14 il əvvəl törədilən və dörd nəfərin həyatını itirdiyi Şevalin qətliamında gözlənilməz inkişaf baş verib. Göldə üzən turistlərin təsadüfən tapdığı paslı silah Avropanın ən müəmmalı cinayətini aça bilərmi?

Qaynarinfo xəbər verir ki, Fransada 2012-ci ildə törədilən və Avropa tarixinin ən müəmmalı açılmamış cinayətləri sırasında yer alan Şevalin qətliamında illər sonra istintaqın gedişini dəyişə biləcək inkişaf baş verib. Ansi gölündə üzən britaniyalı turistlərin təsadüfən tapdığı korroziyaya uğramış tapança fransız müstəntiqləri hərəkətə keçirib. İlkin araşdırma zamanı silahın 14 ildir axtarılan qətl silahı ilə eyni model - İsveçrə istehsalı "Luger P06" olduğu müəyyənləşdirilib.

Bəs Avropanın ən ciddi mühafizə olunan bölgələrindən birində törədilən bu vəhşi qətllər silsiləsi necə başlamış və istintaq prosesi günümüzə qədər necə gəlib çatmışdı?

Meşədə güllə yağışı

5 sentyabr 2012-ci ildə Fransa Alplarının məşhur istirahət məkanlarından olan Şevalin kəndi yaxınlığındakı kimsəsiz meşəlik ərazidə dəhşətli qətliam baş verib. İngiltərədən istirahət üçün bölgəyə gələn 50 yaşlı iraq əsilli mühəndis Səd əl-Hilli, 47 yaşlı həyat yoldaşı İqbal və 74 yaşlı qayınanası Süheyla əl-Əllaf hərəkətdə olan avtomobillərinin içində güllə yağışına tutulub.

Həmin vaxt təsadüfən ərazidən keçən 45 yaşlı fransız velosipedçi Silven Molyenin də qatilin hədəflərindən biri olduğu müəyyənləşib. O, hadisə yerində həyatını itirib.

İstintaq dərinləşdikcə dəhşətin miqyası üzə çıxıb. Hücum edən şəxs son dərəcə soyuqqanlı şəkildə 21 dəfə atəş açıb. Qatil əl-Hilli cütlüyünün həmin vaxt 7 yaşında olan böyük qızı Zeynəbi döyərək ölümcül xəsarətlər yetirib, hətta silahın qundağını uşağın başında sındırıb.

Zeynəb ağır yaralı vəziyyətdə sağ qalıb. 4 yaşlı kiçik bacısı Zina isə qətliam zamanı öldürülən anasının ətəyinin altında gizlənərək möcüzəvi şəkildə xəsarət almadan xilas olub.

800 şahid, minlərlə saatlıq görüntü, amma sıfır iz

Hadisə yerində aşkarlanan parçalanmış silah qundağı və gilizlər qatilin 7,65 millimetrlik güllələrdən istifadə edən İsveçrə polisinin köhnə model "Luger P06" tapançasından yararlandığını göstərir. Lakin bütün səylərə baxmayaraq, qətldə istifadə olunan silahı tapmaq mümkün olmamışdı. Fransa və Böyük Britaniya polislərinin birgə apardığı genişmiqyaslı istintaq çərçivəsində 800-dən çox şahid dindirilib, bölgədəki təhlükəsizlik kameralarına aid minlərlə saatlıq görüntü araşdırılıb.

İstintaq Böyük Britaniya, Fransa və İraq üçbucağında dərinləşdirilsə də, cinayətin dəqiq motivi müəyyən edilməyib. Səd əl-Hillinin İraqdakı keçmiş mühəndislik fəaliyyəti, ailədaxili miras mübahisələri və casusluq iddiaları ətrafında çoxsaylı sui-qəsd nəzəriyyələri ortaya çıxıb.

Qatil xüsusi təyinatlıların keçmiş üzvü ola bilərdi

Silahın köhnə və tez-tez ilişmə ehtimalı olan model olması ilk mərhələdə peşəkar muzdlu qatil versiyasını zəiflətsə də, fransız hərbi ekspertlər başqa bir ehtimala diqqət çəkiblər.

Atəşlərin yaxın məsafədən son dərəcə soyuqqanlı və dəqiq açılması qatilin “yoldan çıxmış” keçmiş xüsusi təyinatlı hərbçi və ya İsveçrə polisinin xüsusi müdaxilə bölməsinin üzvü ola biləcəyi nəzəriyyəsini gündəmə gətirib.

Gölün iki metr dərinliyindəki sirr

İllər davam edən sükut cinayət yerindən təxminən 8 kilometr şimalda yerləşən Ansi gölündə pozulub. Göldə üzən bir qrup britaniyalı turist suyun təxminən iki metr dərinliyində paslanmış və əhənglə örtülmüş tapança aşkar edib. Yaşına və vəziyyətinə görə ilk baxışdan silahı su tapançası hesab edən turistlər sahilə çıxdıqdan sonra onu daha yaxından araşdırıb və polisə məlumat veriblər.

Məhkəmə biologiyası və ballistik ekspertiza başladı

Nanterrdəki açılmamış cinayətlər bölməsi göldən çıxarılan silahla qətllərdə istifadə olunan güllələrin uyğunluğunu müəyyənləşdirmək üçün araşdırmaya başlayıb.

İstintaqa nəzarət edən prokuror müavini Mari-Selin Lavriş bildirib ki, silah uzun müddət suda qaldığı üçün ciddi şəkildə korroziyaya uğrayıb. Buna baxmayaraq, ballistik ekspertiza prioritet istiqamət kimi davam etdirilir.

Üç ayrı istintaq hakiminin nəzarət etdiyi proses çərçivəsində mütəxəssislər uzun müddət suda qalmış tapançanın üzərindəki korroziyanı təmizləyərək ballistik uyğunluq və seriya nömrəsinə dair izlər axtarmağa başlayıblar.

İllərdir qaranlıqda qalan Şevalin qətliamının sirrinin açılıb-açılmayacağı laboratoriyadan gələcək texniki hesabatdan sonra məlum olacaq.

Aydın