ABŞ-da Böyük Kanyon ərazisində, Kolorado çayında qayıq turlarına qatılan turistlər səfərdən qayıtdıqdan sonra yüksək hərarət, şişkinlik və pnevmoniyaya bənzər əlamətlərlə xəstəxanaya yerləşdirilir. ABŞ Milli Park Xidməti hadisələrin səbəbini müəyyənləşdirmək üçün genişmiqyaslı araşdırmaya başlayıb.

Qayanrinfo xəbər verir ki, Arizona ştatında yerləşən və dünyanın ən məşhur təbiət məkanlarından biri hesab olunan Böyük Kanyonda son dövrlər gözlənilməz sağlamlıq problemi qeydə alınıb. Bölgədə təşkil olunan rafting turlarında iştirak edən bir çox şəxs səfərdən qayıtdıqdan qısa müddət sonra xəstəxanaya müraciət edib. Yoluxma hallarının artması fonunda ABŞ Milli Park Xidməti hadisə ilə bağlı geniş araşdırma aparır.

Kolorado çayında təşkil olunan qayıq turunda iştirak etmiş Metyu Vappetin yaşadıqları vəziyyətin ciddiliyini göstərir. O, evə qayıtdıqdan sonra dizində şişkinlik, yüksək hərarət və güclü oynaq ağrıları səbəbindən xəstəxanaya yerləşdirilib.

İlkin mərhələdə həkimlər onda stafilokok infeksiyasından şübhələnərək intensiv antibiotik müalicəsi tətbiq ediblər. Lakin bu müalicə problemi tam aradan qaldırmayıb. Sonradan ona sellülit diaqnozu qoyulub. Vappet artıq bir aydır davam edən yüksək hərarət və pnevmoniyaya bənzər ağır simptomlarla mübarizə aparır.

O, yaşadığı vəziyyəti eyni marşrut üzrə səyahət etmiş digər turistlərlə bölüşdükdən sonra tək olmadığını anlayıb. Məlum olub ki, rafting turunda iştirak etmiş azı daha beş nəfərdə oxşar əlamətlər müşahidə edilib.

İyunun ortalarında təşkil olunan və 16 nəfərin qatıldığı başqa bir turda isə dörd iştirakçıda yüksək hərarət, üşütmə və əzələ ağrıları qeydə alınıb. Xəstəxanaya yerləşdirilən bəzi şəxslərdə ağciyərlərdə maye toplanması və dəri səpgiləri də aşkarlanıb.

Rəsmi qurumlar araşdırmaları davam etdirsələr də, xəstəliyin dəqiq səbəbi hələ müəyyən edilməyib.

Hazırda mütəxəssislər bir neçə ehtimal üzərində işləyirlər. Onlardan biri torpaqdakı göbələk sporlarının tənəffüs yolu ilə orqanizmə daxil olması nəticəsində yaranan "vadi qızdırması"dır. Digər ehtimal isə çay sularında rast gəlinə bilən "Leptospira" bakteriyası ilə yoluxmadır.

Mütəxəssislər qeyd edirlər ki, xəstəlik həzm sistemini deyil, əsasən tənəffüs sistemi və dayaq-hərəkət aparatını zədələyir. Bundan əlavə, bütün yoluxma hallarının eyni çay marşrutu ilə əlaqəli olması xəstəliyin ətraf mühit amili ilə bağlı ola biləcəyini göstərir.

Səlahiyyətli qurumlar araşdırma yekunlaşana qədər əlavə məlumat verməkdən çəkinirlər. Bununla belə, Böyük Kanyonda baş verən bu sirli hadisələr yaxın vaxtlarda bölgəyə səfər etməyi planlaşdıran turistlər arasında narahatlıq yaradıb.

Aydın