Oktyabr ayında Avropada “məxməri mövsüm” tədricən sona yaxınlaşsa da, bir çox turist qitədə izdiham olmadan günəş altında isinməyin mümkün olduğu məkanlar axtarır.

Qaynarinfo xəbər verir ki, “The Independent” nəşrinin jurnalistləri oktyabr ayında Avropada istirahət üçün ən yaxşı günəşli istiqamətləri açıqlayıblar.

1. Sevilya, İspaniya

Oktyabr ayında orta temperaturun +21°C olduğu və gün ərzində +27°C-yə qədər yüksəldiyi Sevilya tez-tez kontinental Avropanın ən isti şəhəri adlandırılır. Burada gündə təxminən yeddi saat günəşli hava olur. Bu, Əndəlüsün paytaxtı ilə yandırıcı yay istisi olmadan tanış olmaq üçün əlverişli vaxtdır.

Şəhərin görünüşündə mavr təsirini hiss etmək üçün ekskursiyaya Kasa-de-Pilatos sarayından başlamaq, daha sonra isə Torre-del-Oro – “Qızıl qüllə”yə getmək olar. Ardınca Real-Alkasar sarayını və bağlarını, daha sonra isə qotika üslubunun şah əsəri və dünyanın ən böyük məbədlərindən biri olan şəhər kilsəsini ziyarət etmək mümkündür.

Sadəcə sakit gəzintilərə üstünlük verənlər isə marşruta Qvadalkvivir çayının sahilindən başlayaraq Mariya-Luiza parkı və İspaniya meydanından keçə bilərlər.

2. Valetta, Malta

Oktyabr ayında orta temperaturun +24°C, günəşli saatların sayının isə yeddi olduğu Maltada bu ay “məxməri mövsüm” hesab olunur. Hava rahat istirahət etmək və günəşdən zövq almaq üçün hələ kifayət qədər əlverişlidir.

Möhtəşəm istehkamları ilə tanınan şəhər UNESCO-nun Dünya İrsi siyahısına daxil edilib. Əsas görməli yerlər arasında Müqəddəs İoann kilsəsi, Sent-Elmo qalası və Böyük magistr sarayı var.

Sahilboyu XVIII əsrə aid anbar binalarından ibarət kompleks də qorunub saxlanılıb. Bu gün həmin binalarda çoxsaylı restoran, kafe və mağazalar fəaliyyət göstərir. Yuxarı və Aşağı Barrakka bağları isə şəhərin əsas yaşıllıq əraziləridir.

3. Sardiniya, İtaliya

Oktyabr ayında orta temperaturun +18°C, günəşli saatların sayının isə altı olduğu bu Aralıq dənizi adası uzun illərdir turistlər arasında populyardır. Buraya, xüsusilə, payız günəşindən sonuncu dəfə yararlanmaq istəyən italiyalılar da gəlirlər.

Dənizin suyu hələ də isti qalır. Buna görə Kosta-Smeralda və ya Kala-Qoloritse kimi məkanlarda rahat şəkildə çimərlikdə istirahət etmək və su idmanı ilə məşğul olmaq mümkündür.

Sardiniyada İtaliyanın ən mənzərəli şəhərlərindən bəziləri yerləşir. Məsələn, Alqero, Boza, San-Teodoro və digər şəhər və qəsəbələrdə orta əsrlərə aid tikililər, qalalar və su kənarındakı rəngarəng evlər qorunub saxlanılıb.

Təbiət həvəskarları üçün adada üç milli və on regional park da var. Onların arasında Asinara və Cennardcentu da yer alır.

4. Kipr

Oktyabr ayında orta temperaturun +23°C, günəşli saatların sayının isə səkkiz olduğu Kipr Avropada bu ay ən isti məkanlardan biri hesab olunur.

Ada turistləri qədim dövrlərə gedib çıxan zəngin tarixi ilə də heyran edir. Kiprin tarixi Qədim Yunanıstan, Roma və keçmişin bir çox digər xalqları ilə sıx bağlıdır.

Adanın tarixi irsi ilə daha yaxından tanış olmaq istəyənlər “Kralların məzarları”, Kolossi qalası və qədim Kourion şəhəri kimi məşhur məkanları ziyarət edə bilərlər.

Kipr həmçinin məşhur turizm mərkəzi kimi tanınır. Burada turistləri günəşli çimərliklər, sağlam Aralıq dənizi həyat tərzi və Kiprin diqqətlə qorunub saxlanılan ənənələri, mətbəxi və mədəniyyəti ilə tanış olmağa imkan verən çoxsaylı kəndlər gözləyir. Omodos və Lefkara belə məkanlar arasındadır.

5. Alqarve, Portuqaliya

Oktyabr ayında orta temperaturun +23°C, günəşli saatların sayının isə yeddi olduğu Portuqaliyanın materik hissəsinin ən cənubunda yerləşən Alqarve Avropada “məxməri mövsüm” üçün əla seçimdir.

Bu bölgə uzun və yumşaq qumlu çimərlikləri ilə məşhurdur, lakin piyada gəzintiləri üçün də əlverişlidir. Ən məşhur marşrutlardan biri Alkutimi – İspaniya ilə şərq sərhədində yerləşən şəhəri – San-Visenti burnu ilə birləşdirən qədim zəvvar yolu Via Alqavianadır.

Piyada yürüşləri ilə maraqlanmayan turistlər isə Faro şəhərinin füsunkar qədim hissəsinə gedə bilərlər. Burada maraqlı tarixi abidələr, o cümlədən məşhur Sümüklər kapellası yerləşir.

6. Rodos, Yunanıstan

Oktyabr ayında orta temperaturun +22°C, günəşli saatların sayının isə səkkiz olduğu Rodos turistləri yalnız ideal çimərlikləri və dənizi ilə deyil, çoxsaylı tarixi məkanları ilə də sevindirir. Bir vaxtlar burada antik dünyanın yeddi möcüzəsindən biri olan Rodos Kolossu ucalırdı.

Bu gün ada UNESCO-nun Dünya İrsi siyahısına daxil edilmiş qədim şəhəri ilə məşhurdur. Burada yaxşı qorunmuş qala istehkamlarına baxmaq, əhəngdaşı ilə döşənmiş dar küçələrdə gəzmək və arxeoloji abidələri ziyarət etmək mümkündür.

Çimərlik istirahəti üçün isə Lindos və Faliraki şəhərlərinə getmək olar. Burada Egey dənizinin sularına baş vurmaq, həmçinin tavernaya getmək və ənənəvi yunan qəlyanaltıları olan mezədən dadmaq mümkündür.

Aydın