Britaniya Bankının rəhbəri Endryu Beyli G20 ölkələrinin maliyyə nazirlərinə xəbərdarlıq edib ki, süni intellekt (AI) qlobal iqtisadi tənəzzülə səbəb ola və maliyyə sistemləri üçün ciddi kibertəhlükəsizlik riski yarada bilər.

Qaynarinfo BBC-yə istinadən xəbər verir ki, Beylinin sözlərinə görə, AI sektorunda artımın qəfil dayanması bütün dünyaya yayılan "gələcək bazar korreksiyasına" səbəb ola bilər.

O, bazar ertəsi ABŞ-ın maliyyə nazirlərinə ünvanladığı açıq məktubda dünya üzrə şirkətlərin "bir neçə şirkətin eyni vaxtda fəaliyyətinin pozulmasına səbəb ola biləcək" təhlükəsizlik insidentlərinə hazırlaşmalı olduğunu bildirib.

Bu ayın əvvəlində "Google", "Microsoft", "Anthropic" və "OpenAI" də daxil olmaqla 100 şirkət ölkələri və beynəlxalq qurumları AI kifayət qədər güclənərək mövcud müdafiə mexanizmlərini aşa biləcək səviyyəyə çatmazdan əvvəl kibermüdafiəni gücləndirməyə çağırıb.

Beyli G20 maliyyə nazirlərinə bildirib ki, yüksək qiymətləndirilən fond bazarları, investorların artan borclanması və vəsaitlərin az sayda iri texnologiya şirkətində cəmləşməsi gələcək bazar korreksiyasının təsirini daha da gücləndirə bilər.

"Problem təkcə investorların daha çox borclanması deyil. Borclanmanın yüksək qiymətləndirmələr və bazarın konsentrasiyası ilə, xüsusilə də süni intellekt şirkətləri ilə hipermiqyaslandırıcılar arasında artan qarşılıqlı investisiyalarla birləşməsi gələcək bazar korreksiyasının təsirini gücləndirə bilər", deyə Beyli bildirib.

Beyli maliyyə təhlükəsizliyinə cavabdeh şəxsləri qlobal miqyasda modellərin təhlükəsiz və məsuliyyətli şəkildə təqdim edilməsini və tətbiqini dəstəkləmək üçün "müvafiq tədbirlər" hazırlamağa çağırıb.

Beyli bu açıqlamanı beynəlxalq maliyyə nəzarət qurumu olan Maliyyə Sabitliyi Şurasının (FSB) sədri kimi verib. O, ABŞ-İran müharibəsinin yaratdığı enerji təchizatı şoklarının təsiri nəticəsində meydana gələn "dəyişkənlikdən" də narahatlığını ifadə edib.

Beylinin xəbərdarlığı Böyük Britaniya hökumətinin ölkənin "suveren AI" imkanlarını genişləndirməyə çalışdığı bir vaxta təsadüf edir. London xaricdən təqdim olunan xidmətlərdən asılılığı azaltmaq üçün yerli süni intellekt texnologiyalarının inkişaf etdirilməsini istəyir.

Hökumət şirkətlərin Milli Səhiyyə Xidmətində (NHS) növbələrin azaldılması, kibertəhlükəsizliyin və müdafiə imkanlarının gücləndirilməsi kimi problemlərin həlli üçün nəzərdə tutulan maliyyələşməyə çıxış uğrunda rəqabət aparmasını planlaşdırır.

Bununla yanaşı, AI şirkətlərinin bankların və maliyyə mərkəzlərinin təhlükəsizlik sistemlərini asanlıqla aşa bilən modellər hazırlaması ilə bağlı narahatlıqlar artır.

Bu ilin yayında "OpenAI", "Anthropic" və "Meta" öz süni intellekt alətlərinin nəzərdə tutulmayan hərəkətlər etdiyini nümayiş etdirib. Bəzi AI agentləri hətta təhlükəsizlik maneələrini keçmək üçün real insanların kimliyindən istifadə etməyə çalışıb.

Beylinin rəhbərlik etdiyi FSB maliyyə nazirliklərinin rəsmilərinə, banklara və qiymətli kağızlar üzrə tənzimləyicilərə nəzarət edən qlobal qurumdur. Şuraya ABŞ, Böyük Britaniya, Fransa, Almaniya, Kanada, Yaponiya, Avstraliya, Çin və Səudiyyə Ərəbistanının nümayəndələri daxildir.

Aydın