Dunayda iki ölkə arasındakı su sərhədi yoxa çıxdı: Artıq qumla keçmək mümkündür

Rekord dərəcədə dayazlaşan Dunay çayının Xorvatiyanın Vukovar şəhəri yaxınlığındakı hissəsində qeyri-adi təbiət hadisəsi baş verib. Vukovar adası bir neçə yerdə Serbiyanın materik sahili ilə faktiki olaraq birləşib. Suyun geri çəkilməsi və qum çöküntüləri nəticəsində adaya artıq piyada getmək mümkündür.

Qaynarinfo xəbər verir ki, bu barədə Serbiyanın “Blic” nəşri məlumat yayıb.

Vukovar adası adətən Serbiya sahilindən Dunayın ensiz qolu ilə ayrılır və həmin su hövzəsi iki ölkə arasındakı sərhədin təbii hissəsini təşkil edir. Lakin bu yay suyun səviyyəsi o qədər aşağı düşüb ki, bəzi yerlərdə həmin qol demək olar ki, tamamilə yoxa çıxıb.

İndi suyun yerini geniş qumlu dayazlıqlar tutub. Yerli medianın məlumatına görə, adanın qərb hissəsində kanal tamamilə quruyaraq ərazini qumlu sahəyə çevirib.

Landşaftdakı qeyri-adi dəyişikliklərə baxmayaraq, Xorvatiya ilə Serbiya arasındakı dövlət sərhədi dəyişməz olaraq qalır. Adanın fiziki olaraq Serbiya sahili ilə birləşməsi onun ərazi mənsubiyyətinin dəyişməsi demək deyil.

Lakin yaranmış vəziyyət sərhəd nəzarəti baxımından praktiki problemlər yaradır. Yerli sakinlər Serbiyadan gələn bir avtomobilin adaya daxil olaraq onun ətrafında hərəkət etdiyini görüblər.

Beləliklə, əvvəllər adaya yalnız qayıqla getmək mümkün olduğu halda, indi ora piyada da çatmaq olar. Bu səbəbdən yerli hakimiyyət orqanları polis əməkdaşlarının ərazidə iştirakının gücləndirilməsinin vacibliyini vurğulayırlar.

Vukovar meri Mar­yan Pavliçek hələ fevral ayında qumun toplanması və suyun səviyyəsinin azalmasının mümkün nəticələri barədə xəbərdarlıq etmişdi.

“Bir neçə ildən sonra bu ada – Dunayın incisi və Vukovar şəhəri – fiziki olaraq Serbiya Respublikası ilə birləşəcək vəziyyətə gəlib çıxacağıq”, deyə o bildirmişdi.

Onun sözlərinə görə, Xorvatiyanın aidiyyəti qurumları problemə reaksiya verməlidir.

Dunayın rekord dərəcədə dayazlaşmasına baxmayaraq, ada istirahət üçün populyar məkan olaraq qalır. Suyun geri çəkilməsi nəticəsində çimərlik əhəmiyyətli dərəcədə genişlənib və yerli sakinlər buraya üzməyə gəlməyə davam edirlər.

“Burada çox gözəldir, içkilərimiz və lazım olan hər şey var. İlokda Dunayın demək olar ki, ortasına qədər getmək mümkündür. Mən artıq üzmüşəm, heç bir problem yoxdur, çayın aşağı hissəsində yarımçıq çayı keçmək olar”, deyə Bruna adlı yerli sakin bildirib.

Vukovarlı digər sakin Draqitsa isə Dunayı heç vaxt bu qədər dayaz görmədiyini deyib.

“Burada sərinləmək olar, amma suyun səviyyəsi xeyli aşağı düşüb. Belə bir şey əvvəllər heç vaxt olmayıb”, deyə o bildirib.

Vukovar adası eyniadlı şəhərin qarşısında yerləşir. Yay aylarında ada yerli sakinlər və turistlər üçün məşhur istirahət zonasına çevrilir. Vukovarın mərkəzindən adaya qayıqla adətən təxminən beş dəqiqəyə çatmaq mümkündür.

Adada qumlu çimərliklər, kölgəli ərazilər, çimərlik voleybolu meydançaları, restoranlar, düşərgə və digər istirahət məkanları yerləşir.

Bununla yanaşı, adanın siyasi statusu mürəkkəbdir. Ada Dunayın Serbiya sahilinə daha yaxın yerləşsə də, kadastr sənədlərində Vukovar şəhərinin bir hissəsi kimi göstərilir. Xorvatiya ilə Serbiya arasındakı ərazi sərhədlərinin müəyyənləşdirilməsi məsələsi Yuqoslaviyanın dağılmasından bəri həllini tapmayıb.

Aydın