Yarpaqlı yaşıl tərəvəzlər vitaminlər, minerallar və qida lifi ilə zəngin olduqları üçün bağırsaqların normal fəaliyyətini dəstəkləyir və faydalı bağırsaq bakteriyalarını qidalandırır.

Qaynarinfo xəbər verir ki, "Verywell Health” nəşri həzmi yaxşılaşdırmağa kömək edən ən faydalı yarpaqlı tərəvəzləri təqdim edib.

İspanaq

İspanaq vitaminlər, minerallar və antioksidantlarla zəngindir. Bu maddələr orqanizmdə iltihabi proseslərin azalmasına kömək edir ki, bu da həzm sisteminin sağlamlığı üçün mühüm əhəmiyyət daşıyır.

Məqalədə qeyd olunur ki, yarım stəkan bişmiş cavan ispanağın tərkibində 1,6 qram qida lifi var. Onun böyük hissəsini həll olunmayan lif təşkil edir. Bu növ lif qidanın həzm sistemi boyunca hərəkətini sürətləndirir, nəcis kütləsinin həcmini artırır və qəbizliyin qarşısını almağa kömək edir.

Kale kələmi

Kale həzm sistemi üçün ən faydalı yarpaqlı tərəvəzlərdən biri hesab olunur. Bir stəkan bişmiş kale təxminən 5 qram qida lifi ehtiva edir ki, bu da gündəlik normanın təxminən 18 faizini təşkil edir.

A, K və C vitaminləri, eləcə də antioksidantlarla yanaşı, kale bağırsaqdakı faydalı bakteriyaların balansını dəstəkləyə bilən fitokimyəvi maddələr də ehtiva edir.

Heyvanlar üzərində aparılan araşdırmalarda kalenin sağlam bağırsaq mikrobiomunun qorunmasına kömək etdiyi müəyyən edilib. Lakin bu nəticələrin insanlar üzərində təsdiqlənməsi üçün əlavə tədqiqatlara ehtiyac var.

Manqold

Manqold liflə zəngin yarpaqlı tərəvəzlərdən biridir. Bir stəkan bişmiş manqold təxminən 4 qram qida lifi ehtiva edir. Bundan başqa, onun tərkibində az karbohidrat və çoxlu antioksidant var.

Mütəxəssislərin sözlərinə görə, manqold qıcıqlanmış bağırsaq sindromundan əziyyət çəkən insanlar üçün yaxşı seçim ola bilər. Çünki onun tərkibində FODMAP qrupuna aid karbohidratların miqdarı aşağıdır.

Xardal yarpaqları

Xardal yarpaqları kəskin, istiotabənzər dada malikdir və bir stəkanında təxminən 1,8 qram qida lifi var. Onlar aşağı kalorili olmaqla yanaşı, A və C vitaminləri ilə də zəngindir.

Bəzi araşdırmalar göstərir ki, xardal yarpaqlarında olan bitki mənşəli birləşmələr öd turşularının bağlanmasına kömək edə bilər. Bu isə ishal və həzm sistemi ilə bağlı digər narahatlıqların azalmasına müsbət təsir göstərə bilər.

Rukkola

Rukkola C, K və A vitaminləri, həmçinin antioksidantlarla zəngindir. İki stəkan çiy rukkolada təxminən 1 qram qida lifi var. Bununla yanaşı, o, aşağı kalorili və az karbohidratlı məhsuldur.

Məqalədə qeyd olunur ki, rukkoladan Qədim Misir və Roma dövründə həm qida, həm də həzm pozğunluqlarının aradan qaldırılması məqsədilə istifadə olunurdu.

Çuğundur yarpaqları

Çuğundur yarpaqları aşağı kalorili olsa da, yüksək su və C vitamini tərkibi ilə seçilir. Bir stəkanında təxminən 1,4 qram qida lifi var.

Araşdırmalara görə, qurudulmuş çuğundur yarpaqlarından hazırlanan tozun 100 qramında 30 qrama qədər zülal ola bilər. Bu göstərici ispanaq tozu da daxil olmaqla bir sıra digər yarpaqlı tərəvəzlərdən daha yüksəkdir.

Aydın