Bəzi konservlər lif, prebiotiklər və bağırsaq mikrobiomu üçün vacib olan digər qidalandırıcı maddələr baxımından zəngindir. Diyetoloqların qeyd etdiyinə görə, bir çox konservləşdirilmiş məhsullar bağırsaq sağlamlığına təzə məhsullar qədər müsbət təsir göstərir.

Qaynarinfo xəbər verir ki, bunu "Eatingwell" yazıb.

Bağırsaq sağlamlığı üçün ən yaxşı konservlər:

1. Qara lobya

Bu qida həm həll olan, həm də həll olmayan liflə zəngindir. Bu lif növləri nizamlı defekasiyanı dəstəkləyir və bağırsaqdakı faydalı bakteriyaları qidalandırır.

Dietoloq Amanda Sauseda bildirib: "Konservləşdirilmiş qara lobya tələb olunan lif miqdarına çatmağa asanlıqla kömək edə bilər: yarım stəkanlıq porsiyada 8,5 qram lif var".

2. Noxud

Noxud bağırsaq üçün faydalı olan zülal və lifin birləşməsini ehtiva edir. Noxudun unikal xüsusiyyəti həll olan prebiotik lif növü sayılan qalaktooligosaxaridlərin (QOS) mövcudluğudur.

Diyetoloq Rene Korçak izah edib ki, QOS yalnız yoğun bağırsağa çatdıqda parçalanır; burada faydalı bakteriyalar bu lifi fermentləşdirərək "bifidobakteriya" və "laktobakteriya" kimi digər faydalı bakteriyaların artımını stimullaşdırır.

O, əlavə edib ki, hətta kiçik miqdarda istifadə belə faydalı ola bilər: "Gündəlik rasiona cəmi 1/4 stəkan noxud əlavə etmək bağırsaq sağlamlığına müsbət təsir göstərə bilər".

3. Konservləşdirilmiş çuğundur

Bu məhsul bağırsaq mikroflorasını dəstəkləyən lif və bioloji aktiv maddələrlə zəngindir. Bir stəkan çuğundurun tərkibində təxminən 3 qram lif var. Çuğundur həmçinin antioksidant və iltihabəleyhinə təsirə malik betalaynlar və fenol birləşmələri ilə zəngindir ki, bunlar da həzm sistemi üçün faydalı ola bilər.

Korçak deyib: "Bu bioaktiv maddələr və çoxlu lif – o cümlədən oligosaxaridlər – bağırsaq mikrobiomunun tənzimlənməsinə və probiotik bakteriyaların artımına təkan verə bilər".

4. Qarğıdalı

Bu kletçka ilə zəngin bir nişastalı tərəvəzdir. Tərkibində həm həll olan, həm də həll olmayan lif var. Həll olmayan lif nəcis kütləsini artırır, həll olan lif isə bağırsaqdakı faydalı bakteriyalar üçün qida rolunu oynayır.

5. Sardina

Sardina bağırsaq sağlamlığını omeqa-3 yağ turşuları hesabına dəstəkləyə bilər. Bu yağ turşuları bağırsağın selikli qişasının bütövlüyünü qorumağa kömək edir. 85 qram konservləşdirilmiş sardina təxminən 834 mq omeqa-3 yağ turşusu ehtiva edir ki, bu da onu əla mənbəyə çevirir.

6. Göbələk

Göbələklər bağırsaq mikroflorasını dəstəkləyən prebiotik liflərlə zəngindir. Araşdırmalar göstərir ki, göbələklərdə olan bəzi maddələr qısa zəncirli yağ turşularının istehsalını artırır; bu maddələr bağırsaq selikli qişasının və ümumilikdə həzm sisteminin sağlamlığını dəstəkləyir. Həmçinin antioksidant və iltihabəleyhinə təsirə malikdirlər və bu da bağırsaq sağlamlığı üçün faydalıdır.

Aydın