Fransada yüzlərlə supermarketin soyuducu sistemlərinə edilən kiberhücum nəticəsində soyuducuların və dondurucuların temperaturu 50 dərəcəyədək yüksəlib.

Qaynarinfo-nun Al Jazeera-yə istinadla verdiyi xəbərə görə, bu, ərzaq məhsullarının xarab olmasına və bir neçə mağazada yanğınların baş verməsinə səbəb olub.

“Intermarché”, “Cooperative U”, “E.Leclerc” və digər iri ticarət şəbəkələri bazar ertəsi bu mürəkkəb kiberhücumu təsdiqləyiblər.

Pərakəndə satış şəbəkələrinin AFP xəbər agentliyinə verdiyi məlumata görə, “Intermarché” və ona məxsus “Netto” brendinin ən azı 300 mağazası, eləcə də “Cooperative U” şəbəkəsinin 100-dən çox mağazası hədəfə alınıb.

“Carrefour” 80 supermarketinin zərər çəkdiyini açıqlayıb. “Monoprix” isə təxminən 490 mağazasının 5 faizinin hücumdan təsirləndiyini bildirib. “E.Leclerc” də bir neçə mağazasının hədəfə alındığını açıqlayıb.

Paris prokurorluğu bildirib ki, “genişmiqyaslı” hücum Fransanın bir neçə iri ərzaq ticarəti şəbəkəsində internetə qoşulmuş soyuducu sistemlərinə təsir edib. Nəticədə ərzaq məhsulları xarab olub və yanğınlar baş verib.

Baş nazir Sebastyen Lekornu hücumdan sonra Fransanın Milli Kibertəhlükəsizlik Agentliyinə (ANSSI) araşdırma aparmağı tapşırıb. Bu barədə onun aparatındakı mənbə “Reuters” agentliyinə məlumat verib.

Mənbənin sözlərinə görə, Fransa digər Avropa ölkələri ilə koordinasiyalı şəkildə çalışır, çünki həmin ölkələr də hücumdan zərər çəkmiş ola bilər. Müvafiq qurumlar digər Fransa şirkətlərinin də risk altında olub-olmadığını qiymətləndirirlər.

Mürəkkəb kiberhücum

Sektor üzrə ümumi itkilərin məbləği hələ açıqlanmayıb. Lakin “Intermarché”nin baş direktoru Tyeri Kotilyar BFM TV-yə bildirib ki, bu “mürəkkəb” hücum ölkə üzrə cəmi bir gündə “on milyonlarla avro” itkiyə səbəb olacaq.

BFM TV-nin məlumatına görə, hakerlər bir çox mağazada soyuducu sistemlərinin buzunu əritmə rejimini uzaqdan məcburi şəkildə işə sala biliblər. Bu isə “təzə və dondurulmuş məhsul ehtiyatlarının məhv olmasına” səbəb olub.

“Intermarché” AFP-yə bildirib ki, hücumdan təsirlənən mağazalar bütün təzə və dondurulmuş məhsulları atmalı olacaqlar.

“Cooperative U”nun icraçı direktoru Dominik Şelşer bildirib ki, hücum bazar günü gecəsindən etibarən soyuducu sistemlərinin işini pozub.

"Təzə məhsulların saxlanması və fransızların ərzaq təchizatı üçün vacib olan avadanlığın hədəfə alınması çox ciddi və indiyədək baş verməmiş hadisədir. Bu, qəbuledilməzdir", – o, “X” sosial şəbəkəsində yazıb.

O, şirkətin əməkdaşlarının normal iş rejimini mümkün qədər tez bərpa etməyə çalışdıqlarını və hücumun bütün təfərrüatlarını aydınlaşdırmaq üçün araşdırma aparılmalı olduğunu bildirib.

Supermarketlərin soyuducu bölmələri adətən mağazadakı bütün soyuducuları idarə edən və internet vasitəsilə qoşulmaq mümkün olan idarəetmə panelləri ilə işləyir. Bu, texniki xidmət şirkətlərinə sistemləri istənilən yerdən tənzimləməyə imkan verir.

Lekornuya yaxın mənbə bildirib ki, ANSSI Danimarkanın “Danfoss” şirkətinin təqdim etdiyi proqram təminatında təhlükəsizlik boşluğu aşkar edib.

“Danfoss” Fransada məhdud sayda soyuducu idarəetmə sisteminə təsir edən hadisələrdən xəbərdar olduğunu bildirib.

Şirkət əlavə edib ki, təsirlənən sistemlər “köhnəlmiş proqram təminatı ilə işləyirdi”. Şirkət uzun müddətdir ki, müştərilərinə sistemlərini yeniləməyi və köhnəlmiş avadanlıqları dəyişdirməyi tövsiyə edir.

Hücum rəqəmsal təhlükəsizlik şirkəti “Claroty”nin avqustun 9-da “Danfoss” sistemlərində zərərli müdaxilələrə imkan yaradan təhlükəsizlik boşluqları barədə araşdırma dərc etməsindən sonra baş verib.

Fransa Pərakəndə Ticarət Federasiyası (FCD) “Danfoss”dan “tam şəffaflıq” tələb edib.

Federasiya bildirib ki, hücumdan təsirlənən bəzi mağazalar artıq fəaliyyətini bərpa edib.

“Sekoia” kibertəhlükələrin aşkarlanması və araşdırılması şirkətinin baş kibertəhlükə analitiki Feliks Eym “Reuters” agentliyinə bildirib ki, İspaniya, Portuqaliya, Polşa, Almaniya və Belçika da hücumdan zərər çəkib.

Hücum avqustun sonlarında ABŞ-ın bir neçə hərbi ticarət obyektində soyuducu sistemlərində yaranan problemlərə bənzəyir. Həmin hadisələr də ərzaq itkilərinə səbəb olub.