1985-ci ildə etdiyi bir çıxışda gələcəkdə insanların filosoflara sual verə biləcəyi texnologiyanın mümkün olacağından danışan Stiv Cobsun bu fikri, bu günün süni intellekt alətləri ilə heyranedici bir paralellik təşkil edir.

Qaynarinfo xəbər verir ki, "Apple"ın qurucularından biri olan və texnologiya dünyasında silinməz iz buraxmış vizyoner kimi tanınan Stiv Cobs bu gün istifadə etdiyimiz bir çox texnologiyanın təməlində duran öncül düşüncələri ilə xatırlanır. Onun gələcəklə bağlı təsəvvürləri və istifadəçi mərkəzli yanaşması, rəqəmsal dünyada inqilabi dəyişikliklərə yol açıb.

Bəs əgər Cobs bu gün həyatda olsaydı, "OpenAI" tərəfindən yaradılmış və süni intellekt sahəsində ən çox danışılan tətbiqlərdən biri olan ChatGPT barədə nə düşünərdi? Bu sual, "Apple"ın süni intellekt yarışında - xüsusilə də Siri vasitəsilə - geri qaldığı bu dövrdə daha da əhəmiyyət qazanır.

Cobs və 1985-ci ildəki çıxış: gələcəyin səsi

1985-ci ildə İsveçin Lund Universitetində etdiyi çıxışında Cobs texnologiya ilə bilik arasındakı əlaqəni dərinliklə ələ alıb. O, Makedoniyalı İskəndərin müəlliminin Aristotel olduğunu öyrəndikdə, bu münasibətə qarşı qibtə hissi keçirdiyini bildirib. Cobs deyir: "Biz kitablar vasitəsilə Aristotelin fikirlərini oxuya bilirik, amma ona sual verə bilmərik. Cavab ala bilmirik".

Bu nöqtədə Cobs bir texnoloji ümidi dilə gətirir: "Ümid edirəm ki, bir gün elə bir vasitə yaradarıq ki, bir Aristotel yaşadığı zaman onun düşüncələrini kompyuterə qeyd edə bilək. Beləliklə, gələcəkdə bir tələbə yalnız Aristotelin dediklərini oxumaqla kifayətlənməz, ona sual da verə bilər və cavab ala bilər".

Bu cümlələr, bu gün istifadə etdiyimiz ChatGPT kimi dil modellərinin təklif etdiyi təcrübə ilə təəccüblü dərəcədə üst-üstə düşür. Artıq istifadəçilər yalnız mətnləri oxumur, onlar ilə qarşılıqlı şəkildə ünsiyyət qururlar, suallar verirlər, cavablar alırlar və yeni ideyalar inkişaf etdirə bilirlər. Məlumata çıxış passiv oxuma deyil, interaktiv təcrübəyə çevrilib.

"Apple" və süni intellekt: Cobs olsaydı, nə dəyişərdi?

Bugünkü süni intellekt texnologiyaları hələ tam mükəmməl deyil. Onların necə öyrədildiyi, hansı mənbələrdən istifadə olunduğu və verdiyi cavabların nə dərəcədə dəqiq olduğu hələ də müzakirə mövzusudur. Lakin hazırkı texnoloji səviyyə, Stiv Cobsun demək olar ki, 40 il əvvəl çəkdiyi vizyona bir xeyli yaxındır.

Bütün bunlara baxmayaraq, "Apple" bu sahədə nisbətən sakit qalmaqda davam edir. Siri hələ də əsas funksiyalarda rəqiblərinin gerisində qalarkən, digər texnoloji nəhənglər ChatGPT və bənzəri generativ süni intellekt modelləri ilə yeni bir dövrə öncülük edirlər. Belə olan halda, sual yaranır: əgər Stiv Cobs bu gün həyatda olsaydı, bu texnologiyanı "Apple" ekosisteminə necə daxil edərdi?

Son düşüncələr

Bir şey şübhəsizdir: Stiv Cobsun texnologiyaya yanaşması, biliklə istifadəçi arasında daha dərin bir əlaqə qurmaq məqsədi daşıyırdı. Onun bu bağın bir gün interaktiv forma alacağını düşünməsi, süni intellektin bu gün gəldiyi nöqtəni daha mənalı və dəyərli edir.

Aydın