"Paramount" ilə "Warner Bros. Discovery" arasında nəzərdə tutulan 111 milyard dollarlıq birləşmə prosesi ABŞ-da açılmış məhkəmə iddiaları səbəbindən 2027-ci ilin iyun ayınadək dayandırılıb. Məhkəmə birləşmənin antinhisar qanunvericiliyini pozub-pozmadığını araşdıracaq.

Qaynarinfo xəbər verir ki, "The New York Times"ın məlumatına görə, tərəflər məhkəmə prosesi davam etdiyi müddətdə birləşmə ilə bağlı bütün əməliyyatları 2027-ci ilin iyun ayına qədər dayandırmaq barədə razılığa gəliblər.

Bu qərar ABŞ-ın 12 ştatının birgə qaldırdığı iddiadan sonra qəbul edilib. Daha əvvəl məhkəmənin verdiyi iki həftəlik müvəqqəti dayandırma qərarı da bu razılaşma ilə uzadılıb. Sənəd hakimin təsdiqindən sonra qüvvəyə minəcək.

Birləşmə üzrə fəaliyyət tam dayandırılır

Razılaşmaya əsasən, "Paramount" 1 iyun 2027-ci il tarixinədək və ya məhkəmə birləşmənin rəqabət qanunvericiliyini pozub-pozmadığı barədə yekun qərar verənədək "Warner Bros. Discovery" ilə əməliyyatlarını birləşdirmək istiqamətində heç bir addım atmayacaq.

Bu qərarla avqustun 3-nə planlaşdırılan məhkəmə iclası da ləğv edilib. İddia qaldıran ştatlar, eləcə də daha əvvəl ayrıca məhkəməyə müraciət etmiş Amerika Yazıçılar Gildiyası (WGA) müvəqqəti qadağa tələblərini geri götürüblər.

Tərəflərin öz iddiaları üzrə yeni məhkəmə təqvimini iyulun 31-dək məhkəməyə təqdim etmələri gözlənilir.

WGA hüquqi mübarizəni davam etdirəcək

Amerika Yazıçılar Gildiyası bildirib ki, məhkəmə yekun qərarını verənədək birləşmənin dayandırılması onların əsas məqsədi idi.

Təşkilat birləşmənin rəqabət qaydalarına zidd olduğu mövqeyini qoruduğunu və razılaşmanın qarşısını almaq üçün hüquqi mübarizəni davam etdirəcəyini açıqlayıb.

Əsas maneə məhkəmə iddialarıdır

"Paramount" fevral ayında təxminən 111 milyard dollar dəyərində qiymətləndirilən razılaşma çərçivəsində "Warner Bros. Discovery" ilə birləşməyə dair müqavilə imzalayıb.

ABŞ Ədliyyə Nazirliyi iyun ayında bu razılaşmanı təsdiqləyib. Avropa Komissiyası isə "Universal" ilə Avropadakı distribütorluq müqaviləsinin ləğvi şərti ilə sövdələşməyə razılıq verib.

Beləliklə, birləşmənin qarşısındakı əsas maneə iddia qaldıran ştatlar və Hollivudun ən böyük həmkarlar ittifaqlarından biri olan WGA olaraq qalır.

Gecikmə şirkətə milyonlarla dollara başa gələcək

Birləşmənin təxirə salınması "Paramount" üçün əlavə maliyyə yükü yaradacaq. Şirkətin məlumatına görə, hər rübdə hər səhm üzrə 0,25 dollar əlavə xərc yaranacaq ki, bu da gündəlik təxminən 7 milyon dollar əlavə xərclə nəticələnəcək.

Buna baxmayaraq, "Paramount" məhkəmə qərarının öz xeyrinə olacağına inanır. Şirkət hesab edir ki, məhkəmə prosesi birləşmənin rəqabətə, istehlakçılara və məzmun istehsalçılarına mənfi təsir göstərmədiyini sübut etməyin ən qısa yoludur.

Aydın