Quraqlıq səbəbindən Macarıstandakı Velençe gölünün su səviyyəsi təxminən 20 santimetrə düşüb. Avqust ayı üçün optimal göstərici isə 150 santimetrdir. Çimərliklərin bir qismi artıq bağlanıb. Budapeşt yaxınlığında turistlər arasında populyar olan Qarançi gölü isə demək olar ki, tamamilə quruyub.
Qaynarinfo xəbər verir ki, Macarıstandakı su böhranı barədə "Associated Press" (AP) məlumat yayıb.
Quraqlıq artıq kənd təsərrüfatına zərər vurub və içməli su çatışmazlığına səbəb olub. Bundan başqa, soyutma üçün böyük həcmdə su ehtiyatına ehtiyacı olan ölkənin yeganə atom elektrik stansiyasının sabit fəaliyyətini də təhlükə altına salıb.
Nəşrin məlumatına görə, su böhranının səbəbi yalnız qismən iqlim dəyişikliyi ilə bağlıdır. Macarıstanda bataqlıqların qurudulması və çay məcralarının dəyişdirilməsi istiqamətində genişmiqyaslı işlər aparılıb. Ölkənin drenaj kanalları şəbəkəsinin uzunluğu 40 min kilometrdən çoxdur. Bu, Yer kürəsinin ekvatorunun uzunluğundan belə çoxdur.
Kanallar kənd təsərrüfatı üçün əraziləri azad etmək məqsədilə tarlalardan və bataqlıqlardan suyu uzaqlaşdırır. Lakin bunun nəticəsində qrunt sularının səviyyəsi aşağı düşüb. Bu isə su hövzələrini getdikcə daha tez-tez və uzunmüddətli xarakter alan quraqlıqlara qarşı daha həssas edib.
Macarıstanın milli meteoroloji xidmətinin məlumatlarına əsasən, ölkə ərazisinin təxminən 99 faizi güclü və ya ekstremal quraqlıq şəraitindədir. Yüksək temperatur və az yağıntı səbəbindən bitki örtüyünün geri çəkilməsi ilə xarakterizə olunan səhralaşma prosesi Böyük Macarıstan düzənliyinin əhəmiyyətli hissəsini də təhdid edir.
Yağıntılar təbii şəkildə əsasən ölkə ərazisinin dörddə birinə qədərini təşkil edən düzənliklərə düşür. Tarix boyu bu ərazilər Macarıstanı şirin içməli su ilə təmin edib. Lakin 2023-cü ildə "Nature" jurnalında dərc olunan araşdırmada ölkədə bataqlıq və digər su-bataqlıq ərazilərinin tarixi itkisinin 80 faizdən çox olduğu qiymətləndirilib.
İqtisadi Əməkdaşlıq və İnkişaf Təşkilatının hesabatına görə, hazırda Macarıstan Avropada quraqlığa ən çox məruz qalan ölkələr sırasındadır və dünya üzrə 16-cı yerdədir.
Baş nazir Peter Macar hökumətin su ehtiyatlarının idarə olunması siyasətinə yenidən baxacağını bildirib. Onun sözlərinə görə, quraqlığın nəticələrini azaltmaq üçün su ehtiyatlarının qorunmasına dair kompleks proqramın həyata keçirilməsi planlaşdırılır.
Macar həmçinin bildirib ki, ölkənin köhnəlmiş su təchizatı infrastrukturu səbəbindən zədələnmiş borulardan içməli suyun 20–25 faizi sızaraq itirilir. Onun fikrincə, bu problemin də aradan qaldırılması vacibdir.
Aydın
Şərhlər