Dünya 13:56 05.12.2023

Rusiya və Çin hakerləri Britaniyanın ən təhlükəli nüvə obyektinə hücum edib - KİV

Rusiya və Çinlə əlaqəsi olan haker qrupları Böyük Britaniyanın ən təhlükəli nüvə obyekti olan Sellafildə hücum edib. 

Qaynarinfo xəbər verir ki, bu barədə "The Guardian” nəşri məlumat yayıb.

Obyekt 70 il əvvəl İrlandiya dənizi sahilində tikilib. Soyuq müharibə dövründə orda nüvə silahı üçün plutonium istehsal olunub, həmçinin, İtaliya və İsveç də daxil olmaqla digər ölkələrdən radioaktiv tullantılar qəbul edib. Sellafild planetin ən böyük plutonium anbarı və böyük nüvə tullantıları poliqonuna çevrilib. Orada həmçinin başqa bir ölkənin Böyük Britaniyaya hücumu və ya fəlakət halına aid planlar yerləşir. Obyektdə 11 mindən çox insan çalışır.

Araşdırmaçıların yazdığına görə, səlahiyyətlilər kompleksin sistemlərinin dəqiq nə vaxt sındırıldığını bilmir. "The Guardian”ın mənbələri ilk pozuntuların hələ 2015-ci ildə aşkar edildiyini söyləyirlər. Mütəxəssislər Sellafildin kompüter şəbəkələrində "yatmış” zərərli proqramları məhz o zaman aşkar ediblər. "The Guardian” yazır ki, zərərli proqramın məhv edilib-edilmədiyi də aydın deyil.

"Bu, Sellafildin radioaktiv tullantıların daşınması, təhlükəli material sızmasının monitorinqi və yanğınların yoxlanılması kimi bəzi ən həssas fəaliyyətlərinin risk altında olduğunu ifadə edə bilər", deyə məqalədə qeyd edilir.

"The Guardian”ın həmsöhbətləri ehtimal edirlər ki, xarici hakerlər obyektin ən məxfi materiallarına giriş əldə edə bilərdilər. Sellafildin bir neçə il ərzində tənzimləyicilərə hücum barədə məlumat verməməsi səbəbindən məlumat itkisinin dərəcəsini və sistemlər üçün riski qiymətləndirmək çətindir. Nüvə üzrə tənzimləyici İdarəsindən (ONR) və təhlükəsizlik sektoru mənbələri nəşrə bildiriblər ki, Sellafild davamlı kibertəhlükəsizlik pozuntularına görə 2022-ci ildə "xüsusi tədbirlər” statusuna keçirilib. Bəzi əməkdaşlar məsuliyyətə cəlb edilə bilər.

Nəşrin məlumatına görə, obyektin rəhbərliyi hücum faktını və onun mümkün nəticələrini gizlədib. Materialın dərcindən sonra Sellafild bildirib ki, obyektin şəbəkələrinə jurnalistlərin təsvir etdiyi şəkildə dövlət agentləri tərəfindən hücumu qeydə alınmayıb. Mətbuat xidməti həmçinin bildirib ki, sistemdə heç bir zərərli proqram olmadığını "yüksək dərəcədə inamla təsdiq edə bilərlər”.

Nizami Bağırov