Danimarka və İsveçin gözəlliklərindən zövq almaq istəyənlər hər iki ölkəni cəmi bir gün ərzində ziyarət edə bilərlər. Buna imkan verən isə heyrətamiz "yoxa çıxan” körpüdür. Yay mövsümündə qeyri-adi səyahət istiqamətləri axtaranlar üçün bu maraqlı mühəndislik qurğusu şübhəsiz ki, diqqətəlayiqdir.

Qaynarinfo xəbər verir ki, bu barədə "Mirror" yazır.

Qeyd edək ki, keçidin adı yerləşdiyiniz sahildən asılı olaraq dəyişir: Danimarka dilində Øresund, İsveç dilində isə Öresund adlanır.

Yoxa çıxma effekti

Bu tikilinin ən təəccüblü cəhəti ondadır ki, o əvvəlcə körpü kimi başlayır, sonra isə ustalıqla okeanın altına enərək tunelə çevrilir. Vizual olaraq elə təsir yaranır ki, yol sadəcə suyun səthində yoxa çıxır.

Tikinti işləri 2000-ci ildə başa çatdırılıb, açılış mərasimi isə Danimarka kraliçası II Marqrete və İsveç kralı XVI Karl Qustavın iştirakı ilə keçirilib. Öresund Kopenhagen və Malmö kimi iki böyük şəhəri birləşdirir. Bu möhtəşəm dəmir yolu və avtomobil körpüsü Avropada uzunluğuna görə ikinci yerdədir (yalnız 18,1 kilometrlik, Krımı Rusiya Federasiyası ilə birləşdirən Kerç körpüsündən geri qalır).

Öresund boğazının (Zund kimi də tanınır) hər iki sahilində turistlər üçün çoxsaylı maraqlı məkanlar mövcud olsa da, bu keçid özü ayrıca bir attraksion sayılır.

Körpü iki ölkə arasında birlik və əməkdaşlığın, eləcə də digər Avropa dövlətləri ilə inteqrasiyanın mühüm simvolu hesab olunur. Bu rəmzi məna 2013-cü ildə Malmö şəhərində keçirilən 58-ci "Eurovision” mahnı müsabiqəsinin vizual tərtibatında da geniş şəkildə istifadə edilmişdi.

Necə qurulub? - Körpü, ada və tunel

ICE mülki mühəndislik qrupunun məlumatına görə, bu məşhur keçid üç əsas hissədən ibarətdir:

– 8 km uzunluğunda körpü;

– 4 km uzunluğunda süni "Peberholm” adası. Ada unikal yol qovşağı funksiyasını yerinə yetirir və təbiətin sərbəst inkişafı üçün toxunulmaz saxlanılıb;

– 4 km uzunluğunda sualtı tunel. Tunel eyni zamanda dəniz canlıları üçün süni rif rolunu oynayır.

Bu yoldan hər gün orta hesabla 70 min nəfər istifadə edir. Layihə İsveçin "Svedab” şirkəti ilə Danimarkanın "A/S” firmasının birgə əməkdaşlığının nəticəsidir. Keçid yalnız icazəli nəqliyyat üçün nəzərdə tutulmuş giriş-çıxışlara və fövqəladə hallar üçün helikopter meydançasına malikdir.

Keçid haqqı nə qədərdir?

Boğazdan keçidin qiyməti nəqliyyat vasitəsindən asılıdır:

– Motosiklet sürücüləri üçün 25,68 funt-sterlinq (təxminən 33 ABŞ dolları);

– Minik avtomobilləri üçün 50,77 funt-sterlinq (təxminən 65 ABŞ dolları);

– Furqonlar, avtokemperlər və ya qoşqulu avtomobillər üçün isə qiymət xeyli yüksəkdir – 178,55 funt-sterlinq (təxminən 228 ABŞ dolları).

Niyə məhz tunel?

Qurğunun ümumi uzunluğu təxminən 16 km-dir. Tikinti beş il davam edib və 2,3 milyard funt-sterlinqə (təxminən 2,9 milyard ABŞ dolları) başa gəlib ki, bu da indiki qiymətlərlə 4,8 milyard funt-sterlinqə (təxminən 6,1 milyard ABŞ dolları) bərabərdir.

Layihəçilər marşrut boyunca tamamilə hündür körpü tikməmək qərarına gəliblər. Səbəb isə Kopenhagen hava limanının yaxınlığında radio siqnallarına maneə yaranması ehtimalı olub. Bundan əlavə, tunel gəmiçiliyin istənilən hava şəraitində maneəsiz həyata keçirilməsini təmin edir.

Açılışdan 25 ildən artıq vaxt keçməsinə baxmayaraq, Öresund son dərəcə uğurlu layihə hesab olunur. O, Danimarka və İsveçin iqtisadi perspektivlərini yaxşılaşdırıb və təxminən 4,2 milyon əhalisi olan, dünyada "Öresund regionu” kimi tanınan ticarət zonasının formalaşmasına töhfə verib.

Bu tikili nüfuzlu "IABSE Outstanding Structure Award" mükafatına layiq görülüb. Körpü populyar mədəniyyətdə də əksini tapıb: İsveç-Danimarka istehsalı olan "Körpü” serialının əsas hadisə məkanlarından biridir. 2011-ci ildə yayımlanan ilk mövsüm körpünün tam ortasında – iki dövlətin sərhədində bir cəsədin tapılması ilə başlayır.

Aydın