Avropanın dağ-xizək kurortları uzun illər uğurlarını yağan qarın miqdarı ilə ölçürdü. Lakin iqlim dəyişikliyi, temperaturun artması və qış mövsümünün getdikcə daha qeyri-sabit keçməsi bu məkanları yay turizminə daha çox diqqət ayırmağa sövq edir.

Qaynarinfo "Daily Mail"ə istinadən xəbər verir ki, bu gün Alp kurortları turistləri yalnız xizək idmanı ilə deyil, həm də yürüş marşrutları, dağ velosipedi, yüksək səviyyəli restoranlar və spa xidmətləri ilə cəlb edir.

Leh, Avstriya

Avstriyanın mənzərəli Leh kəndi Alplarda ən zəngin yay proqramlarından birini təqdim edir.

"Lech Card" yay kartı turistlərə dağ kanat yollarından və avtobuslardan istifadə etmək, həmçinin bələdçili ekskursiyalara, kayak, kanyoninq və oxatma kimi fəaliyyətlərə qoşulmaq imkanı yaradır.

Zaalbax-Hinterqlemm, Avstriya

Bu bölgə Avropanın kanat yolları ilə əlaqələndirilən ən geniş dağ velosipedi marşrut şəbəkələrindən birinə malikdir.

Kanat yolları velosipedlərin daşınmasına uyğunlaşdırılıb və Zaalbax, Hinterqlemm, Leoqanq və Fieberbrunn yaşayış məntəqələrini birləşdirir.

Turistlər burada meşə cığırlarından, dağ velosipedi üçün texniki eniş marşrutlarından və rahat sürüş üçün nəzərdə tutulmuş xüsusi "flow trail" traslarından istifadə edə bilərlər.

Mejev, Fransa

1920-ci illərdə "Rotşild" ailəsinin təşəbbüsü ilə Fransanın ən nüfuzlu dağ kurortlarından birinə çevrilən Mejev yay aylarında da populyarlığını qoruyur.

Kurort qonaqlarına orta əsr ab-havasını qoruyan şəhərcik, yüksək səviyyəli restoranlar və hotellər təklif edir.

Yay səhərlərində turistlər 15 kiçik ibadətgahın yanından keçən və "Mont d'Arbois" istiqamətinə uzanan "Chemin du Calvaire" ziyarət marşrutu ilə yürüş edə bilərlər.

"Les Fermes de Marie" kompleksində isə alp üslublu şalelər, restoranlar və spa mərkəzi fəaliyyət göstərir.

Alpe di Siuzi, İtaliya

Dolomit Alplarında yerləşən Avropanın ən böyük yüksək dağ yaylası sakit istirahət həvəskarları üçün ideal məkan hesab olunur.

Ərazidə avtomobil hərəkəti məhdudlaşdırıldığı üçün turistlər bölgəni əsasən piyada və ya velosipedlə kəşf edirlər.

Çiçəklərlə örtülü çəmənliklərdən keçən cığırlar, dağ daxmaları, panoramalı saunalar, açıq hovuzlar və dağ otlarından hazırlanan spa prosedurları yay mövsümünün əsas üstünlükləri sırasında göstərilir.

Engelberq, İsveçrə

İsveçrənin Engelberq kurortunda ən maraqlı marşrutlardan biri "Buurebähnli Safari" hesab olunur.

Bu marşrut turistləri ucqar alp fermalarına aparır. Səyahət zamanı qonaqlar ailə fermalarında gecələyir, yerli sakinlərlə birlikdə ənənəvi şam yeməyində iştirak edirlər.

Marşrut "Walenpfad" yüksək dağ cığırının bir hissəsindən, alp çəmənliklərindən və sıldırım qayaların ətəyindən keçir.

Aydın