Cənubi Koreyanın İnçxon hava limanı ilk dəfə beynəlxalq sərnişin daşımalarının həcminə görə dünyanın ən işlək hava limanına çevrilib.
Qaynarinfo xəbər verir ki, Seuldan təxminən 48 kilometr məsafədə yerləşən İnçxon ölkənin əsas hava qapısı hesab olunur.
Beynəlxalq Hava Limanları Şurasının (ACI) ilkin məlumatlarına əsasən, 2026-cı ilin ilk altı ayında hava limanı 38,39 milyon beynəlxalq sərnişinə xidmət göstərib. Bu göstəricilər ACI-nin dünya hava limanlarında sərnişin axınına dair sentyabrda dərc ediləcək aylıq hesabatında təsdiqlənəcək.
İkinci yerdə 37,79 milyon sərnişinlə Londonun Hitrou hava limanı qərarlaşıb. Sinqapurun Çanqi hava limanı isə 34,53 milyon sərnişinlə üçüncü olub.
Cənubi Koreyanın hava limanında sərnişin axınının artması qismən Yaxın Şərqdəki münaqişə ilə əlaqələndirilir.
ABŞ və İran arasındakı müharibənin yaratdığı nəqliyyat problemləri sərnişin axınının əsas tranzit hava limanlarından, o cümlədən Dubaydan uzaqlaşmasına səbəb olub. Bunun əvəzinə Şərqi Asiya üzərindən keçən marşrutlarda sərnişinlərin sayı artıb.
Yonhap xəbər agentliyinin "İnçxon Beynəlxalq Hava Limanı Korporasiyası"na istinadən yaydığı məlumata görə, bu ilin ilk yarısında İnçxondakı tranzit sərnişinlərin sayı ötən ilin eyni dövrü ilə müqayisədə 18,1 faiz artaraq 4,24 milyona çatıb.
Avropanı son təyinat məntəqəsi kimi seçən tranzit sərnişinlərin sayı isə illik ifadədə 63,2 faiz artaraq 210 min nəfər olub.
2001-ci ildə fəaliyyətə başlayan İnçxon hava limanı 101 aviaşirkətə xidmət göstərir. Bu şirkətlər 183 şəhərə, o cümlədən 158 beynəlxalq istiqamətə uçuşlar həyata keçirir.
2024-cü ildə başa çatdırılan genişləndirmə layihəsi hava limanının illik sərnişin qəbul etmə qabiliyyətini 106 milyon nəfərə çatdırıb.
İnçxon ilk dəfə beynəlxalq sərnişin axını üzrə dünya reytinqində birinci pilləyə yüksəlib. 2002-ci ildə hava limanı dünyada 10-cu, 2018-ci ildə beşinci, 2024 və 2025-ci illərdə isə üçüncü yerdə qərarlaşıb.
2024 və 2025-ci illərin illik statistikasında ikinci yeri tutan Dubay Beynəlxalq Hava Limanının isə proqnozlara görə bu il ilk beşliyə daxil olmayacağı gözlənilir.
Bundan əvvəl ACI-nin məlumatları Londonun Hitrou hava limanının ümumi sərnişin sayına görə İstanbul hava limanını geridə qoyaraq Avropanın ən işlək hava limanı olduğunu təsdiqləyib.
İyul ayında Britaniya hava limanının terminallarından 7,9 milyon sərnişin keçib. İstanbul hava limanında isə bu göstərici 8,15 milyon olub.
Aydın
Şərhlər