İsrail ordusu aylarla davam edən döyüşlərdən sonra Qəzzanın cənubundakı Xan Yunis şəhərindən quru qoşunlarını geri çəkdiyini, lakin zolağın digər ərazilərində əhəmiyyətli qüvvənin qaldığını açıqlayıb.

Qaynarinfo CNN-ə istinadən xəbər verir ki, bu barədə İsrail Müdafiə Qüvvələri (IDF) məlumat yayıb.

IDF bildirib ki, onun 98-ci diviziyası Xan Yunisdə missiyasını başa vurub. Diviziya toparlanmaq və gələcək əməliyyatlara hazırlaşmaq üçün Qəzza sektorunu tərk edib.

"162-ci diviziya və Nahal briqadasının başçılıq etdiyi mühüm qüvvə Qəzza zolağında fəaliyyətini davam etdirir", deyə İDF-dən bildirilib.

CNN-in geri çəkilməsinin səbəbləri ilə bağlı sualına İDF şərh verməkdən imtina edib. Bu addım İsrailin Qəzzanın cənubundakı sıx məskunlaşan və indiyədək quru döyüşlərindən qaçan bölgəsi olan Rəfaha daxil olmaq planı ilə bağlı suallar doğurur.

Bazar günü İsrailin ictimai yayımı və CNN-in filialı olan "Kanal 11" xəbər verib ki, qalan qüvvələr Qəzza zolağını ikiyə bölən Netzarim dəhlizi adlanan marşrut boyunca yerləşdiriləcək. Dəhliz strateji, mərkəzi qovşaq yaratmaq üçün Qəzzanın iki əsas şimal-cənub yolundan birini, Səlahəddin küçəsini kəsir.

İDF bazar günü bildirib ki, komando bölmələri Xan Yunisin Əl-Amal məhəlləsində yüzdən çox yerə reyd keçirib və axtarış aparıb. Təxminən 900 metr uzunluğunda tunel də daxil olmaqla, axtarış aparılan hər yerdə terror infrastrukturu tapıldığını iddia edib. İsrail ordusu əməliyyat zamanı terrorçuları məhv etdiyini bildirib.

"The Jerusalem Post" isə məlumat yayıb ki, İsrail ordusu bazar günü gecə Qəzza zolağının cənubundan bütün bölmələrini geri çəkib. Bildirilir ki, Qəzzanın cənubunda yalnız bir İDF briqadası qalıb və bu, İsrailin cənubunu Qəzza zolağının sahilləri ilə birləşdirən dəhlizin təhlükəsizliyini təmin edəcək.

Bu arada, İsrailin baş naziri Benyamin Netanyahu bildirib ki, HƏMAS-ın komandanlıq etdiyi batalyonların 80%-ni məhv edilib. O, bu rəqəmləri İsraillə HƏMAS arasında müharibənin başlamasından düz altı ay sonra hökumətə müraciətində göstərib.

Netanyahunun sözlərinə görə, HƏMAS-ın 24 batalyonundan 19-u məhv edilib.

Son məlumata görə, Livanın şiə Hizbullah hərəkatı İsrail Müdafiə Qüvvələrinin Qolan təpələrindəki raket və hava hücumundan müdafiə qərargahına hücum edib.

"Livan İslami Müqavimətinin döyüşçüləri bazar günü Kaila kazarmasının ərazisindəki hava və raket hücumundan müdafiə komandanlığının qərargahına, həmçinin Yoavdakı raket və artilleriya bazasına hücum edib", deyə Hizbullah bildirib.

Hücum üçün "Katyuşa" raketlərindən istifadə olunduğu və bunun səbəblərinin İsrail əsgərlərinin Bekaa vadisinə hücumu, həmçinin fələstinlilərə qarşı təzyiqlər olduğu aydınlaşdırılır.

Aydın