"Cloudflare" şirkətinin açıqladığı son məlumatlar rəqəmsal dünyadakı balansın ciddi şəkildə dəyişdiyini göstərib.
Qaynarinfo xəbər verir ki, məlumat mərkəzlərinin üzərinə avtonom proqramların yaratdığı yükü azaltmaq istəyən şirkətlər aparat sürətləndirilməsi və ağıllı trafik idarəetməsinə diqqət yetirirlər.
Şəbəkə infrastrukturu və kibertəhlükəsizlik sahəsində fəaliyyət göstərən "Cloudflare" şirkəti rəqəmsal dünyadakı balansın köklü şəkildə dəyişdiyini açıqlayıb. Şirkətin rəhbər şəxslərindən Tomas Seyfert internetdə insanların yaratdığı məlumat trafikinin artıq botlar və avtonom proqramlar tərəfindən geridə qoyulduğunu vurğulayıb.
Mövcud dinamika davam edərsə, qarşıdakı beşillik dövrdə maşınların yaratdığı trafik həcminin insan trafikindən 1000 dəfə çox olacağı proqnozlaşdırılır. Bu isə insanların rəqəmsal məkandakı izlərinin statistik baxımdan demək olar ki, əhəmiyyətsiz göstəriciyə çevrilə biləcəyi anlamına gəlir.
Rəqəmsal şəbəkələrin əsasən insanların ünsiyyət qurması və alış-veriş etməsi üçün mövcud olduğu düşünülsə də, vəziyyət sürətlə dəyişir. Adi botları əvəz edən süni intellekt agentləri serverlər və məlumat mərkəzləri üzərində böyük yük yaratmağa başlayıb.
"Cloudflare" nümayəndələri sistemlərin sıradan çıxmaması və internetin istifadəyə yararlı qalması üçün optimallaşdırma işlərinin zəruri olduğunu vurğulayırlar.
Rəqib şirkətlərin server və aparat resurslarından istifadəsindəki səmərəsizliyə diqqət çəkən mütəxəssislər ağıllı trafik idarəetməsi, kənar hesablama və aparat sürətləndirilməsi kimi həllərin təcili tətbiq edilməli olduğunu bildirirlər.
Aydın
Şərhlər