Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Tikilməkdə Olan Obyektlərin Birləşmiş Müdirliyi Hacıqabul rayonunda fərdi yaşayış evlərinin bərpası ilə bağlı satınalmaya yekun vurub.
Qaynarinfo xəbər verir ki, tenderin qalibi “Safari” MMC seçilib. Hacıqabul rayonunun Nəvahi kəndində 12, Meyniman kəndində 3, Pirsaat kəndində isə 1 fərdi yaşayış evinin bərpası üçün şirkətə 428 min 0,15 manat ödəniləcək.
İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Safari” MMC 2004-cü ildə qeydiyyata alınıb. Şirkətin nizamnamə kapitalı 10 manatdır. Hüquqi ünvanı Bakı şəhəri, Yasamal rayonu, Əsəd Əhmədov küçəsi, ev 9, 5-ci döngə, mənzil 170, giriş 3-dür. Şirkətin qanuni təmsilçisi İsazadə İqbal Mirbaba oğludur.
Açıq mənbələrdə şirkətin fəaliyyəti və hazırkı qanuni təmsilçisi barədə ətraflı məlumatlara rast gəlinmir.
“Safari” MMC-nin dövlət satınalmalarında iştirakı da diqqət çəkir. Müxtəlif dövlət qurumlarının abadlıq, təmir və digər işlərlə bağlı keçirdiyi satınalmalarda şirkətin qalib seçilməsi onun dövlət sifarişləri bazarında fəallığını göstərir.
Məsələn, daha əvvəl Lənkəran Şəhər İcra Hakimiyyətinin abadlıq işləri və yaşayış binalarının təmiri ilə bağlı 2 milyon manatdan artıq dəyəri olan satınalmasının da qalibi “Safari” MMC olub.
Araşdırmalara əsasən, “Safari” MMC-nin İqbal İsazadədən əvvəlki qanuni təmsilçisi Verdixanov Mübariz Eygün oğlu olub.
Mübariz Verdixanov bəzi media orqanlarında “tender kralı” kimi təqdim edilir. O, “Safari Bak Upak” MMC-nin və “Pioneer” MMC-nin də qanuni təmsilçisi kimi göstərilib.
Bu məqam “Safari” MMC-nin əvvəlki və hazırkı idarəçiliyi, eləcə də şirkətin faktiki sahibliyi ilə bağlı suallar yaradır. Bununla belə, Mübariz Verdixanovun şirkətin faktiki sahibi olması barədə açıq rəsmi məlumat yoxdur. Buna görə də şirkətin ona məxsus olduğunu təsdiqlənmiş fakt kimi təqdim etmək mümkün deyil.
Hacıqabul rayonunda 16 fərdi yaşayış evinin bərpası üçün ayrılan 428 min manatlıq vəsait fonunda satınalmanın rəqabət şəraiti, müqavilənin icrası və görüləcək işlərin keyfiyyəti də ictimai maraq doğuran məsələlərdəndir.
Seyid
