Yeni məhdudiyyətlərlə bağlı açıqlamalar ABŞ-ın yaxınlarda "Rosneft”, "Lukoil” və onların törəmə strukturlarına qarşı sanksiya tətbiq etməsinin fonunda səslənib. Bu, artıq Çin dövlət şirkətlərini Rusiya neftinin alışından imtina etməyə məcbur edib. Rusiya neftinin ikinci ən böyük alıcısı olan Hindistan isə dekabr ayı üçün heç bir sifariş verməyib.

Neft təzyiqinin eskalasiyası

Berlində yaşayan enerji analitiki Tomas O'Donnell Newsweek-ə bildirib ki, ABŞ-ın addımları və Ukraynanın Rusiya neft emalı zavodlarına uğurlu hücumları "Rusiyanı neft dövləti kimi zərərsizləşdirə bilər”. Onun qiymətləndirməsinə görə, əlavə sanksiyalar və infrastruktura zərbələr Rusiya enerji gəlirlərinin çökməsi üçün "güclü multiplikator” olacaq.

O'Donnell qeyd edib ki, Rusiya faktiki olaraq iki böyük alıcı ilə – Çin və Hindistanla – məhdudlaşıb və indi ikinci dərəcəli sanksiyalardan qorxduqları üçün alternativ müştərilər tapması demək olar ki, mümkünsüzdür.

Tramp nə planlaşdırır?

Tramp açıqlayıb ki, qanunvericilər sanksiya siyahısına İranı da əlavə edə bilərlər. Medianın məlumatına görə, söhbət uzun müddətdir senator respublikaçı Lindsi Qrem tərəfindən lobbiləşdirilən və Rusiya enerji daşıyıcılarını alan ölkələrdən idxala 500%-ə qədər tariflər nəzərdə tuta bilən qanun layihəsindən gedir.

Belə məhdudiyyətlər ilk növbədə Rusiya neftinin əsas bazarları olan Çin və Hindistana yönələcək.

Rusiyanın enerji obyektləri zərbə altında

Son aylarda Ukrayna pilotsuz aparatları mütəmadi şəkildə Rusiya neft emalı zavodlarına və limanlarına hücum edir. Təkcə Qara dənizdə Novorossiysk və Tuapse terminalları ciddi ziyan görüb ki, bu da dünya neft tədarükünün təxminən 2%-nə təsir göstərib.

Ekspertlər hesab edirlər ki, Qara dəniz obyektlərinə Baltik dənizi obyektləri də əlavə edilə bilər – bu halda Rusiya ixrac infrastrukturunun itkiləri sanksiyaların təsirini ciddi şəkildə gücləndirəcək.

Tramp bunu nə üçün edir?

Analitiklər düşünürlər ki, sanksiyaların sərtləşdirilməsi Trampın Putini daha yumşaq şərtlərlə danışıqlar masasına oturtmaq cəhdinin bir hissəsidir. Kremlin gəlirlərinə zərbə Rusiyanın yüksək müdafiə xərclərini – ölkənin hərbi maşınının əsas dayağını – mümkünsüz edə bilər.

"The Commercialiser” şirkətindən Aleks Adamo bildirib ki, Tramp həmçinin Aİ-ni də analoji barışmaz mövqe tutmağa və Rusiya enerji resurslarının idxalını kəskin azaltmağa razı salmağa cəhd göstərə bilər.

Rusiyaya qarşı sanksiyalar – son xəbərlər

Qeyd edək ki, Trampa Rusiya Federasiyasına qarşı üç sanksiya variantı təklif olunub, o isə ən sərtini seçməyib. Eyni zamanda ABŞ liderinin Putinə təzyiqi artırmaq üçün başqa alətləri də var, lakin hələlik onlardan istifadə etməyib.

Senator Lindsi Qremin sözlərinə görə, Trampın təsdiqindən sonra Konqres Rusiyaya qarşı əlavə sanksiyalar barədə iki partiyalı qanun layihəsinə baxmağa başlayır.

Ağ Evdəki mənbələr bildiriblər ki, sənəd istənilən məhdudlaşdırıcı tədbirlə bağlı yekun qərar vermək hüququnu açıq şəkildə ona (Trampa) həvalə edəcəyi halda, Tramp yeni sanksiyalar haqqında qanun layihəsini imzalamağa hazırdır.

Alpər