Dünyada idman turizminə maraq sürətlə artır. Getdikcə daha çox səyahətçi istirahət üçün məkan seçərkən həmin istiqamətdə keçirilən idman tədbirlərini və aktiv fəaliyyət imkanlarını da nəzərə alır. "Sportcation” – idman və səyahətin bir araya gəldiyi bu yeni tendensiyanın populyarlığının artması fonunda, sənaye hesabatlarına görə, son bir il ərzində idmanla əlaqəli fəaliyyətlər üzrə bronların sayı təxminən 37 faiz artıb. Bu göstərici idman yönümlü səyahətlərə olan marağın davamlı şəkildə yüksəldiyini göstərir.

Beynəlxalq idman tədbirlərinin aparıcı məkanlarından biri kimi tanınan İstanbul 2026-cı ildə də zəngin idman təqvimi ilə diqqət çəkir. May ayında UEFA Avropa Liqasının finalına ev sahibliyi edən şəhərdə avqust və sentyabr aylarında 2026-cı il Qadınlar arasında Avropa Voleybol Çempionatı keçiriləcək. Sentyabrda "Tour of İstanbul” və "Tour de France” çərçivəsində "L’Étape Türkiye” veloyarışları, oktyabr və noyabr aylarında isə Prezident Beynəlxalq Yat Yarışı təşkil olunacaq. Bu mötəbər tədbirlər dünyanın müxtəlif ölkələrindən peşəkar idmançıları və idman həvəskarlarını İstanbula bir araya gətirəcək.

Bu zəngin idman təqviminə daha bir mötəbər tədbir əlavə olunur. 23 avqust 2026-cı ildə İstanbulda 38-ci Bosfor Qitələrarası Üzgüçülük Yarışı keçiriləcək. Bosfor boğazının möhtəşəm mənzərəsi fonunda təşkil olunan bu unikal yarış iştirakçılara Asiyadan Avropaya üzərək keçmək imkanı yaradır. Dünyada qitələrarası açıq su üzgüçülüyü formatında keçirilən yeganə yarış olan tədbirdə minlərlə iştirakçının bir araya gəlməsi gözlənilir.

Asiya ilə Avropanı birləşdirən Bosfor boğazında keçirilən və iki qitə arasında üzgüçülük imkanı yaradan bu unikal açıq su yarışı hər yay minlərlə idmançı və tamaşaçını İstanbul sahillərinə cəlb edir. Dünya Açıq Su Üzgüçülüyü Assosiasiyası (WOWSA) tərəfindən "Dünyanın ən yaxşı açıq su üzgüçülük yarışı” adına layiq görülən ənənəvi tədbirdə bu il beş qitədən 2 500 yerli və xarici üzgüçü iştirak edəcək. Təxminən 6,5 kilometrlik marşrut İstanbulun Bosforun qarşı sahillərində yerləşən Kanlıca və Kuruçeşme rayonlarını birləşdirəcək.

Bosforun güclü axınlarına qarşı mübarizə aparan üzgüçülər yarış zamanı fiziki və psixoloji dözümlülüklərini sınayacaqlar. Bununla belə, 78 ölkədən gələn iştirakçılar üçün tədbirin cəlbediciliyi yalnız yarışın özündə deyil. İstanbulun möhtəşəm şəhər panoraması fonunda iki qitə arasında üzmək imkanı bu yarışı dünyada nadir rast gəlinən təcrübələrdən birinə çevirir.

İdmançılar yarış zamanı qitələri və mədəniyyətləri birləşdirən unikal səyahətə çıxarkən, sahil boyunca toplaşan tamaşaçılar da idmanın insanları bir araya gətirən gücünü nümayiş etdirən və uzun müddət yaddaşlarda qalacaq möhtəşəm mənzərənin şahidi olacaqlar.

İstanbul: İdmandan mədəniyyətə, ilin hər fəslində səyahət üçün ideal məkan

Minilliklərə söykənən zəngin tarixi irsi müasir şəhər həyatı, dünya şöhrətli qastronomiyası, dinamik incəsənət və mədəniyyət mühiti, eləcə də Bosforun valehedici mənzərələri ilə bir araya gətirən İstanbul hər il milyonlarla ziyarətçini özünə cəlb edir və onlara bənzərsiz təcrübələr yaşadır. 2026-cı ildə isə şəhər dünya səviyyəli tədbirlərin keçirildiyi qlobal mərkəz kimi əvvəlkindən daha çox diqqət çəkir. Möhtəşəm konsertlərdən və nüfuzlu incəsənət-mədəniyyət festivallarından tutmuş beynəlxalq səviyyəli idman yarışlarınadək İstanbulun tədbirlər təqvimi heç vaxt olmadığı qədər zəngindir. Bu da şəhərin məşhur görməli yerlərindən kənarda kəşf edilməsi üçün ziyarətçilərə saysız-hesabsız səbəb yaradır.

Ayasofyanın, Topqapı Sarayının və Bazilika Sarnıcının əsrlərdən süzülüb gələn əzəmətindən müasir incəsənət məkanlarına, canlı şəhər məhəllələrinə, zəngin qastronomiyasına və müxtəlif alış-veriş imkanlarına qədər İstanbul tarixi irslə müasir şəhər həyatını bənzərsiz şəkildə birləşdirir. İGA İstanbul Hava Limanı və Sabiha Gökçen Hava Limanı olmaqla iki beynəlxalq hava limanına malik şəhər dünyanın müxtəlif istiqamətləri ilə geniş hava əlaqəsini, beynəlxalq tədbirlərin təşkili üçün yüksək səviyyəli infrastrukturu və müxtəlif kateqoriyalara uyğun yerləşmə imkanlarını bir arada təqdim edir. Bu xüsusiyyətlər İstanbulun beynəlxalq tədbirlər üçün aparıcı istiqamətlərdən birinə çevrilməsini təmin edir.

Mədəni zənginlik, tədbirlərin təşkili sahəsində peşəkarlıq və yüksək səviyyəli idman infrastrukturu kimi üstünlüklərin vəhdəti İstanbulun beynəlxalq idman tədbirləri üçün dünyanın aparıcı məkanlarından biri kimi mövqeyini möhkəmləndirib. 2026-cı il şəhərin qlobal idman arenasındakı mövqeyini bir daha təsdiqləsə də, qarşıdakı illər İstanbul üçün daha böyük beynəlxalq tədbirlərlə yadda qalacaq. Şəhər 2027-ci ildə Formula 1® Türkiyə Qran-prisi və 4-cü Avropa Oyunları da daxil olmaqla, mühüm beynəlxalq idman tədbirlərinə ev sahibliyinə hazırlaşır.