Qəhvə dünyanın ən populyar içkilərindən biridir. Bir çox insan onu acqarına içir və heç bir problem hiss etmir, digərləri üçün isə bu vərdiş müəyyən narahatlıqlara səbəb ola bilər. Xüsusilə səhər yeməyindən əvvəl qəhvə içmək mədə-bağırsaq sistemində diskomfort və digər simptomlar yarada bilər.

Qaynarinfo xəbər verir ki, bu vərdişin mümkün təsirləri barədə "Very Well Health” üçün yazıda tibb bacısı Kerri Madorno danışıb.

Mədə turşuluğunun artması və mədə yanması riski

Qəhvə turş mühitə malik içkidir. Alimlərin fikrincə, onu acqarına qəbul etmək mədənin turşuluğunu artıra bilər. Həddindən artıq mədə turşusu selikli qişanı qıcıqlandırır və mədə yanmasına səbəb ola bilər.

"Mədə turşusu qida borusu ilə yuxarı qalxdıqda döş qəfəsində yanma hissi yaradır ki, bu da mədə yanması və ya reflüks adlanır. Kofein eyni zamanda qida borusu ilə mədə arasında yerləşən aşağı qida borusu sfinkterini boşaldır ki, bu da reflüksü gücləndirə bilər”, deyə materialda qeyd olunur.

Müəllif mədə yanmasından, qastroezofageal reflüks xəstəliyindən (GERX) və ya qıcıqlanmış bağırsaq sindromundan (QBS) əziyyət çəkən insanlara acqarına qəhvə içərkən ehtiyatlı olmağı tövsiyə edir. Bununla belə vurğulanır ki, hazırda acqarına qəhvə içməyin GERX-in yaranmasına və ya riskinin artmasına səbəb olduğunu sübut edən araşdırmalar yoxdur.

2014-cü ildə aparılmış tədqiqat göstərib ki, açıq qovrulmuş qəhvə tünd qovrulmuş qəhvə ilə müqayisədə mədə turşusunun daha çox ifrazına səbəb ola bilər. Buna görə də qəhvədən sonra mədə yanması hiss edirsinizsə, daha tünd qovrulmuş növlərə keçmək faydalı ola bilər.

Kofeinin daha sürətli sorulması

Kofein təbii stimulyatordur və narahatlıq, əsəbilik hissi yarada bilər. Qəhvə acqarına içildikdə kofein daha tez sorulur. Yan təsirlərin riskini azaltmaq üçün qəhvəni yeməklə birlikdə qəbul etmək tövsiyə olunur.

Araşdırmalar göstərir ki, həddindən artıq kofein qəbulu təşviş, ürək döyüntüsünün sürətlənməsi və narahatlıq yarada bilər. Bu vərdiş həmçinin baş ağrısı və arterial təzyiqin yüksəlməsinə səbəb ola bilər.

"Qəhvə istehlakı artan təşviş riski ilə əlaqələndirilir. Qeyd etmək vacibdir ki, qəhvə ilə təşviş arasında əlaqə aşkar edən tədqiqatlar gündə altı fincandan çox qəhvə içən insanlara əsaslanır”, deyə materialda izah olunur.

Həkimlər gündəlik kofein qəbulunu 400 milliqramla məhdudlaşdırmağı məsləhət görürlər. Bu, təxminən dörd-beş kiçik fincan qəhvəyə bərabərdir. Bundan əlavə, yatmazdan əvvəl acqarına qəhvə içmək tövsiyə edilmir, çünki böyüklərdə kofeinin təsiri yeddi saata qədər davam edə bilər.

Müəllif hamiləlik dövründə qəhvə istehlakına da toxunur. Onun sözlərinə görə, kofein plasenta vasitəsilə dölə keçə və onun sağlamlığına təsir göstərə bilər. Buna görə də gələcək analara gündə bir-iki fincan qəhvə ilə kifayətlənmək tövsiyə olunur.

Həzm problemləri

Bəzi insanlarda acqarına qəhvə içmək həzm problemlərini gücləndirə bilər. Bu, qarında köp, spazmlar, ürəkbulanma, mədə yanması və ya ishal şəklində özünü göstərə bilər.

Hormonal dəyişikliklər

Müəllif qeyd edir ki, acqarına qəhvə içmək orqanizmdə hormonal dəyişikliklərə səbəb ola bilər. Araşdırmalara görə, kofein stress hormonu adlandırılan kortizolun ifrazını stimullaşdırır.

"Kortizol maddələr mübadiləsini və arterial təzyiqi tənzimləyir. Onun yüksək səviyyəsi təşviş, əsəbilik və yuxu problemləri riskini artıra bilər. Uzun müddətdə isə yüksək kortizol səviyyəsi ürək xəstəliklərinə və sümük kütləsinin azalmasına gətirib çıxara bilər”, deyə Kerri Madorno izah edib.

Aydın