ABŞ-İran qarşıdurması: Ötən gecə nə baş verdi?

Qaynarinfo xəbər verir ki, SEPAH-ın yaydığı məlumata görə, əməliyyatın ikinci mərhələsində Bəhreyndə yerləşən Cufeyr hərbi bazasında sursat anbarları, peyk rabitə mərkəzi və ABŞ qüvvələrinin istifadə etdiyi bina hədəfə alınıb. İran tərəfi həmçinin ABŞ Hərbi Dəniz Qüvvələrinin 5-ci Donanmasına aid hava nəzarət radarı, "Patriot" radar sistemi və C-RAM erkən xəbərdarlıq radarının məhv edildiyini iddia edib.

Məlumata görə, beş saatlıq müddət ərzində CENTCOM İranın kommersiya gəmiçiliyinə zərbə endirmək imkanlarını daha da azaltmaq üçün Buşehr, Çabahar, Cask, Konarak, Əbu-Musa adası və Bəndər-Abbasa zərbələr endirib. Əməliyyat zamanı CENTCOM İranın sahil müdafiə sistemlərinə, raket və pilotsuz uçuş aparatlarına və dəniz infrastrukturuna qarşı dəqiq idarə olunan sursatlardan istifadə edib. Hazırda Yaxın Şərqdə 50 mindən çox ABŞ hərbçisi yerləşdirilib. CENTCOM bildirib ki, Amerika qüvvələri yüksək döyüş hazırlığı səviyyəsini qoruyur və təyin olunmuş tapşırıqları yerinə yetirməyə hazırdır.

İran eyni zamanda Hörmüz boğazında ABŞ-ın tövsiyə etdiyi marşrutdan istifadə edən iki supertankerə zərbə endirdiyini açıqlayıb. Bildirilib ki, gəmilər naviqasiya sistemlərini söndürərək İranın dəfələrlə etdiyi xəbərdarlıqlara məhəl qoymayıblar. SEPAH tankerlərin minalanmış marşrutdan keçməyə cəhd etdikdən sonra sıradan çıxarıldığını iddia edib.

İran rəsmiləri ABŞ-la əməkdaşlığın və təhlükəli marşrutlardan istifadənin Hörmüz boğazının yenidən açılmasını gecikdirə və qlobal enerji böhranını daha da dərinləşdirə biləcəyi barədə xəbərdarlıq ediblər.

Bu arada, SEPAH İordaniyada yerləşən ABŞ hərbi bazasına da cavab zərbəsi endirdiyini açıqlayıb. Məlumata görə, bölgədəki hərbi obyektlər ballistik raketlərlə vurulub.

İordaniya rəsmiləri ölkənin hava məkanına daxil olan dörd raketin hava hücumundan müdafiə sistemləri tərəfindən zərərsizləşdirildiyini bildiriblər.

Bəhreyn Daxili İşlər Nazirliyi isə ölkədə həyəcan siqnallarının yenidən işə salındığını açıqlayıb və əhalini sakit olmağa, ən yaxın təhlükəsiz sığınacaqlara üz tutmağa çağırıb.

Digər tərəfdən, Birləşmiş Ərəb Əmirliklərinin Müdafiə Nazirliyi İrandan atıldığı bildirilən iki raketin yanacaq tankerinə düşməsi nəticəsində 1 nəfərin öldüyünü, 8 nəfərin yaralandığını açıqlayıb.

ABŞ Prezidenti Donald Tramp isə İrana qarşı hərbi əməliyyatların davam etdiriləcəyini bildirib. O, Vaşinqtonun İranın hərbi imkanlarına ciddi zərbə vurduğunu iddia etsə də, Tehranla razılaşmanın hələ də mümkün olduğunu söyləyib.

Bu arada, Yəmənin üsyançı "Ənsar Allah" (husilər) hərəkatının nümayəndələri daha bir - Bab əl-Məndəb boğazını bağlamaqla və neftin qiymətlərinin bir barelinin 200 dollara çatdırmaqla hədələyiblər. Bu barədə İranın "Fars" agentliyi məlumat yayıb.

Hərəkatın Siyasi Bürosunun üzvü Məhəmməd əl-Fərx ölkənin boğazı bağlamaq niyyətində olduğunu açıq şəkildə bildirib. O qeyd edib ki, Bab əl-Məndəb Hörmüz boğazı ilə bir olacaq və neftin qiyməti 200 dollara çatacaq.

CNN-nin məlumatına görə, Ağ Evin Prezident Donald Tramp tərəfindən daha əvvəl elan olunmuş ABŞ Hərbi Dəniz Qüvvələri tərəfindən İran limanlarının dəniz blokadasının bərpası, geniş dəniz ərazilərinə nəzarət etmək zərurəti də daxil olmaqla, çoxsaylı çətinliklər yaradacaq.

Blokadanın yenidən tətbiqi, dənizdə 20 min hərbçinin təhlükəsizliyini təmin edərkən düşmən gəmiləri müəyyənləşdirməli və onlara qarşı çıxmalı olan onsuz da intensiv istifadə olunan ABŞ Hərbi Dəniz Qüvvələrinin esminesçilərinə əlavə yük olacaq. Rəsmilər vurğulayır ki, Ərəbistan dənizi geniş su ərazisidir və tankerlər üçün tam keçilməzliyi təmin etmək olduqca çətindir.

ABŞ Silahlı Qüvvələrinin bu miqyaslı blokadaya dair rəsmi təlimat kitabçası yoxdur, çünki sonuncu dəfə belə əməliyyat 1962-ci ildə Karib böhranı zamanı həyata keçirilib.

Telekanalın mənbələri ABŞ hərbçilərinin İran limanlarının əvvəlki blokadası zamanı oxşar problemlərlə qarşılaşdığını bildirib. ABŞ Silahlı Qüvvələrinin rəsmi nümayəndəsi kapitan Timoti Houkins CNN-ə bildirib ki, ordu artıq İran limanlarına gedən gəmiləri tutmağa hazırlaşır.