Dünya 13:30 17.10.2023

Almaniya Polşa, Çexiya və İsveçrə ilə sərhədlərində müvəqqəti nəzarət tətbiq edir

Almaniya Polşa, Çexiya və İsveçrə ilə quru sərhədlərində müvəqqəti sərhəd nəzarəti tətbiq edir və qeyri-qanuni miqrasiyanın qarşısını almaq üçün Avstriya ilə nəzarəti davam etdirir.

Qaynarinfo xəbər verir ki, bu barədə Almaniya Daxili İşlər Nazirliyi məlumat yayıb.
 
Almaniyanın daxili işlər naziri Nensi Feser miqrant qaçaqmalçılığı ilə mübarizə aparmaq və qeyri-qanuni miqrasiyanı məhdudlaşdırmaq məqsədilə aparılan belə tədbirlər barədə Avropa Komissiyasını məlumatlandırıb.

Polşa, Çexiya və İsveçrə ilə quru sərhədlərində daxili sərhəd nəzarəti oktyabrın 16-dan başlayaraq on gün davam edəcək və iki aya qədər uzadıla bilər.
Bu o deməkdir ki, Federal Polis Polşa, Çexiya və İsveçrə ilə sərhədlərdə artıq bir müddətdir Avstriya ilə sərhəddə istifadə etdikləri eyni vasitələrdən istifadə edə bilər.

Belə ki, son həftələrdə artıq koordinasiya mərkəzləri tərəfindən çevik nəzarət tətbiq edilib, bundan əlavə, bütün sərhəd zonasında patrul xidməti əhəmiyyətli dərəcədə gücləndirilib, Polşa və Çexiyanın sərhəd polisi ilə onların milli ərazisində birgə patrul xidməti tətbiq edilib. Artıq İsveçrə ilə ümumi fəaliyyət planı var.
"Qaçaqmalçıların biznesi getdikcə daha qəddar və vicdansız hala gəlir. Cümə günü axşam Almaniya-Avstriya sərhədindən qeyri-qanuni yolla keçirilən yeddi nəfərin dəhşətli ölümü bizi şoka saldı. İnsan həyatı ilə nəticələnən bu qəddar biznesin dayandırılması üçün indi hər cür addım atılmalıdır. Eyni zamanda, Bələdiyyələrimizin üzərinə düşən yükü azaltmaq üçün qeyri-qanuni miqrasiyanın qarşısını effektiv şəkildə məhdudlaşdırmalıyıq”, - deyə daxili işlər naziri bildirib.

Federal Polis indi mövcud vəziyyətdən asılı olaraq bütün stasionar və mobil sərhəd polisi tədbirlərini çevik şəkildə tətbiq edə bilər.

Nəzarətlərin sərnişinlərin gündəlik həyatına, ticarətinə və səyahətinə mümkün qədər az təsir göstərməsi vacibdir.

Almaniyanın Polşa, Çexiya, Avstriya və İsveçrə ilə sərhədlərində insan qaçaqmalçılığı ilə bağlı cinayətlə bağlı vəziyyət pisləşməkdə davam edir.

2023-cü ilin oktyabr ayının əvvəlinə qədər Federal Polis Almaniyaya 98 min icazəsiz giriş qeydə alıb, halbukı 2022-ci ildə bu rəqəm 92 minə bərabər idi. Güman etmək olar ki, Almaniyaya icazəsiz daxil olan üçüncü ölkə vətəndaşlarının təxminən dörddə biri qeyri-qanuni miqrantlardır.

Nizami Bağırov