Bir çox istifadəçi axşam 100 faiz enerji ilə şarj etdiyi smartfonunun səhərədək 5-12 faiz enerji itirməsi ilə qarşılaşır. Telefon istifadə edilməsə belə, batareyanın boşalmasına arxa planda işləyən xidmətlər, ekran parametrləri və mobil şəbəkənin zəif olması səbəb ola bilər.
Qaynarinfo xəbər verir ki, bu barədə UNİAN nəşri yazıb.
Materialda qeyd olunur ki, istifadəçilər gecə ərzində enerji itkisinin səbəbini əsasən batareyanın köhnəlməsində və ya tətbiqlərin arxa planda işləməsində görürlər. Lakin problem daha mürəkkəb ola bilər. Xüsusilə zəif mobil şəbəkə əhatəsi olan ərazilərdə telefonun əlaqəni qorumaq üçün davamlı axtarış aparması əlavə enerji sərfiyyatına gətirib çıxarır.
Müasir smartfonlarda ekran söndürüldükdən sonra prosessor aşağı enerji sərfiyyatı olan dərin yuxu rejiminə keçir. Buna görə də normal vəziyyətdə olan Android telefonunun 7-8 saatlıq gecə ərzində enerji itkisinin təxminən 1-3 faiz olması gözlənilir. İtki 5-10 faizi keçirsə, səbəblərdən biri sistem xidmətlərinin prosessoru mütəmadi olaraq aktivləşdirməsi ola bilər.
Gecə batareyanın enerjisi niyə azalır?
Enerji itkisinin səbəblərindən biri telefonun məkan təyinetmə funksiyasıdır. Android sistemi bəzi parametrlər aktiv olduqda, istifadəçi sürətli parametrlər menyusundan Wi-Fi və Bluetooth-u söndürsə belə, ətrafdakı şəbəkələri və Bluetooth cihazlarını axtarmağa davam edə bilər. Bu proses məkanın daha sürətli müəyyənləşdirilməsinə kömək etsə də, enerji sərfiyyatını artıra bilər.
Digər səbəb isə Always-On Display (AOD) funksiyasıdır. Bu xüsusiyyət ekran bağlı olduqda belə saatı, bildirişləri və digər məlumatları göstərir. OLED ekranlarda yalnız işıqlanan piksellər enerji sərf etsə də, AOD funksiyası aktiv olduqda batareyanın saatda 0,5-1,5 faiz boşalması mümkündür. Bu isə səkkiz saat ərzində 4-12 faiz enerji itkisinə səbəb ola bilər.
Telefonu gecə hansı məkanda saxlamaq da önəmlidir. Cihaz qalın beton divarların arxasında və ya mobil şəbəkənin zəif olduğu otaqda olduqda, baza stansiyası ilə əlaqəni qorumaq üçün daha çox enerji sərf edə bilər. UNİAN-ın materialında bu amilin bəzi hallarda gecə ərzində enerji sərfiyyatını 5-10 faiz artıra biləcəyi bildirilir. Telefonu pəncərəyə yaxın yerləşdirmək və dəstəkləndiyi halda Wi-Fi üzərindən zəng funksiyasından istifadə etmək problemi azaltmağa kömək edə bilər.
Gecə enerji itkisini necə azaltmaq olar?
Batareyanın daha az enerji sərf etməsi üçün bir neçə parametrə diqqət yetirmək tövsiyə olunur. İlk növbədə, telefonun məkan təyinetmə parametrlərində Wi-Fi və Bluetooth skanını söndürmək olar. Bu seçim cihazın modelindən və Android versiyasından asılı olaraq fərqli bölmələrdə yerləşə bilər.
Həmçinin AOD funksiyasını gecə saatlarında söndürmək və ya tamamilə deaktiv etmək məsləhətdir. Telefonun batareya parametrlərində hansı tətbiqlərin arxa planda daha çox enerji sərf etdiyini yoxlamaq, ehtiyac olduqda onların fəaliyyətini məhdudlaşdırmaq da faydalıdır.
Nəşrin məlumatına görə, bu dəyişikliklər bəzi hallarda gecə ərzində enerji itkisini 8-10 faizdən 1-2 faizə qədər azalda bilər. Bununla belə, nəticə telefonun modelindən, batareyanın vəziyyətindən, şəbəkə əhatəsindən və aktiv funksiyalardan asılıdır.
Şərhlər