Uzunməsafəli uçuşlardan sonra yaranan və "jet lag" kimi tanınan bioloji ritm pozuntusu uzaq məsafələrə səyahət edən sərnişinlərin 60–70 faizində müşahidə olunur.

Qaynarinfo xəbər verir ki, "Daily Mail" nəşri ekspertlərin tövsiyələrinə əsaslanaraq bu vəziyyətin təsirlərini azaltmağa kömək edən səkkiz məsləhəti təqdim edib.

1. Gündüz yuxusunu 45 dəqiqə ilə məhdudlaşdırın

Yuxu üzrə mütəxəssis və "Bed Kingdom" şirkətinin təsisçisi Eşli Heynsvortun sözlərinə görə, təyinat məntəqəsinə çatdıqdan sonra saatlarla yatmaq məsləhət görülmür. Onun fikrincə, gündüz yuxusu 45 dəqiqədən çox olmamalıdır. Bu, yorğunluğu azaltmağa kömək etsə də, gecə yuxusunun pozulmasının qarşısını alır. Bundan əlavə, planlaşdırılan gecə yuxusuna səkkiz saat qalmış artıq yatmamaq tövsiyə edilir.

2. Rejimi səfərdən əvvəl dəyişməyə başlayın

Ekspertlər bildirirlər ki, orqanizmi yeni saat qurşağına əvvəlcədən hazırlamaq adaptasiyanı asanlaşdırır. Şərq istiqamətinə səyahət zamanı hər gün yatmaq və oyanmaq vaxtını bir qədər erkən çəkmək, qərb istiqamətinə gedərkən isə əksinə, bu vaxtları bir qədər gecikdirmək faydalıdır.

3. Təyyarədə rahat yatmağa kömək edən vasitələr götürün

Əgər uçuş zamanı təyinat ölkəsində gecə vaxtıdırsa, təyyarədə yatmağa çalışmaq tövsiyə olunur. Bunun üçün qulaq tıxacları, boyun yastığı, işığı tam bağlayan yuxu maskası, eləcə də ağ səs, təbiət səsləri və ya sakit musiqi faydalı ola bilər.

4. Uçuş boyu hərəkətsiz qalmayın

Uzun gündüz reysləri zamanı hər saatdan bir ayağa qalxıb təyyarənin salonunda qısa gəzinti etmək əzələlərin gərginliyini azaldır, qan dövranını yaxşılaşdırır və tromb yaranması riskini aşağı salır. Mütəxəssislər kompression corablardan istifadə etməyi də tövsiyə edirlər.

5. Gün işığından düzgün istifadə edin

Təbii günəş işığı bioloji saatın yenidən uyğunlaşmasına kömək edir. Gündüz saatlarında təyinat yerinə çatanlara açıq havada daha çox vaxt keçirmək, axşam isə parlaq işıq və elektron cihazların istifadəsini məhdudlaşdırmaq məsləhət görülür.

6. Alkoqol və kofeindən ehtiyatla istifadə edin

Ekspertlər bildirirlər ki, alkoqol yuxunun keyfiyyətini pisləşdirə və "jet lag" əlamətlərini gücləndirə bilər. Günün ikinci yarısında həddindən artıq kofein qəbulundan da çəkinmək tövsiyə olunur. Uçuşdan əvvəl, uçuş zamanı və sonra kifayət qədər su içmək isə susuzlaşmanın qarşısını almağa kömək edir.

7. Melatonin qəbulunu həkimlə məsləhətləşdirin

Melatonin yuxu ritmini tənzimləyən hormondur və bəzi insanlar yeni saat qurşağına uyğunlaşmaq üçün onun tərkibli preparatlardan istifadə edirlər. Lakin mütəxəssislər bu preparatları qəbul etməzdən əvvəl həkimlə məsləhətləşməyi tövsiyə edirlər.

8. İlk günü yükləməyin

Ekspertlərin fikrincə, tətilin ilk gününü intensiv ekskursiyalar və ya yorucu fəaliyyətlərlə doldurmamaq daha məqsədəuyğundur. Hovuz və ya çimərlikdə istirahət etmək, yaxud şəhərdə sakit gəzinti orqanizmin yeni saat qurşağına daha tez uyğunlaşmasına kömək edə bilər.

Samir