28 iyun 2026-cı ildə Los-Ancelesdəki "Peacock Theater"də keçirilən BET Awards mərasimi musiqi sənayesinin ən nüfuzlu tədbirlərindən biri olmaqla yanaşı, builki moda tendensiyalarının da nümayiş meydanına çevrildi. Mərasimdə mükafat qazanan sənətçilərlə yanaşı, qırmızı xalçadakı görünüşlər də sosial şəbəkələrdə və ABŞ moda mediasında geniş müzakirə olundu.

Qaynarinfo xəbər verir ki, ABŞ nəşrlərinin ümumi qənaətinə görə, builki BET Awards qırmızı xalçası əvvəlki illərin parıltılı və maksimalist yanaşmasından uzaqlaşaraq daha memarlıq üslublu siluetlərə, teksturalı parçalara və dərin torpaq çalarlarına üstünlük verdi. Bordo, şokolad, qara və mis tonları gecənin dominant rəngləri idi. Stilistlər parıltı effektini daş-qaşdan daha çox biçim və material seçimi vasitəsilə yaratmağa çalışıblar.

Gecənin ən çox danışılan görünüşlərindən birini Teyana Teylor (Teyana Taylor) təqdim etdi. "Stephane Rolland” moda evi üçün xüsusi hazırlanmış bordo libas yüksək moda nümayişini xatırladırdı. Güclü çiyin xətti, korset konstruksiyası və baş geyimi onun görünüşünü adi qırmızı xalça üslubundan daha çox haute couture* təqdimatına bənzədirdi. ABŞ mətbuatı bu seçimi gecənin ən uğurlu görünüşlərindən biri kimi qiymətləndirdi.

Doçi (Doechii) isə tamamilə fərqli istiqamət seçdi. Reper "Dsquared2” brendinin əl işi təsiri yaradan toxuma libasında həm bohem, həm də futuristik estetikanı birləşdirdi. Yan kəsiklər, təbii teksturalı material və sadə topuz saç düzümü diqqətin geyimə yönəlməsinə imkan verdi. Moda şərhçiləri bu görünüşü son illərin ən orijinal BET Awards seçimlərindən biri adlandırıblar.

Lizzo yenə də cəsarətli seçimindən geri qalmadı. Şəffaf qəhvəyi libas bədən siluetini ön plana çıxarırdı. Bunun əksinə olaraq, uzun platin sarısı buruqlar və yumşaq bronz makiyaj görünüşün sərtliyini balanslaşdırırdı. ABŞ əyləncə mediasında onun seçimi gecənin ən çox müzakirə olunan görünüşlərindən biri oldu.

Kvin Lətifə (Queen Latifah) isə diqqət çəkmək üçün mütləq parlaq rənglərə ehtiyac olmadığını nümayiş etdirdi. Aktrisanın iri ölçülü, teksturalı qara palto ilə tamamladığı klassik görünüş dəbdəbəni sakit və təmkinli şəkildə təqdim edirdi. Hörüklü topuz, iri qızılı sırğalar və qırmızı dodaq boyası üslubu klassik Hollivud estetikasına yaxınlaşdırırdı.

Kardi Bi (Cardi B) bu dəfə geyimindən daha çox yeni görünüşü ilə diqqət çəkdi. Alov qırmızısı saç rəngi, çoxqatlı korset və bənövşəyi çəkmələr onun qırmızı xalçanı səhnə performansının davamına çevirdiyini göstərirdi. ABŞ mətbuatı bunu reperin son illərdəki ən radikal stil dəyişikliklərindən biri kimi qiymətləndirdi.

Xlo Beyli (Chlöe Bailey) isə tamamilə fərqli xətt seçərək köhnə Hollivud estetikasına müraciət etdi. Parlaq qara-gümüş libas, platin sarısı bob saç düzümü və brilyant zinət əşyaları onun görünüşünə zamansız eleqantlıq bəxş edirdi.

Kiki Palmer (Keke Palmer) zəriflik və müasirliyi bir araya gətirən görünüşlərdən biri ilə seçildi. Kristallarla işlənmiş bir çiyinli libas, mis rəngli uzun hörüklər və minimal makiyaj onun üslubunu sadə, lakin təsirli göstərirdi.

Kehlani (Kehlani) dərin bordo rəngli drapajlı libası ilə qırmızı xalçanın ən harmonik görünüşlərindən birini təqdim etdi. Ortadan ayrılmış saç düzümü, yumşaq makiyaj və minimum aksessuar seçimi diqqəti geyimin memarlıq elementlərinə yönəldirdi.

Koko Cons (Coco Jones) al-qırmızı rəngə üstünlük verən azsaylı ulduzlardan idi. İki hissədən ibarət libasın dərin kəsikləri və axıcı ətəyi klassik qırmızı xalça estetikasını müasir üslubda təqdim edirdi.

Codi Törner-Smit (Jodie Turner-Smith) isə yenə də eksperimental modaya sadiq qaldı. Abstrakt naxışlı rəngarəng libas, opera əlcəkləri və həcmli buruqlar onun görünüşünü gecənin ən teatral seçimlərindən birinə çevirdi.

Ayaqqabılar builki BET Awards-da əsas vurğu elementi olmadı. Uzun libasların böyük hissəsi ayaqqabıları gizlətsə də, moda nəşrləri ulduzların əksəriyyətinin iti burunlu stiletto və ya platformalı hündürdaban modellərə üstünlük verdiyini qeyd edir. Aksessuarlarda isə iri sırğalar, heykəltəraş formalı bilərziklər və sayca az, lakin iri ölçülü zinət əşyaları diqqət çəkirdi.

Saç düzümü tendensiyalarında da təbiilik üstünlük qazandı. Hamar topuzlar, yumşaq dalğalar, təbii buruqlar və uzun hörüklər qırmızı xalçanın əsas xəttini müəyyənləşdirdi. Ağır laklı konstruksiyalar və həddindən artıq mürəkkəb saç düzümləri əvvəlki illərlə müqayisədə xeyli az idi.

Ümumilikdə, BET Awards 2026-nın qırmızı xalçası nümayiş etdirdi ki, bu mövsüm dəbdəbə artıq yalnız parıltı ilə deyil, biçim, tekstura və fərdi üslub vasitəsilə ifadə olunur. ABŞ moda mediasının ümumi qiymətləndirməsinə görə, builki mərasim son illərin ən balanslı və zövqlü qırmızı xalçalarından biri kimi yadda qaldı.

GECƏNİN QALİBLƏRİ

Qeyd edək ki, BET Awards 2026-da gecənin ən böyük qaliblərindən biri Kendrik Lamar (Kendrick Lamar) olub. Reper "İlin albomu" (GNX), "Ən yaxşı kişi hip-hop ifaçısı", "İlin videosu" (Not Like Us) və "İlin rejissoru" (Deyv Fri ilə birlikdə) daxil olmaqla bir neçə mükafata layiq görülüb.

SZA "Ən yaxşı qadın R&B/pop ifaçısı", Kris Braun (Chris Brown) "Ən yaxşı kişi R&B/pop ifaçısı", Doçi "Ən yaxşı qadın hip-hop ifaçısı", Leon Tomas (Leon Thomas) isə "Ən yaxşı yeni sənətçi" seçilib. "Ən yaxşı qrup" nominasiyasında Fyuçer və Metro Bumin (Future & Metro Boomin), "Ən yaxşı film" nominasiyasında isə "The Six Triple Eight" qalib gəlib.

İdman nominasiyalarında Ceylen Herts (Jalen Hurts) "İlin idmançı kişisi", Eyncel Riz (Angel Reese) isə "İlin idmançı qadını" seçilib. Gecədə həmçinin xüsusi mükafatlar təqdim olunub. Mariya Keri (Mariah Carey), Ceymi Foks (Jamie Foxx), Kirk Franklin (Kirk Franklin) və Snup Doq (Snoop Dogg) "Ultimate Icon Award" mükafatına layiq görülüblər.

Cavid

*Haute couture (fransızca: haute couture – "ot kutür") ən yüksək səviyyəli, əl işi ilə hazırlanan və fərdi sifariş əsasında tikilən lüks modanı ifadə edən termindir.

Bu termin hər bahalı geyimə aid edilmir. Fransada haute couture hüquqi cəhətdən qorunan addır və ondan yalnız Parisdə Chambre Syndicale de la Haute Couture tərəfindən təsdiqlənmiş moda evləri istifadə edə bilər. Məsələn, Chanel, Dior, Schiaparelli və Giambattista Valli rəsmi haute couture kolleksiyaları təqdim edən moda evləridir.