İspaniyanın əlavə vaxtda vurduğu qolla Argentinanı 1:0 hesabı ilə məğlub edərək dünya çempionu olduğu 2026 FIFA Dünya Çempionatının finalı bir sıra tarixi hadisələrlə yadda qalıb.

Qaynarinfo xəbər verir ki, 80 min tamaşaçı tutumuna malik Nyu-York–Nyu-Cersi stadionunda keçirilən final görüşünün fasiləsində ilk dəfə olaraq ABŞ-da təşkil olunan "Super Bowl" oyunlarında olduğu kimi səhnə şousu təqdim edilib.

"Coldplay" qrupunun solisti Kris Martinin kuratorluğu ilə hazırlanan proqramda Castin Biber, Şakira və Madonna kimi dünya şöhrətli sənətçilər çıxış ediblər. Lakin şounun planlaşdırılandan uzun çəkməsi səbəbindən ikinci hissə ilk yarının başa çatmasından 27 dəqiqə sonra, yəni 12 dəqiqə gec başlayıb. Halbuki Beynəlxalq Futbol Assosiasiyaları Şurasının (IFAB) qaydalarına əsasən, fasilə müddəti 15 dəqiqəni keçməməlidir.

FIFA daha əvvəl açıqlamışdı ki, fasilə proqramı 11 dəqiqə davam edəcək və bu tədbir vasitəsilə dünya üzrə uşaqların keyfiyyətli təhsil və futbol imkanlarına çıxışını dəstəkləmək məqsədilə 100 milyon ABŞ dolları toplanması hədəflənir.

İspaniya finallarda ikinci qələbəsini qazandı

2010-cu ildə ilk dəfə Dünya Çempionatının finalına yüksələrək çempion olan İspaniya, 2026-cı ildə də eyni uğuru təkrarlayıb.

16 il əvvəl Cənubi Afrika Respublikasında keçirilən mundialın finalında Niderlandı Andres İnyestanın 116-cı dəqiqədə vurduğu qolla 1:0 hesabı ilə məğlub edən ispanlar, bu dəfə də həlledici qolu əlavə vaxtda vurublar.

Komandaya çempionluğu Ferran Torresin 106-cı dəqiqədə vurduğu qol qazandırıb.

İspaniyadan ikinci "dubl"

İspaniya 2010-cu ildə Avropa çempionu titulundan sonra Dünya Çempionatını da qazanmışdı. Komanda 2024-cü il Avropa çempionatının finalında İngiltərəni 2:1 hesabı ilə məğlub etdikdən sonra 2026-cı ildə dünya çempionu olaraq tarixində ikinci dəfə Avropa və dünya çempionluğu "dubl"una imza atıb.

Kişi və qadın futbolunda eyni vaxtda dünya çempionu

İspaniya kişi və qadın futbolunda eyni vaxtda dünya çempionu titulunu daşıyan ilk ölkə olub.

İspaniya qadın millisi 2023-cü ildə Avstraliya və Yeni Zelandiyada keçirilən Dünya Çempionatının finalında İngiltərəni 1:0 hesabı ilə məğlub etmişdi.

Bununla yanaşı, İspaniya Dünya Çempionatını iki və ya daha çox dəfə qazanan yeddinci ölkə kimi tarixə düşüb.

Turnirin bombardiri Kilian Mbappe oldu

Fransa millisinin hücumçusu Kilian Mbappe turnirdə vurduğu 10 qolla "Qızıl buts" mükafatına layiq görülüb.

Argentina millisinin futbolçusu Lionel Messi mundialı 8, İngiltərə millisinin üzvü Cud Bellinqem və Norveç yığmasının hücumçusu Erlinq Haaland isə 7 qolla başa vurublar.

Mbappe 2022-ci il Qətər mundialından sonra ardıcıl ikinci dəfə Dünya Çempionatının bombardiri olub.

Fransız futbolçu ümumilikdə 22 qolla Dünya Çempionatları tarixinin ən məhsuldar futbolçusu rekordunu da yeniləyib. Messi isə 21 qolla ikinci pillədə qərarlaşıb.

İspaniya 38 oyunluq məğlubiyyətsizlik rekordu müəyyənləşdirdi

İspaniya ardıcıl 38 oyunda məğlub olmayaraq yeni rekord müəyyənləşdirib.

Komanda son 38 qarşılaşmada 29 qələbə və 9 heç-heçə qazanıb. Bununla da İtaliya millisinin 37 oyunluq rekordunu geridə qoyub.

İspaniya sonuncu dəfə 22 mart 2024-cü ildə Londonda keçirilən yoldaşlıq görüşündə Kolumbiyaya 0:1 hesabı ilə məğlub olub.

Turnirin ən yaxşı futbolçusu Rodri seçildi

İspaniya millisinin kapitanı və yarımmüdafiəçisi Rodri turnirin ən yaxşı futbolçusuna təqdim olunan "Qızıl top" mükafatını qazanıb.

Komandanın qapıçısı Unai Simon "Qızıl əlcək", 19 yaşlı müdafiəçi Pau Kubarsi isə turnirin ən yaxşı gənc futbolçusu mükafatına layiq görülüb.

Donald Tramp mərasimdə fitə basıldı

Dünya kubokunu İspaniya millisinin kapitanı Rodriyə ABŞ Prezidenti Donald Tramp və FIFA prezidenti Canni İnfantino birlikdə təqdim ediblər.

Tramp kuboku təqdim etmək üçün meydana çıxarkən tribunaların bir hissəsi tərəfindən fitə basılıb.

İspaniya cəmi bir qol buraxaraq rekord müəyyənləşdirdi

İspaniya turnirdə yeganə xal itkisini qrup mərhələsində Yaşıl Burun Adaları ilə qolsuz heç-heçə etməklə yaşayıb.

Komanda səkkiz oyunda qapısından cəmi bir top buraxaraq Dünya Çempionatı tarixində eyni turnirdə yalnız bir qol buraxmaqla çempion olan ilk yığma olub.

İspanlar yalnız Belçikaya qarşı 1/4 final mərhələsinin oyununda qol buraxıblar, finalda isə qapılarını toxunulmaz saxlayıblar.

Daha əvvəl 2010-cu ildə İspaniya, 1998-ci ildə Fransa və 2006-cı ildə İtaliya iki buraxılmış qolla dünya çempionu olmuşdu.

Luis de la Fuente ən yaşlı dünya çempionu baş məşqçi oldu

65 yaşlı Luis de la Fuente Dünya Çempionatını qazanan ən yaşlı baş məşqçi kimi tarixə düşüb.

Əvvəlki rekord 2010-cu ildə İspaniyanı dünya çempionu edən 59 yaşlı Visente del Boskeyə məxsus idi.

Argentina finalda dördüncü dəfə məğlub oldu

Argentina millisi Dünya Çempionatında keçirdiyi yeddinci finalda dördüncü məğlubiyyətini alıb.

Komanda 1978, 1986 və 2022-ci illərdə dünya çempionu olsa da, 1930, 1990, 2014 və 2026-cı illərdə finalda uduzub.

Lionel Skaloninin rəhbərlik etdiyi kollektiv Dünya Çempionatında son 13 oyunda məğlub olmamışdı. Bu seriya İspaniyaya qarşı final matçında başa çatıb.

Bundan başqa, Argentina Dünya Çempionatları tarixində final qarşılaşmasının əsas vaxtında rəqib qapısına bir dəfə də olsun zərbə endirməyən ilk komanda olub.

Aydın