100 yaş həddini keçmiş insanlar sağlam və aktiv qalmağın sınaqdan çıxmış sirlərini bölüşüblər. Onların sözlərinə görə, belə möhtəşəm yaşda belə həyatdan tam zövq almaq, idmanla məşğul olmaq və kənar yardımdan imtina etmək mümkündür.

Qaynarinfo xəbər verir ki, bu barədə “TODAY.com” məlumat yayıb.

108 yaşlı Syuzan Yanq Braun hesab edir ki, onu formada saxlayan məhz idmandır. O, hər səhər döşəmədə müxtəlif hərəkətlər edir, dartınma və müvazinət məşqləri ilə məşğul olur.

“Mən ayağa qalxıram, divarın yanında dayanıb ayaqlarımı hərəkət etdirirəm. Ayaqlarımın mütləq yük almasına diqqət edirəm”, deyə Braun bildirib.

Qadın Delaver ştatında tək yaşayır, əsadan istifadə etmir və hələ də avtomobil idarə edir.

İsti ənənələr və ünsiyyət

101 yaşlı Con Kerroll və onun 100 yaşlı həyat yoldaşı Cerri artıq 80 ildir birlikdədirlər və aktiv sosial həyat sürürlər. Onların dəyişməz ənənəsi hər cümə günü “McDonald’s”da səhər yeməyi yeməkdir. Bu həftəlik ritual onlara müxtəlif yaşlarda olan dostları ilə görüşmək, tanışları görmək və bir fincan qəhvə ətrafında rahat söhbət etmək imkanı verir.

“Əsas məsələ özünü təcrid etməməkdir”, deyə Cerri məsləhət görür.

148 tədqiqatın təhlili göstərib ki, güclü sosial əlaqələr uzunömürlü olma ehtimalını 50 faiz artırır, psixi sağlamlığı qoruyur və orqanizmdə iltihabi proseslərin səviyyəsini azaldır.

Gündəlik rasionda göyərti

105 yaşlı veteran Dominik Kritelli saksofonda ifa edir və vaxtilə öz əlləri ilə tikdiyi evin işlərini də müstəqil görür. O, uşaqlıqdan Aralıq dənizi mətbəxinə uyğun qidalanır və zəncirotu yarpaqlarını xüsusilə sevir.

“Mən bunu bütün həyatım boyu yemişəm. Kim bilir, bəlkə də məhz bunun sayəsində daha uzun yaşayırsan”, deyə uzunömürlü insan bildirib.

Alimlər xatırladırlar ki, yaşıl yarpaqlı tərəvəzlər beynin yaşla bağlı zəifləməsini ləngidir və A, C, E, K və B vitaminləri ilə zəngindir.

Mənfilikdən uzaq durmaq

100 yaşlı Eleyn LaLann, fitnes mütəxəssisi Cek LaLannın dul həyat yoldaşı, optimizmin ürəyi qoruduğuna əmindir.

“Mən çox pozitiv insanam və heç nəyin məni kədərləndirməsinə imkan vermirəm. İnsanlar mənfilikdən qurtulsaydılar, daha xoşbəxt olardılar”, deyə qadın vurğulayıb.

O, həyat yoldaşının həmişə belə dediyini xatırlayır: “Bu evdə mənfilikdən danışılmır”.

Divanda oturmaq əvəzinə sevimli iş

101 yaşlı Enn Anciolotti onilliklərdir Nyu-Cersidə öz zərgərlik mağazasını idarə edir və tam istirahətə üstünlük vermir.

“Bu, mənə yataqdan qalxmaq, duş qəbul etmək, geyinmək, makiyaj etmək, özümü səliqəyə salmaq və işimdən zövq almaq üçün səbəb verir. Bu, başdan-başa sevincdir”, deyə o izah edib.

Ekspertlərin fikrincə, həyatın mənasını mütləq biznesdə axtarmaq lazım deyil. Könüllülük, bağçılıq və ya ev heyvanına qulluq da insan üçün həyat məqsədinə çevrilə bilər.

Bayramı səbirsizliklə gözləmək

Rut Kundsin 103 yaşında belə məşqçi ilə idman zalında məşqlərini davam etdirib. Onun sirri qarşıda həmişə sevindirici bir hadisə planlaşdırmaqdır.

“Bir şeyi səbirsizliklə gözləmək çox vacibdir. Qarşıda heç nə yoxdursa, həyat boz və darıxdırıcı olur. Amma mənim həmişə gözlədiyim nəsə olur. Səbəb yoxdursa, onu özüm yaradıram, məsələn, məclis təşkil edirəm. Bilirəm ki, özümü nə qədər pis hiss etsəm də, tezliklə yenidən yaxşı olacağam”, deyə qadın bildirib.

Xırda şeylərə görə narahat olmamaq

101 yaşlı Cokleta Vilson ABŞ-da “Home Depot” ticarət şəbəkəsinin ən yaşlı əməkdaşı kimi tanınıb. Onun həyat prinsipi əsəblərini qorumaqdır.

“Mən həmişə deyirəm: xırda şeylərə görə narahat olmayın. Təşvişə düşməyin. Heç nəyin sizi özünüzdən çıxarmasına imkan verməyin. Qəzəb həddindən artıq enerji aparır və həyatınızın ən gözəl anlarını əlinizdən alır”, deyə uzunömürlü qadın xəbərdarlıq edib.

Aydın