2022-ci ilin sonlarında həyatımıza daxil olan ChatGPT qısa müddət ərzində rəqəmsal dünyanın ən çox danışılan mövzularından birinə çevrilib. "OpenAI" tərəfindən inkişaf etdirilən bu inkişaf etmiş süni intellekt demək olar ki, insan kimi düşünən və cavab verən quruluşu ilə texnologiyaya baxışımızı kökündən dəyişdirib.

Qaynarinfo xəbər verir ki, istər veb brauzer vasitəsilə, istərsə də mobil tətbiq üzərindən olsun, bu texnologiyaya çatmaq bir neçə saniyə çəkir. "Google", "Apple" və ya "Microsoft" hesabları ilə tez giriş edib keçmiş söhbətləri saxlaya bilirik. Lakin istifadə rahatlığı və təqdim etdiyi praktik həllər, bu texnologiyanın hər zaman mükəmməl olduğu anlamına gəlmir. Gündəlik həyatımıza bu qədər inteqrasiya olan bir köməkçinin bəzi risk və məhdudiyyətlərini bilmək böyük əhəmiyyət kəsb edir.

1. Mükəmməl görünsə də yanıldıcı məlumatlar

Süni intellektin ən diqqətçəkən zəif tərəflərindən biri, məlumat təqdim edərkən etdiyi səhvlərdir. ChatGPT qarşısındakına bir şey izah edərkən çox özünəinamlı və bilikli bir tərz sərgiləsə də, bu ton həmişə həqiqəti əks etdirmir. Sistem təlim aldığı məlumat dəstlərinə əsaslanaraq nəticələr yaradır və bu məlumatlar bəzən səhv və ya köhnəlmiş ola bilər.

Xüsusilə pulsuz versiyanı istifadə edənlər üçün məlumat bazası həmişə bir addım geri qalır. Rəqabət səbəbilə yeniləmələr sürətlə yayılsa da, "OpenAI" istifadəçiləri bəzən sistemin saxta sitatlar və ya akademik işlər "uydura biləcəyi” barədə xəbərdar edir. Bu səbəbdən təqdim olunan məlumatları başqa mənbələrdən də təsdiqləmək çox vacibdir.

2. İnsansı ünsiyyətin psixoloji təsirləri

ChatGPT ilə söhbət edərkən qarşınızdakının bir proqram olduğunu unutmaq bəzən çox asan olur. İnsan dilini bu qədər uğurla təqlid etməsi, istifadəçilərin süni intellektlə emosional bağ qurmasına, hətta onu bir sirdaş kimi görməsinə səbəb olur. İnsanlar burada özlərini yargılanmaq qorxusu olmadan ifadə edə bildikləri üçün bu platformaları cəlbedici hesab edirlər. Lakin bu, ekranın digər tərəfində real bir zehin deyil, yalnız məlumat təxmin edən bir alqoritm olduğu həqiqətini dəyişdirmir. Bu illüziya o qədər güclü ola bilər ki, bəzi istifadəçilər süni intellekti "mükəmməl yoldaş” kimi görərək virtual münasibətlər yaşamağa başlayır.

3. Yaddaşın sərhədləri və məlumatın saxlanması

Sistemin hər şeyi əbədi yadda saxladığı düşünülsə də, əslində ChatGPT-nin də bir yaddaş limiti var. Uzun söhbətlərdə müəyyən bir mərhələdən sonra əvvəlki detalları qaçırmağa başlayır. "Token” adlanan məlumat vahidləri ilə işləyən bu mexanizm yalnız bir neçə səhifəlik mətni yadda saxlaya bilir.

Süni intellekt şəxsi maraqlar və uzunmüddətli layihələr kimi kontekstləri saxlaya bilsə də, şəxsiyyət nömrəsi və telefon kimi həssas və qısa müddətli məlumatları saxlamaqdan çəkinir. Bu səbəbdən əvvəlki söhbətlərin bir qismini yadda saxlayaraq uyğun cavablar verməyə çalışır, lakin bəzən vacib məqamları unuda bilir. Bu vəziyyət sistemin həm texniki qabiliyyətini, həm də təhlükəsizlik yanaşmasını əks etdirir.

4. Məxfilik və təhlükəsizlik xəbərdarlıqları

Süni intellekt platformalarından istifadə edərkən şəxsi təhlükəsizliyi nəzərə almaq vacibdir. ChatGPT-nin məxfilik siyasətinə görə, istifadəçilərin sistemə daxil etdiyi hər hansı mətn və yüklədiyi fayllar xidmətin inkişaf etdirilməsi və təlim üçün istifadə oluna bilər. Bu da paylaşdığınız məlumatların təlim prosesində insan nəzarətçiləri tərəfindən görülə biləcəyini göstərir. Bundan əlavə, şirkət qanuni tələblər yarandıqda məlumatları üçüncü tərəflərlə paylaşmaq hüququnu qoruyur. Buna görə bank məlumatları, iş layihələri və ya şəxsi həyatla bağlı həssas detalları bu platformalarla paylaşmaq ciddi risklər daşıyır.

Aydın