Bir çox avtomobil istehsalçısı sürücünün diqqətini yayındıran amilləri minimuma endirməklə və ya tam aradan qaldırmaqla idarəetməni həm daha təhlükəsiz, həm də daha zövqlü etməyə çalışdığını bildirir. “Lamborghini” isə fərqli strategiya seçib: şirkət sürücü ilə avtomobilin sanki vahid bütövə çevrilməsini istəyir. İtaliya superkar istehsalçısının yeni “Revuelto SV” üçün seçdiyi “idarəetmənin kvantı” şüarı da məhz bununla izah olunur.

“Bizim üçün ‘idarəetmənin kvantı’ avtomobilə oturduğunuz, onu sürməyə başladığınız və avtomobillə vahid bütövə çevrildiyiniz andır”, — “Lamborghini”nin V12 mühərrikli flaqman modeli “Revuelto”nun məhsul xətti direktoru Alessandro Farmeşi bildirib.

“Bundan sonra yalnız sürüş barədə düşünməyə başlayırsınız, sürətlənmənin, əyləcləmənin, G qüvvələrinin yaratdığı adrenalini hiss edirsiniz. Hər şeyi hiss edir və ətrafınızdakı hər şeyi unudursunuz, çünki bütün diqqətiniz avtomobildə olur və bu təcrübədən böyük zövq alırsınız”.

Avtomobilin özü olmaq müasir həyatın bütün diqqətyayındırıcı amillərindən uzaqlaşmağın ən yaxşı yollarından biri kimi görünür. Mən hələ “Revuelto”nu idarə etmədiyim üçün şəxsi təcrübədən danışa bilmərəm. Lakin köpəkbalığını xatırladan SV versiyasının yanında dayananda Farmeşi və onun həmkarlarının nə demək istədiyini anlamaq çətin deyil. Avtomobil olmaq? Əlbəttə, məhz bu avtomobil olmaq istərdim. Yoldakı bütün digər maşınları isə səhər yeməyində “yeyərdim”.

SV abreviaturası “Superveloce”, yəni “supersürətli” ifadəsinin qısaldılmış formasıdır və onun tarixi əfsanəvi 1971-ci il “Miura SV” modelinə gedib çıxır. “Lamborghini” bu işarədən daha əvvəl “Diablo”, “Murciélago” və “Aventador” modellərinin yüksək performanslı versiyalarında da istifadə edib. İndi isə növbə şirkətin V12 mühərrikli flaqman superkarı “Revuelto”ya çatıb.

Onsuz da olduqca sürətli və yüksək performanslı avtomobilin daha güclü versiyası ortaya çıxanda təbii sual yaranır: nə qədər güc artıq hesab oluna bilər?

“Revuelto SV”nin hibrid-elektrik güc qurğusunda yenə də 6,5 litrlik atmosfer tipli V12 mühərrik və üç elektrik mühərrikindən istifadə olunur. Sistem ümumilikdə 1 065 CV, yəni təxminən 1 050 at gücü hasil edə bilir. Bu, standart “Revuelto” ilə müqayisədə təxminən 50 at gücü çoxdur.

Əlavə performansı yenilənmiş batareya sistemi dəstəkləyir. Batareyanın əsas forması və quruluşu dəyişməsə də, onun enerji tutumu 7,3 kVt-saata çatdırılıb və daha yüksək güc verməsi təmin olunub.

Farmeşinin sözlərinə görə, batareyada edilən təkmilləşdirmələrin məqsədi sadəcə daha yüksək maksimal güc göstəricisi əldə etmək deyil. “Lamborghini” avtomobilin intensiv sürüş zamanı performansını daha sabit saxlamağa çalışıb. Şirkət SV versiyasının tras boyunca gücündə böyük dəyişikliklər olmadan daha bərabər və davamlı performans göstərməsini hədəfləyib.

Sürət qutusunda ötürmələrin dəyişmə müddəti də 30 faiz azaldılıb. Bu isə sürətlənməni daha çevik və effektiv edir.

Avtomobilin çəkisini azaltmaq üçün karbon lifindən geniş istifadə olunub. Ön bamper tamamilə yenidir. Arxa qanad, qapı panelləri və yeni yarış oturacaqları da çəkinin azaldılması və performansın artırılması məqsədilə karbon lifindən hazırlanıb.

Nəticədə “Revuelto SV”nin güc-çəki nisbəti 1,66 kq/CV təşkil edir. Standart “Revuelto”da isə bu göstərici 1,75 kq/CV-dir. Bu səviyyədə hətta hər milliqram əhəmiyyət daşıyır.

Yeni ön bamper və arxa qanad sayəsində avtomobilin yerəbasma qüvvəsi 80 faiz artırılıb. Farmeşi bildirib ki, arxa qanadda iki fərqli qanad konstruksiyası vahid sistemdə birləşdirilib.

Təkcə ön hissədə edilən dəyişikliklər standart “Revuelto” ilə müqayisədə ön oxda yerəbasma qüvvəsini 100 faiz artırır. Bu, döngəyə daxil olarkən və sükanı çevirməyə başlayarkən avtomobilin sabitliyini yüksəldərək ön hissənin sanki trasa “yapışmasına” kömək edir.

Bütün bunların nəticəsində “Revuelto SV” 0-dan 62 mil/saata, yəni təxminən 100 km/saata cəmi 2,4 saniyəyə sürətlənir. Bu göstərici “Lamborghini”nin daha əvvəl istehsal etdiyi ən sürətli modellərdən biri kimi təqdim etdiyi məhdud sayda buraxılan “Fenomeno” ilə eynidir. Görünür, “Fenomeno” artıq bu titulu bölüşməli olacaq.

Farmeşi üçün isə məsələ yalnız trasdakı rəqəmlərdən ibarət deyil. Onun fikrincə, əsas amillərdən biri emosiyadır.

“Emosiya avtomobili idarə etməkdir, bu qədər sürətli olmaqdır, avtomobildən zövq almaqdır. Hətta öz limitlərinizi aşmaqdır, çünki avtomobil özü də performansı idarə etməyə kömək edir”, — o bildirib.

Təbii ki, daha sürətli hərəkət və yüksək performans daha güclü əyləc sistemi də tələb edir. “Revuelto SV” standart modeldə istifadə olunan karbon-keramika əyləcləri əvəzinə yeni “CCM-R Plus” əyləc sistemi ilə təchiz edilib.

Əyləc diskləri həm daha qalındır, həm də daha böyük diametrə malikdir. Soyutmanı yaxşılaşdırmaq üçün disklərin radiusu boyunca radial dəliklər yerləşdirilib. Nəticədə sistem daha yüksək yüklənmələrə davam gətirə, sürücüyə daha sərt və daha gec əyləcləmək imkanı verə bilir.

“Lamborghini” həmçinin GT yarış proqramından götürülmüş yeni “Pilota” idarəetmə rejimini təqdim edir.

Sürücü sükan üzərində yerləşən dəbilqə işarəsi vasitəsilə “Pilota” rejimini aktivləşdirə və fırlanan idarəetmə elementlərindən istifadə etməklə beş səviyyədən birini seçə bilər. Bu parametrlər avtomobilin sabitlik sistemlərinin müdaxilə səviyyəsini dəyişir.

Avtomobildə ABS və sabitliyə nəzarət sistemləri ilə yanaşı, mərkəzi tuneldə yerləşdirilmiş altıölçülü sensor da mövcuddur. Bu sensor şaquli, yan və uzununa sürətlənməni, həmçinin kuzovun yana əyilməsini, irəli-geriyə meyillənməsini və digər hərəkətləri ölçür.

“Pilota” rejimi həmin məlumatlardan istifadə edərək sürücünün seçdiyi səviyyəyə uyğun şəkildə avtomobilin davranışını dəyişir.

“Müştəri bunu yarış avtomobilində olduğu kimi seçə bilər. Məsələn, avtomobilin bir qədər daha sərbəst davranmasını istəyə bilərsiniz, çünki onu fərqli idarə etmək, trasdan və döngələrdən daha yaxşı istifadə etmək istəyirsiniz. Digər halda isə daha dəqiq davranış seçilə bilər. Hər şey sürücülük üslubundan asılıdır”, — Farmeşi deyib.

Tam elektriklə işləyən idman avtomobili hazırlamaq planlarından imtina edən “Lamborghini” hibrid strategiyasına daha çox üstünlük verməyə başlayıb.

Farmeşinin sözlərinə görə, “Revuelto SV”dəki elektrik mühərrikləri fırlanma anının təkərlər arasında daha effektiv bölüşdürülməsinə və avtomobilin idarəetmə dinamikasının yaxşılaşdırılmasına imkan verir. Onun fikrincə, bu üstünlüklər 7,3 kVt-saatlıq batareyanın əlavə çəkisini əsaslandırır.

Hibrid sistemin gündəlik həyatda sosial baxımdan da faydası var. Farmeşi zarafatla qeyd edib ki, məsələn, avtomobil sahibi səhər həyətindən yalnız elektrik enerjisi ilə, səssiz şəkildə çıxaraq qonşularını narahat etməyə bilər.

Avtomobilin yalnız elektrik enerjisi ilə hərəkət məsafəsi təxminən 15 kilometrdir. Bu məsafə gündəlik işə gedib-gəlmək üçün yetərli olmasa da, daxiliyanma mühərrikli avtomobillərin hərəkətinə məhdudiyyət qoyulan ərazilərdə faydalı ola bilər.

“Lamborghini” yeni modelin qiymətini hələ açıqlamayıb. Bununla belə, standart “Revuelto”nun qiymətinin ən azı 612 min dollardan başladığını nəzərə alsaq, SV versiyasının əlavə seçimlər daxil edilmədən belə minimum 750 min dollara başa gələcəyi gözlənilir.

Yaxın gələcəkdə tam elektrikli “Lamborghini”nin bazara çıxması gözlənilməsə də, “Ferrari Luce” modelinə ictimai reaksiyalar yüksək performanslı avtomobil istehsalçılarının elektrikləşmə prosesində hansı mürəkkəb seçimlərlə üzləşəcəyini göstərir.

Hələlik isə “Lamborghini” hibrid superkarlarından mümkün qədər yüksək nəticə əldə etməyə çalışır — burada “maksimum” sözünün xüsusi vurğusu var.

Foto: Endrü C. Hokins (Andrew J. Hawkins) / “The Verge”

1 / 7