Maliyyə Sabitliyi Şurasının (FSB) sədri Endryu Beyli bazar ertəsi bildirib ki, süni intellektin kiberrisklərə təsiri qlobal maliyyə sistemi üçün ən təcili narahatlıq doğuran məsələdir. Onun sözlərinə görə, bu texnologiya kiberhücumların sürətini, miqyasını və iqtisadi nəticələrini dəyişə bilər.

Qaynarinfo xəbər verir ki, maliyyə sistemlərində riskləri müəyyənləşdirmək və idarə etmək məqsədi daşıyan qlobal nəzarət qurumu olan FSB-nin rəhbəri bu fikirləri bu həftə keçiriləcək görüşlər öncəsi G20 ölkələrinin maliyyə nazirləri və mərkəzi bank rəhbərlərinə göndərdiyi məktubda səsləndirib.

Böyük Britaniya Bankının da rəhbəri olan Beyli bildirib ki, bir çox ölkədə qabaqcıl süni intellekt modellərinin tətbiqini idarə etmək üçün lazımi sistemlər mövcud deyil.

O əlavə edib ki, maliyyə sektorunun bir neçə güclü texnologiya provayderindən asılılığı bütün sistem üzrə bazar etimadını zəiflədə bilər.

Tənzimləyicilərin narahatlığı ondan ibarətdir ki, qabaqcıl süni intellekt kibertəhlükəsizlikdəki boşluqların daha sürətlə aşkarlanmasına səbəb ola bilər. Bu isə sistemlərin daha tez yenilənməsini zəruri edəcək. Test və bərpa prosesləri buna təhlükəsiz şəkildə uyğunlaşa bilməsə, əməliyyat və dayanıqlılıq baxımından yeni problemlər yarana bilər.

Beylinin açıqlamaları ABŞ administrasiyasının “Anthropic” şirkətinin güclü “Mythos” modelini ciddi nəzarət altında istifadəyə verməsindən və müəyyən mərhələdə ona yalnız ABŞ vətəndaşlarının çıxışına icazə verilməsindən sonra səslənib.

“Son hadisələr imkanların inkişafının dayanıqlılıq və hazırlıq səviyyəsinin artırılması ilə müşayiət olunmasının vacibliyini göstərir”, – Beyli deyib.

Onun sözlərinə görə, süni intellekt modellərinin “qlobal miqyasda” təhlükəsiz və məsuliyyətli şəkildə istifadəyə buraxılmasının dəstəklənməsi prioritet olmalıdır.

İyul ayında “OpenAI” şirkətinin agenti nəzarət altında aparılan sınaq mühitindən çıxaraq “Hugging Face” süni intellekt şirkətinə haker hücumu həyata keçirib. Hadisə süni intellekt sistemlərinin təhlükəsizlik tədbirlərindən yan keçə bilməsi ilə bağlı narahatlıqları artırıb.

Bazar düzəlişləri ilə bağlı xəbərdarlıq

Beyli əvvəlki xəbərdarlıqlarını da təkrarlayaraq potensial bazar korreksiyası riskinə diqqət çəkib. O, süni intellekt şirkətlərinin yüksək qiymətləndirmələrini və dövlət borcu bazarlarındakı zəiflikləri risk amilləri kimi göstərib.

FSB sədri eyni zamanda səhm bazarlarında borclanma və maliyyə leverecindən istifadənin artmasını yeni yaranan narahatlıq mənbəyi kimi qeyd edib.

ABŞ Maliyyə Nazirliyi bu ayın əvvəlində uzunmüddətli dövlət istiqrazlarının gəlirliliyinin son bir neçə onilliyin ən yüksək səviyyələrinə çatmasından sonra gəlirliliklərin artımını məhdudlaşdırmaq üçün müdaxilə edib.

Aydın