Maqnezium orqanizmdə çoxsaylı funksiyalar yerinə yetirir, bir çox sistem və bioloji proseslərlə qarşılıqlı əlaqədə olur. Buna görə də bu mineralın çatışmazlığı özünü müxtəlif simptomlarla göstərə bilər. Əgər bu əlamətlər müşahidə olunursa, rasionda maqneziumla zəngin məhsulların artırılması lazım ola bilər.

Qaynarinfo xəbər verir ki, bu barədə "Prevention” nəşri yazır.

Diyetoloq Samanta Peterson bildirir ki, maqnezium səssiz şəkildə yüzlərlə həyati vacib prosesin işləməsini təmin edən minerallardan biridir.

ABŞ Milli Səhiyyə İnstitutunun məlumatına görə, maqnezium enerji istehsalında iştirak edir, qan təzyiqinin və qan şəkərinin sağlam səviyyədə saxlanmasına kömək edir, sinir və əzələ funksiyalarına təsir göstərir.

Araşdırmalar göstərir ki, insanların təxminən 48 faizi ehtiyac duyduğundan daha az maqnezium qəbul edir. "Shaklee" şirkətində məhsul innovasiyaları və elmi məsələlər üzrə direktor olan Erin Barretin sözlərinə görə, bunun əsas səbəblərindən biri maqneziumla zəngin tərəvəzlərin az istehlak olunması və emal edilmiş qidalarda mineralların azalmasıdır.

Qidalanma üzrə məsləhətçi Emi Devis qeyd edir ki, bəzi insanlarda maqneziuma tələbat daha yüksək ola bilər. Buraya yaşlılar, mədə-bağırsaq xəstəlikləri, II tip diabeti olanlar, psixoaktiv maddə istifadəsi ilə bağlı problemləri olan şəxslər və müəyyən dərmanlar qəbul edən pasiyentlər daxildir.

Maqnezium çatışmazlığını ilk baxışdan müəyyən etmək çətin olsa da, orqanizmin bu minerala ehtiyac duyduğunu göstərən bir sıra əlamətlər mövcuddur.

1. Yorğunluq

Daimi yorğunluq, zəiflik və enerji azlığı maqnezium çatışmazlığı ilə əlaqəli ola bilər. Maqnezium hüceyrələrdə əsas enerji molekulu olan ATP-nin istehsalı üçün vacibdir. Onun azlığı enerji istehsalının səmərəliliyini aşağı salır.

2. Əzələ qıcolmaları və spazmlar

Aşağı maqnezium səviyyəsi əzələlərdə qıcolma, titrəmə, spazm, keyimə və bəzən hətta qıcolmalara səbəb ola bilər. Bu mineral kalsium və kalium balansını tənzimlədiyi üçün onun çatışmazlığı sinir və əzələlərin həddindən artıq həyəcanlanmasına yol açır.

3. Narahatlıq və əsəbilik

Səbəbsiz stress, narahatlıq və əsəbilik də maqnezium çatışmazlığının əlaməti ola bilər. Maqnezium sinir sistemini sakitləşdirir, serotonin, dopamin və adrenalin balansında iştirak edir.

4. Ürək döyüntüsünün pozulması

Ürək döyüntülərinin sürətlənməsi və ya nizamsız olması bəzi hallarda maqnezium səviyyəsinin aşağı düşməsi ilə əlaqələndirilir. Bu mineral ürəyin elektrik fəaliyyətinin sabitliyində rol oynayır.

5. Baş ağrıları və miqren

Tez-tez təkrarlanan baş ağrıları və miqren də maqnezium çatışmazlığı ilə bağlı ola bilər. Mineral sinir impulslarının ötürülməsinə və beyində damar funksiyasına təsir edir.

6. Yuxu problemləri

Maqneziumun azlığı yuxuya getməni və gecə boyu rahat yatmağı çətinləşdirə bilər. Gərginlik və yorğunluqla yanaşı yuxusuzluq müşahidə olunursa, bu səbəb araşdırılmalıdır.

7. Yüksək qan təzyiqi

Maqnezium damar divarlarının rahatlamasına kömək edir. Onun çatışmazlığı arterial təzyiqin yüksəlməsi riskini artıra bilər.

8. Əhval dəyişiklikləri

Aşağı maqnezium səviyyəsi əhvalın tez-tez dəyişməsinə, hətta yüngül depressiv hallarına səbəb ola bilər. Bu, stress reaksiyalarının tənzimlənməsi ilə bağlıdır.

9. Həzm problemləri

Bəzi hallarda maqnezium azlığı qəbizlik və digər həzm pozğunluqları ilə özünü göstərə bilər. Xüsusilə bu əlamətlər yorğunluq və əzələ qıcolmaları ilə birlikdədirsə, diqqət yetirilməlidir.

10. Şirniyyata güclü istək

Maqnezium qan şəkərinin tənzimlənməsində iştirak etdiyi üçün onun çatışmazlığı şirniyyata meyli artıra bilər.

11. Sümüklərin zəifləməsi

Maqnezium sümük quruluşunun formalaşmasında, kalsium və D vitamini balansında mühüm rol oynayır. Uzunmüddətli çatışmazlıq sümük sıxlığının azalmasına və osteoporoz riskinin artmasına səbəb ola bilər.

Mütəxəssislər bildirirlər ki, bu əlamətlərdən bir neçəsi müşahidə olunursa, maqneziumla zəngin qidaların – balqabaq tumu, badam, yaşıl yarpaqlı tərəvəzlər, qəhvəyi düyü və qara lobyanın – rasiona daxil edilməsi faydalı ola bilər.

Maqnezium preparatları da kömək edə bilər, lakin onları qəbul etməzdən əvvəl mütləq həkimlə məsləhətləşmək tövsiyə olunur. Lazım gələrsə, həkim maqnezium səviyyəsini müəyyən etmək üçün qan analizi təyin edə bilər.

Aydın