Orta yaşlarda sabit əmək fəaliyyəti yaşlanma prosesində yaddaşın və digər koqnitiv funksiyaların daha yaxşı qorunması ilə əlaqəlidir. Kolumbiya Universitetinin tədqiqatçıları 2400-dən çox amerikalının 16 il ərzində toplanmış məlumatlarını araşdıraraq bu nəticəyə gəliblər.
Qaynarinfo xəbər verir ki, tədqiqatın nəticələri “Alzheimer's & Dementia” (A&D) jurnalında dərc olunub.
Alimlər iştirakçıların əmək fəaliyyətinin tarixçəsini təhlil edib və onların koqnitiv funksiyalarını qiymətləndiriblər. Müəyyən edilib ki, qeyri-sabit əmək fəaliyyəti olan kişilərin koqnitiv testlər üzrə göstəriciləri gözlənilən səviyyə ilə müqayisədə beynin təxminən yeddi il daha çox qocalmasına uyğun gəlib.
Əmək fəaliyyətini erkən dayandıran və ya uzun müddət əmək bazarında olmayan qadınlarda yaddaş və planlaşdırma, eləcə də qərar qəbul etmə ilə əlaqəli icraedici funksiyaların göstəriciləri daha aşağı olub. Tədqiqatçıların qiymətləndirməsinə görə, bu xüsusiyyətlər beynin təxminən altı il əlavə qocalması ilə əlaqəli olub.
Müşahidə dövrünün sonunda qadınların təxminən 30 faizində, kişilərin isə 31 faizində yüngül koqnitiv pozuntular və ya demensiya inkişaf edib.
Tədqiqatçılar hesab edirlər ki, koqnitiv sağlamlıq baxımından iş yerinin sabitlik hissindən daha çox əmək fəaliyyətinin fasiləsizliyi əhəmiyyət daşıya bilər. Müəlliflərin sözlərinə görə, orta yaşlarda müntəzəm əmək fəaliyyəti zehni aktivliyi qoruyub saxlaya və bununla da koqnitiv qocalmanın daha yavaş getməsi ilə əlaqəli ola bilər.
Bununla yanaşı, alimlər vurğulayırlar ki, tədqiqat yalnız əlaqəni göstərir və əmək fəaliyyətinin beynin vəziyyətinə birbaşa təsir etdiyini sübut etmir. Koqnitiv sağlamlığa əmək tarixçəsi və həyat tərzi ilə əlaqəli digər amillər də təsir göstərə bilər.
Aydın
Şərhlər