Tramp bu fikri BMT Baş Assambleyasının Nyu-Yorkda keçirilən iclasında çıxışı zamanı səsləndirib. O bildirib ki, “süni” sözü texnologiyanı olduğundan daha “saxta” göstərir və bundan sonra ABŞ hökumətinin sənədlərində “artificial intelligence” əvəzinə “super intelligence” ifadəsindən istifadə olunmasını istəyir.

Trampın sözlərinə görə, yeni termin yalnız ABŞ-da deyil, mümkün qədər digər ölkələrdə də istifadə edilməlidir.

Bu təklif Trampın son günlərdə sosial media hesabında keçirdiyi adlandırma sorğusundan sonra gəlib. O, izləyicilərinə süni intellekt üçün bir neçə alternativ ad təqdim edib. Bunların arasında “superior intelligence”, “extreme intelligence” və “supreme intelligence” kimi variantlar da olub. Sonda “super intelligence” seçilib.

Lakin texnologiya sahəsində çalışan ekspertlər bu adın geniş yayılacağına şübhə ilə yanaşırlar.

BBC-yə danışan mütəxəssislər bildiriblər ki, “super intellekt” texnologiya dünyasında artıq xüsusi məna daşıyan termindir. Bu anlayış insanın intellektual qabiliyyətlərini bütün sahələrdə üstələyə biləcək hipotetik sistemləri təsvir etmək üçün istifadə olunur.

Melburn Universitetindən rəqəmsal etika üzrə mütəxəssis Simon Coghlan hesab edir ki, AI üçün “super intellekt” adından istifadə etmək yanıltıcı ola bilər. Onun fikrincə, bu termin mövcud süni intellekt sistemlərinin imkanlarını olduğundan daha yüksək göstərir.

Sinqapur Milli Universitetindən kompüter elmləri üzrə mütəxəssis Ben Leong da hesab edir ki, texnologiya sahəsində çalışan mütəxəssislər “SI” ifadəsini gələcəkdə insan səviyyəsindən daha üstün sistemlər üçün saxlamaq istəyəcəklər.

Bununla yanaşı, Trampın ətrafındakı bəzi şəxslər artıq yeni termindən istifadə etməyə başlayıblar.

ABŞ-ın baş texnologiya direktoru Ethan Klein sosial media paylaşımında Trampı “Super Intelligence prezidenti” adlandırıb. ABŞ-ın BMT-dəki səfiri Michael Waltz da prezidentin çıxışından sonra “artıq super intellektdir” ifadəsini işlədib.

“Super intellekt” anlayışı alim və filosof Nick Bostromun əsərləri ilə də geniş şəkildə əlaqələndirilir. Bostrom bu termini insanlardan bütün intellektual sahələrdə üstün olan hipotetik zəka kimi izah edib. Hazırda belə bir sistem mövcud deyil.

Tramp isə süni intellektin inkişafının məhdudlaşdırılmasına qarşı çıxır. O, ABŞ-ın bu sahədə Çindən geri qalmasının qəbuledilməz olduğunu bildirərək, AI yarışında üstünlük qazanan ölkənin strateji baxımdan böyük üstünlük əldə edəcəyini deyib. Tramp eyni zamanda süni intellektin inkişafının sənaye inqilabından belə daha böyük təsirə malik ola biləcəyini vurğulayıb.

ABŞ prezidenti texnologiya sektorunun zərurət yarandıqda nəzarətdə saxlanılacağını da bildirib. Bu açıqlamalar süni intellektin təhlükəsizliyi və tənzimlənməsi ilə bağlı müzakirələrin intensivləşdiyi bir vaxtda səslənib.

Beləliklə, Trampın təklif etdiyi yeni adın ABŞ dövlət sənədlərində istifadə olunub-olunmayacağı mümkün olsa da, onun texnologiya sənayesində və elmi ədəbiyyatda “artificial intelligence” ifadəsini əvəz edib-etməyəcəyi hələ məlum deyil.

Şəbnəm İbrahimxəlilova