Arktika dairəsinin dərinliklərində, Norveçin Svalbard arxipelaqında dünyanın ən şimalda yerləşən daimi yaşayış məntəqəsi olan Lonqyirbyen şəhəri yerləşir.

Qaynarinfo xəbər verir ki, "Express” nəşri burada həyatın xüsusiyyətləri barədə yazıb.

2026-cı il siyahıyaalınmasına görə, Lonqyirbyendə təxminən 2512 nəfər yaşayır. Şəhərin ərazisi cəmi 10,4 kvadrat kilometrdir, lakin rahat həyat üçün lazım olan hər şey var: uşaq bağçası, məktəb, kilsə, poçt, restoran və hətta muzey. Bununla belə, şəhərdə yalnız bir ərzaq mağazası fəaliyyət göstərir və yerli sakinlər, eləcə də turistlər əsasən ona güvənirlər.

Maraqlıdır ki, Lonqyirbyendə küçələrin adları yoxdur, onlar yalnız nömrələrlə göstərilir. Yaşayış məntəqəsini ziyarət etməyi planlaşdıranlar onun uzaq yerləşməsi ilə bağlı xüsusi qaydalarla tanış olmalıdırlar. Bu qaydalar arasında pişik saxlamaq qadağası və hər bir sakinin ay ərzində ala biləcəyi spirtli içkilərin miqdarına qoyulan məhdudiyyət də var.

Lonqyirbyendə ölümün qanunsuz olduğu barədə geniş yayılan məlumat həqiqəti tam əks etdirmir. Əslində isə burada ölən insanların dəfn edilməsi qadağandır. Buna görə də ağır xəstə sakinlərə adətən materikə köçmək tövsiyə olunur. Dəfn qadağası 1950-ci ildə tətbiq edilib. Buna səbəb 1918-ci il qrip pandemiyası zamanı ölən insanların qalıqlarının güclü soyuq səbəbindən hələ də parçalanmadığının aşkarlanması olub. Bu vəziyyət basdırılmış qalıqlarda hələ də təhlükəli virus ştammlarının qala biləcəyi ilə bağlı narahatlıq yaradıb.

Şəhərdə həmçinin Şpisbergen Universitet Mərkəzi fəaliyyət göstərir. Bu, 78-ci en dairəsində yerləşən dünyanın ən şimaldakı təhsil və elmi müəssisəsidir. Tələbələr ətraf mühitlə sıx bağlı olan fənləri, o cümlədən Arktika biologiyası və Arktika geofizikasını öyrənirlər.

Şəhər özü Advent-fyord körfəzinin sahilində yerləşən vadidə yerləşir. Buradakı mənzərələr olduqca təsirlidir — ətrafda dağlar və buzlaqlar ucalır. Bununla belə, şəhərə gələnlər arasında yalnız turistlər yoxdur: burada mütəmadi olaraq marallara, balinalara və ən əsası ağ ayılara rast gəlmək mümkündür. Məhz buna görə yerli sakinlər yaşayış məntəqəsinin hüdudlarından kənara çıxarkən silah götürməli olurlar.

Bir çoxları səhvən şəhərin adının onun təcrid olunmuş yerləşməsi və ya uzun qütb gecələri ilə bağlı olduğunu düşünür. Əslində isə Lonqyirbyen adını qütb gününün uzunluğuna və ya coğrafi uzaqlığına görə deyil, onun əsasını qoyan Con Munro Lonqyirin şərəfinə alıb.

Sərt iqlimə və ilboyu mənfi temperaturlara baxmayaraq, şəhər mühüm elmi və təhsil mərkəzinə çevrilib. Turizm də region iqtisadiyyatında getdikcə daha böyük rol oynayır. Belə ki, 2016-cı ildə Lonqyirbyeni 115 min turist ziyarət edib, onların 35 mini xarici kruiz gəmiləri ilə gəlib.

Şəhərə hava yolu ilə çatmaq mümkündür — Oslodan uçuş təxminən üç saat, Tromsödən isə cəmi 90 dəqiqə davam edir.

Aydın