UEFA İcraiyyə Komitəsi həmçinin 2028/29 mövsümündən etibarən UEFA Millətlər Liqasının dörd deyil, üç liqadan ibarət olmasını nəzərdə tutan və 2026-cı ilin mayında təsdiqlənmiş yeni modelə mərhələli keçidi təmin etmək məqsədilə UEFA Millətlər Liqasının 2026/27 mövsümündə yüksəlmə və aşağı liqaya düşmə sistemində bəzi dəyişiklikləri təsdiqləyib.

“Allianz Arena”: Final Münhenə qayıdır

UEFA qitə klub futbolunun ən mühüm qarşılaşması olan Çempionlar Liqasının gələcəyi ilə bağlı müzakirələrə son qoyub. UEFA 2028 və 2029-cu illərdə UEFA Çempionlar Liqasının finalına ev sahibliyi edəcək iki stadionu rəsmən açıqlayıb. Bu seçim Almaniyanın zəngin futbol tarixini İspaniyanın yeni layihəsi ilə birləşdirir.

Qəbul edilən qərara əsasən, Münhendəki “Allianz Arena” 2028-ci il finalına, Barselonadakı yeni “Camp Nou” isə 2029-cu il finalına ev sahibliyi edəcək.

Çempionlar Liqasının finalı uzun illərdən sonra “Bavariya” klubunun əzəmətli stadionuna qayıdır. 75 mindən çox tamaşaçı tutumuna malik “Allianz Arena” daha əvvəl “Bavariya” ilə “Çelsi” arasında keçirilən məşhur 2012-ci il finalına ev sahibliyi edib. Stadion möhtəşəm atmosferi və işıqlandırılmış fasadı ilə tanınır.

Münhenin 2028-ci il üçün seçilməsi Almaniyanın yüksək səviyyəli infrastrukturunun və “AVRO-2024”ə ev sahibliyi zamanı əldə etdiyi uğurun taclandırılması kimi qiymətləndirilir.

Yeni “Camp Nou”: Açılışdan sonra ən böyük tədbir

Ən böyük tədbir isə 2029-cu ildə keçiriləcək. Tamamilə yenilənmiş “Camp Nou” stadionu Çempionlar Liqasının finalına ev sahibliyi edəcək.

Bu final stadionun tutumunu 105 mindən çox tamaşaçıya çatdıracaq nəhəng yenidənqurma işləri başa çatdıqdan sonra keçirilməsi planlaşdırılan ilk beynəlxalq səviyyəli tədbir olacaq. Bununla da stadion Avropanın ən böyük arenasına çevriləcək.

Çempionlar Liqası finalının Barselonaya qayıtması “Camp Nou”da “Mançester Yunayted” ilə “Bavariya” arasında keçirilən tarixi 1999-cu il finalından sonra ilk dəfə baş tutacaq. Bu tədbir həm də yeni Kataloniya layihəsinin beynəlxalq səviyyədə təqdimatı olacaq.

UEFA bu qərarla qarşıdakı iki finalın xəritəsini müəyyənləşdirib və Avropa futbol azarkeşlərinə qitənin ən coşqulu və əzəmətli iki stadionunda iki möhtəşəm final vəd edib.

Niderland üçün Avropada ilk

UEFA Super Kuboku 2027-ci ilin avqustunda “Johan Cruijff ArenA”da keçiriləcək. Beləliklə, Niderland tarixində ilk dəfə UEFA Super Kubokunun indiki formatında keçiriləcəyi ölkə olacaq. Avqustun 11-də Çempionlar Liqası və Avropa Liqasının qalibləri Amsterdamda qarşılaşacaqlar.

Bu final 1997-ci ilə qədər iki oyunlu formatda keçirilirdi. 1998-ci ildən etibarən isə UEFA Super Kubokunun qalibi bir qarşılaşmada müəyyənləşir. Niderland Kral Futbol Assosiasiyası bu beynəlxalq futbol tədbirini “UEFA”, Amsterdam bələdiyyəsi və “Johan Cruijff ArenA” ilə birgə təşkil edəcək.

KNVB-nin baş katibi Geys de Yonq UEFA Super Kubokunun Niderlanda gəlməsindən böyük məmnunluq duyduğunu bildirib.

“Bu formatda turnir daha əvvəl heç vaxt Niderlandda keçirilməyib. Buna görə də bu qarşılaşmanı ilk dəfə ölkəmizə gətirə biləcəyimiz üçün çox şadıq. İdman baxımından bu, Avropa klub futbolunun təqdim edə biləcəyi ən yüksək səviyyəli tədbirlərdən biridir və azarkeşlər üçün də möhtəşəm hadisə olacaq”, deyə o bildirib.

Amsterdam bələdiyyəsinin idman və hərəkətlilik məsələləri üzrə məsul üzvü Sofyan Mbarki Avropa futbol qurumunun paytaxtı 2027-ci ilin avqustunda keçiriləcək finalın ev sahibi şəhəri seçməsini böyük şərəf adlandırıb.

“Bir şəhər olaraq iki Avropa çempionu arasındakı bu final qarşılaşmasına ev sahibliyi etməyimiz necə də gözəldir. Ümid edirəm ki, bu, Amsterdamda yaşayan çoxsaylı uşaqlara ilham verəcək və onları top götürüb küçəyə çıxmağa həvəsləndirəcək”, deyə Mbarki bildirib.

“Johan Cruijff ArenA”nın baş direktoru Tanya Dik də seçimdən qürur duyduğunu bildirib.

“30 illik yubileyimizi qeyd etdiyimiz ili Avropa klub futbolunun zirvəsini qəbul etməklə başa vuracağıq. Avropanın müxtəlif ölkələrindən gələcək futbolçuları, azarkeşləri və qonaqları “Johan Cruijff ArenA”da səmimiyyətlə qarşılamaq üçün səbirsizlənirik”, deyə o qeyd edib.

2027-ci ildə UEFA Super Kubokuna biletlərin satışının necə həyata keçiriləcəyi hələ məlum deyil. KNVB bu barədə məlumatın daha sonra açıqlanacağını bildirib.

Aydın