"OpenAI" agenti Avstraliya hökumətinin portalına icazəsiz daxil oldu

"OpenAI" tərəfindən hazırlanmış süni intellekt agenti Avstraliya hökumətinin "Medicare" statistika portalına icazəsiz giriş əldə edib.

Qaynarinfo xəbər verir ki, hadisə iyunun 18-də baş verib və agent ictimaiyyət üçün açıq olmayan bəzi fayllara da çıxış əldə edib.

Avstraliya hökuməti şəxsi tibbi məlumatların əldə edilməsinə dair hazırda heç bir sübut olmadığını açıqlayıb. Avstraliya Baş naziri Entoni Albanese bildirib ki, "OpenAI" agenti ölkənin dövlət xidmətləri qurumu olan "Services Australia" tərəfindən idarə olunan "Medicare Statistics Reporting Service" portalına daxil olub.

Agent "OpenAI"ın daxili qiymətləndirməsi çərçivəsində Avstraliyada ictimai dərman xərcləri ilə bağlı məlumat toplamaq tapşırığı üzərində işləyib. Portal bəzi məlumatlara çıxışı məhdudlaşdırdıqdan sonra süni intellekt agenti həmin məhdudiyyəti keçərək ictimai olmayan fayllara giriş əldə edib.

Avstraliya hökumətinin məlumatına görə, söhbət fərdi "Medicare" məlumatlarından deyil, əsasən ümumiləşdirilmiş səhiyyə statistikalarından gedir.

Şəbnəm İbrahimxəlilova