Dünya 15:28 18.10.2023

"Aİ Ukraynaya kömək etməkdən yayınmayacaq" - AK rəhbəri

Avropa Komissiyasının sədri Ursula fon der Lyayen əmin edib ki, Yaxın Şərqdəki münaqişə Rusiyanın ona qarşı təcavüzkar müharibəsi zamanı Aİ-nin Ukraynaya kömək etməyə hazırlığına təsir göstərməyəcək.

Qaynarinfo xəbər verir ki, bu barədə "Yevropeyska pravda” yazır.

Yaxın Şərqdəki vəziyyətə həsr olunmuş virtual Aİ sammitindən sonra Ursula fon der Lyayen bildirib ki, Kiyevə böyük həcmdə yardım hazırda hazırlıq mərhələsindədir.

O qeyd edib ki, Ukrayna Avropa dəyərləri uğrunda mübarizə aparır, ona görə də Aİ lazım olduğu qədər onun yanında olacaq.

"Bəziləri əmindirlər ki, bizi Ukraynanı dəstəkləməkdən yayındıracaqlar və kimə kömək edəcəyimizi seçməyə məcbur edəcəklər. Amma biz onların yanıldığını sübut edəcəyik. Nə qədər lazımdırsa, dostlarımızın yanında olacağıq", - Avropa Komissiyasının sədri bildirib.

Nizami Bağırov