“Liverpool” “Standard Chartered” dövrünün 17 il sonra başa çatması ilə əlaqədar kommersiya fəaliyyətində tarixi dəyişiklik elan edib. Klub “Türk Hava Yolları” ilə rekord məbləğdə – 300 milyon funt sterlinq dəyərində sponsorluq müqaviləsi imzalayıb. Bununla da məşhur qırmızı formanın sinəsində yeni sponsorun adı yer alacaq.

Qaynarinfo xəbər verir ki, müqavilə “Standard Chartered” ilə uzunmüddətli əməkdaşlığın başa çatmasını nəzərdə tutur və klubun Avropa futbolunda maliyyə baxımından ən yüksək pillələrdə qərarlaşmaq niyyətini ortaya qoyur.

“Liverpool” üçün dönüş nöqtəsi

“Liverpool” təsdiqləyib ki, “Türk Hava Yolları” 2027/28 mövsümündən etibarən klubun yeni əsas tərəfdaşı olacaq. “Daily Star”ın məlumatına görə, beşillik müqavilənin illik dəyərinin 60 milyon funt sterlinqdən çox olduğu təxmin edilir. Bu isə anlaşmanın ümumi dəyərini 300 milyon funt sterlinqə çatdırır.

Bu addımla “Liverpool” forma sinəsindəki sponsor kimi “Standard Chartered” ilə yollarını ayıracaq. Bununla belə, Londonda yerləşən bank klubdan tamamilə ayrılmayacaq. 2010-cu ildən əsas sponsor kimi fəaliyyət göstərən “Standard Chartered” bundan sonra qlobal tərəfdaş statusunda “Liverpool” ilə əməkdaşlığını davam etdirəcək.

“Standard Chartered” dövrünün sonu

“Liverpool”un kommersiya məsələləri üzrə direktoru Ben Latty dəyişikliklə bağlı açıqlamasında bunun klub üçün mühüm mərhələ olduğunu bildirib.

Latty klubun rəsmi saytına açıqlamasında deyib: “Bu, bizim üçün dönüş nöqtəsi olan bir elandır və 2027-ci ilin iyunundan etibarən “Türk Hava Yolları”nı klubumuzun əsas tərəfdaşı kimi qarşılamaqdan böyük məmnunluq duyuruq. “Liverpool” formasının ön hissəsi klubumuzun tarixində xüsusi yer tutur.

“Türk Hava Yolları” geniş beynəlxalq şəbəkəyə malik, bütün dünyada tanınan bir qurumdur. 2005-ci ildən qalan xüsusi xatirələr üzərində qurulan möhkəm təməllər əsasında tərəfdaşlığımıza başlamağı və birlikdə güclü münasibət qurmağı səbirsizliklə gözləyirik”.

Latty 17 illik əməkdaşlıqdan sonra əsas sponsor statusunu itirəcək “Standard Chartered”a da təşəkkür edib:

“Bu elan eyni zamanda “Standard Chartered”ın son 17 il ərzində “Liverpool”a verdiyi müstəsna töhfəni qiymətləndirmək üçün bir fürsətdir.

Onlar klub tarixinin qeyri-adi dövründə səyahətimizin mühüm hissəsi olublar. “Standard Chartered”ın 2027-ci ilin iyunundan etibarən qlobal tərəfdaş kimi “Liverpool” ailəsinin bir hissəsi olaraq qalmasından məmnunuq.

Bu keçidə hazırlaşarkən yeni mövsümü və 2027-ci ilin iyunundan etibarən “Türk Hava Yolları”nı klubumuzun əsas tərəfdaşı kimi qarşılamağı səbirsizliklə gözləyirik”.

Qlobal nəhəng “Enfild”ə qoşulur

“Türk Hava Yolları” daha əvvəl “Barcelona” və “Borussia Dortmund” kimi elit klublarla kommersiya tərəfdaşlığı qurub. Lakin “Liverpool”la əldə olunan anlaşma şirkətin forma üzərində əsas sponsor kimi ilk böyük addımı olacaq.

“Türk Hava Yolları”nın baş direktoru Əhməd Olmuştür deyib: “Liverpool Football Club” müstəsna irsə və həqiqətən qlobal azarkeş kütləsinə malik dünyanın ən tanınmış və ən hörmət edilən futbol klublarından biridir.

“Türk Hava Yolları”nın klubun əsas tərəfdaşı olmasından və adımızın dünya idmanının ən ikonik formalarından birində yer alacağından böyük məmnunluq duyuruq.

Digər bütün hava yollarından daha çox ölkəyə uçan aviaşirkət olaraq insanları, mədəniyyətləri və qitələri bir-birinə bağlamaq fəaliyyətimizin mahiyyətində dayanır. Bu tərəfdaşlıq beynəlxalq əhatə dairələri, mükəmməlliyə sadiqlikləri və bütün dünyada milyonlarla insana ilham vermək bacarıqları ilə seçilən iki qlobal brendi bir araya gətirir”.

Olmuştür tərəfdaşlığın daha geniş məqsədlərindən də danışıb:

“Bu anlaşma həmçinin “Türk Hava Yolları”nın qlobal idmana uzunmüddətli dəstəyində mühüm yeni mərhələdir. Biz idmanın sərhədləri aşmaq və cəmiyyətləri bir araya gətirmək baxımından unikal gücə malik olduğuna inanırıq.

Bu yeni mərhələyə başlayarkən “Liverpool” və onun dünyanın hər yerindəki azarkeşləri ilə birlikdə irəliləməyi səbirsizliklə gözləyirik”.

Aydın