu ayırd etmir. Bizdən yeganə istədiyimiz şey, monastır nizamına uyğun yaşamağımıza icazə verilməsidir. Əgər biz rahibələr dünyəvi mühitə qarışsaq, rahibə olaraq qalmarıq", deyə o, vurğulayıb.

Monastırın niyə Konstantinopol patriarxlığına tabe olmayacağı sualına cavab verən Filareta bildirib ki, bu, kilsə qanunvericiliyinə zidd olar. Estoniya qanununun əsas tələbi isə Rusiya Pravoslav Kilsəsi ilə kanonik əlaqələrin tam kəsilməsidir.

Sözügedən qanun dini təşkilatlara Estoniyanın müstəqilliyinə, ərazi bütövlüyünə və konstitusiya quruluşuna qarşı zorakı dəyişikliyi dəstəkləyən və ya maliyyələşdirən qruplarla əlaqə saxlamasını qadağan edir.

Moskva patriarxlığı isə Ukrayna müharibəsini dəstəklədiyinə görə bu tərifə uyğun gəlir. Qanunun ilkin variantına Estoniya Prezidenti Alar Karis veto qoymuşdu, çünki onu çox geniş şərh edilə bilən sənəd hesab edirdi. Lakin yenilənmiş redaksiyası parlamentdə qəbul edilib – 68 lehinə, 17 əleyhinə səslə.

Filareta bildirib ki, monastır yeni qanunun tələblərinə tabe olmağı düşünmür. Bu isə o deməkdir ki, monastır xüsusi hüquqi statusdan məhrum ediləcək və hüquqi şəxs kimi fəaliyyət göstərə bilməyəcək. Bununla belə, dini icma olaraq mövcudluğunu davam etdirə biləcək – sadəcə hüquqi imtiyazlar olmadan.

Monastırın hüquqi nümayəndəsi bu qərarı "təhqiredici və əsassız" adlandırıb: "Rahibələrin Estoniyanın milli təhlükəsizliyinə təhdid yaratdığını iddia etmək gülməlidir. Bu monastır 130 ildən çoxdur fəaliyyət göstərir, nasist işğalını və sovet repressiyalarını da görüb. Hakimiyyətin bəyanatları yalandır və Estoniyada vicdan və din azadlığını təhlükə altına qoyur".

Aydın