Bildirilir ki, Fransada anomal isti keçən yay nəticəsində bölgədə tarixdə ən yüksək alkoqol tərkibli şampanın istehsal olunması mümkündür. İçkinin alkoqol faizi 15-ə çata bilər.

Adətən şampan istehsalçıları içkinin alkoqol tərkibini 13 faizlə məhdudlaşdıran ciddi qaydalara riayət etməlidirlər. Lakin bu dəfə Fransanın Mənşə və Keyfiyyət üzrə Milli İnstitutu normadan birdəfəlik kənara çıxmağa icazə verib.

“İqlim dəyişikliyi səbəbindən bu qeyri-adi məhsul yığımı, ehtimal ki, 10-15 ildən sonra normaya çevriləcək”, – Şampan Komitəsinin həmsədri Maksim Tubar bildirib.

Onun sözlərinə görə, yaranmış vəziyyət “gələcəyin şampanının necə olacağı barədə düşünməyə vadar etməlidir”.

2026-cı ildə Fransada müşahidələr tarixinin ən isti yayı qeydə alınıb. Alimlər vurğulayırlar ki, antropogen iqlim dəyişiklikləri ekstremal hava hadisələrini daha intensiv və daha tez-tez baş verən edir. Hazırda Avropa dünyanın ən sürətlə istiləşən qitəsidir.

Digər istehsalçılar alkoqol tərkibinin artmasının alıcıları şampandan uzaqlaşdıra biləcəyindən narahatlıqlarını bildiriblər. Son illərdə bazarda, əksinə, daha aşağı alkoqol tərkibli şərablara tələbat artır.

Kyui şəhərindən üçüncü nəsil şampan istehsalçısı Didye Jimonne “The Times”a bildirib ki, həddindən artıq güclü içki şampanın nüfuzuna zərər vura bilər.

“Bu, şampanın imicinə xələl gətirir. Alkoqol tərkibi 14 və ya 15 faiz olan şampan ideyası bir çox insanı çəkindirəcək”, deyə o bildirib.

Onun sözlərinə görə, istehsalçıların əksəriyyəti problemi müxtəlif illərin üzümündən hazırlanan şərab materiallarını qarışdırmaqla həll etməyə çalışacaq. Bununla da son məhsulun alkoqol tərkibini azaltmaq mümkün olacaq.

“Şampan həmişə assemblage – kupajdır. Ağıllı və balanslaşdırılmış birləşmə hər şeyi həll edəcək”, deyə Jimonne izah edib.

Bu il şampanın daha güclü olmasının səbəbi quraqlıq və aylarla davam edən isti hava şəraitində üzümün qeyri-adi dərəcədə çox şəkər toplamasıdır. Fermentasiya zamanı mayalar şəkəri spirtə çevirir. Bununla belə, mütəxəssislər problemin yalnız bəzi istehsalçılara təsir edəcəyini bildirirlər.

Verzen bölgəsindən Stefan Vinyonun sözlərinə görə, 15 faiz alkoqol tərkibli şərab materialını əvvəlki ilin 11 faizlik partiyası ilə qarışdırmaqla son məhsuldakı alkoqol səviyyəsini tənzimləmək mümkündür.

“Üzüm yığımından sonra orta göstərici 12 faizdən aşağıdır. Şampan bölgəsində bütün üzümçülər bu səviyyəni keçməyəcək”, deyə Şampan Komitəsinin həmsədri David Şatilyon bildirib.

Bu məhsuldan hazırlanacaq şampan butulkalarının mağaza rəflərində 2028-ci ildən tez görünəcəyi gözlənilmir. Bunun səbəbi şampan istehsalı üçün ən azı 15 aylıq fermentasiya prosesinin tələb olunmasıdır.

Yüksək temperatur səbəbindən hakimiyyət orqanları otlaqların istidən yanmasından sonra bir neçə növ pendirin istehsalı ilə bağlı sərt qaydaları da müvəqqəti olaraq yumşaldıb.

Məlumata görə, iqlim dəyişikliyinin təsiri yalnız Fransanın şampan istehsalı ilə məhdudlaşmır. Köpüklü şərab istehsalçıları İngiltərədəki üzüm bağlarına da diqqət yetirməyə başlayıblar. Ölkənin cənubunda yaranan iqlim şəraiti üzümçülük üçün daha əlverişli hesab olunur.

Belə ki, “Taittinger” şirkəti artıq Kent qraflığında üzüm bağına sahibdir, “Vranken-Pommery” isə Hempşirdə istehsal sahəsi açıb.

Aydın