ABŞ Federal Ehtiyat Sisteminin (FED) yeni sədri Kevin Vorşun rəhbərlik edəcəyi ilk faiz qərarı toplantısında diqqətlərin faiz qərarı və siyasət mətnindən çox, Vorşun verəcəyi mesajlara yönələcəyi gözlənilir.

Qaynarinfo-nun məlumatına görə, FED-in sabahkı iclasda faiz dərəcələrini dəyişməz saxlayacağı geniş şəkildə gözlənilsə də, diqqət Vorşun ilkin irəliyə doğru istiqamətləndirməsinin tonuna yönələcək.

Güclü məşğulluq göstəriciləri və yüksələn inflyasiya səbəbindən ilin sonuna qədər FED-in bir dəfə faiz artıracağına dair proqnozlar gündəmdə qalır. Lakin geosiyasi inkişaflarla bağlı müsbət xəbərlər fonunda faiz artımı ehtimallarının bir qədər zəiflədiyi bildirilir.

Vorşun toplantıdan sonra edəcəyi açıqlamalarda gələcək pul siyasətinə dair siqnallar axtarılacaq. Bu siqnalların maliyyə bazarlarında volatilliyi artıra biləcəyi proqnozlaşdırılır.

"Rabobank”ın ABŞ üzrə baş strateqi Filip Marey AA müxbirinə açıqlamasında Kevin Vorşun sədr kimi ilk toplantısında siyasət mətnindəki yumşalma meyli ilə bağlı ifadələri çıxarmasının və 2026 faiz endirimi proqnozunun nöqtə qrafikindən silinməsinin mümkün olduğunu bildirib.

Marey son məlumatlara əsaslanaraq bu dəyişikliklərin səbəblərinin izahının çətin olmadığını qeyd edib. O, may ayında istehlak qiymətləri indeksinin (İQİ) 4,2% artdığını və son üç ayda qeyri-kənd təsərrüfatı məşğulluq artımının orta hesabla 188 min olduğunu deyib.

Marey əlavə edib: "Vorşun toplantıdan sonrakı ilk mətbuat konfransında ən maraqlı məqam Yaxın Şərqdən gələn təklif şokunu izah etmək üçün istifadə etdiyi analitik çərçivə ola bilər. Bu, yeni sədrin növbəti 12 ayda Federal Açıq Bazar Komitəsini (FOMC) faiz endiriminə necə razı salmaq istədiyinə dair ipucu verə bilər. Bundan əlavə, Vorşun məlumat asılılığına, irəli yönləndirməyə və qısamüddətli proqnozlara münasibətini necə ifadə edəcəyi də diqqətlə izləniləcək".

Marey Hürmüz boğazında tıxanmanın davam etməsi və ABŞ əmək bazarının güclü qalması səbəbilə faiz endirimi gözləntilərini təxirə saldıqlarını bildirib. Onun proqnozuna görə, "Fed” 2026-cı ilin sonuna qədər faizləri sabit saxlayacaq, 2027-ci ildə isə iki faiz endirimi həyata keçirəcək.

Vorşun irəli yönləndirmələrə yanaşması yaxından izlənəcək

ING beynəlxalq baş iqtisadçısı Ceyms Naytli ABŞ-da iqtisadi aktivliyin yaxşılaşması və inflyasiyanın artmasının "Fed”in gələcəkdə faiz artırma ehtimalını qəbul etməsi anlamına gəldiyini bildirib.

Naytli yeni sədr Vorşun irəli yönləndirmələri sevmədiyini və ilk mətbuat konfransında qəti cavablardan yayınacağını gözlədiklərini qeyd edib. O, ABŞ iqtisadiyyatının enerji müstəqilliyi səbəbilə Yaxın Şərq risklərindən bir çox ölkəyə nisbətən daha az təsirləndiyini, lakin tamamilə sığortalanmadığını vurğulayıb.

Naytli həmçinin inflyasiyanın yüksəlməsinə baxmayaraq biznes sorğularının 2–2,5% iqtisadi artıma işarə etdiyini, məşğulluğun artdığını və səhmlərin rekord səviyyələrə çatdığını deyib.

FED-in hazırkı mərhələdə siyasəti dəyişməyəcəyini gözlədiklərini bildirən Naytli, faiz artımı ehtimalına daha çox diqqət çəkən bir bəyanatın mümkün olduğunu qeyd edib.

O əlavə edib: "ABŞ Prezidenti Donald Trampın daha aşağı faiz dərəcələri tələb etməsinə baxmayaraq, Kevin Vorşun digər 11 üzvə qarşı çıxaraq faiz endirimi lehinə səs verəcəyinə şübhə edirik. Vorş mətbuat konfransında hazırkı iqtisadi şəraitin faiz endirimlərini əsaslandırmadığını qəbul edəcək. Bununla yanaşı, o, zamanla texnologiya investisiyalarının ABŞ məhsuldarlığını artıracağı, yəni inflyasiya yaratmadan daha sürətli artım təmin edəcəyi fikrini təkrarlaya bilər. Bu isə orta və uzun müddətdə daha aşağı neytral faiz dərəcəsini əsaslandırır".

Naytli həmçinin Vorşun ikitərəfli risklərin mövcudluğunu və ilin sonuna qədər şərtlərin ciddi şəkildə dəyişə biləcəyini vurğulamaq istəyə biləcəyini qeyd edib.

Aydın