Bəzi çörək növləri qanda şəkərin səviyyəsinin kəskin yüksəlməsinin qarşısını almağa kömək edə bilər. Dietoloqların fikrincə, tam taxıllı və mayalı çörəklərin hər birinin öz üstünlükləri var. Hər iki xüsusiyyəti birləşdirən tam taxıllı mayalı çörək isə daha yaxşı seçim ola bilər.
Qaynarinfo xəbər verir ki, bu barədə “Verywell Health” nəşrində dərc olunan məqalədə məlumat verilib.
Dietoloq Meqan Ormsbinin sözlərinə görə, tam taxıllı və mayalı çörək anlayışları bir-birindən fərqlənir. Tam taxıllı ifadəsi çörəyin hazırlandığı taxılın və ya unun növünü, mayalı çörək isə xəmirin fermentasiya prosesini xarakterizə edir. Buna görə də bu iki xüsusiyyət bir-birini istisna etmir.
Ekspert bildirib ki, tam taxıllı çörək daha çox lif və taxılın tərkibində olan faydalı qida maddələrini ehtiva edir. Lif həzmi və qlükozanın sorulmasını ləngidə bildiyindən, onunla zəngin çörək qanda şəkərin səviyyəsinə nəzarət baxımından faydalı seçim ola bilər.
Mayalı çörəyin üstünlüyü isə fermentasiya prosesi ilə əlaqələndirilir. Ormsbinin izahına görə, bu proses zamanı yaranan üzvi turşular nişastanın həzmini ləngidə və qanda qlükozanın səviyyəsinin daha tədricən yüksəlməsinə kömək edə bilər.
Qan şəkərinə başqa hansı amillər təsir edir?
Dietoloqun sözlərinə görə, taxılın emal dərəcəsi də qanda şəkərin səviyyəsinə təsir göstərir. Tam taxıllardan və ya iri üyüdülmüş undan hazırlanan çörək çox incə üyüdülmüş undan hazırlanan çörəklə müqayisədə qlükozanın səviyyəsinə fərqli təsir edə bilər.
Porsiyanın ölçüsü də mühüm əhəmiyyət daşıyır. Ormsbi qeyd edib ki, qəbul edilən karbohidratların ümumi miqdarı yeməkdən sonra qanda şəkərin necə dəyişəcəyini müəyyən edən əsas amillərdəndir. Çörəyin növündən asılı olmayaraq, iki dilim çörək bir dilimlə müqayisədə daha çox karbohidrat ehtiva edir.
Ən yaxşı seçim tam taxıllı mayalı çörəkdir
Dietoloq Culiya Zumpanonun fikrincə, tam taxıllı mayalı çörək hər iki növün üstünlüklərini birləşdirir: liflə zəngin olur və fermentasiya prosesindən keçir.
Bununla belə, mütəxəssislər qanda şəkərin səviyyəsinə nəzarət etmək istəyənlər üçün yalnız çörəyin növünə deyil, onun hansı qidalarla birlikdə yeyilməsinə də diqqət yetirməyi tövsiyə edirlər.
Ormsbinin sözlərinə görə, çörəyi zülal və ya yağ tərkibli qidalarla birlikdə qəbul etmək həzmi və qida maddələrinin sorulmasını ləngidərək qanda qlükozanın səviyyəsinin dəyişməsinə təsir göstərə bilər. Məsələn, çörəyi yumurta və ya fıstıq yağı ilə yemək, zülalla zəngin ərzaqlardan sendviç hazırlamaq, yaxud onu əsas yeməklə birlikdə qəbul etmək olar.
Ekspert vurğulayıb ki, qan şəkərinə nəzarət üçün hamıya uyğun vahid çörək növü yoxdur. Seçim zamanı məhsulun tərkibi, porsiyanın ölçüsü və ümumi qidalanma rejimi nəzərə alınmalıdır.
Məqalədə, həmçinin çörək alarkən yalnız onun rənginə əsaslanmamaq tövsiyə olunur. Tünd rəngli çörək hər zaman çovdar unundan hazırlanmır. Buna görə də məhsulun həqiqi tərkibini müəyyənləşdirmək üçün etiketdə göstərilən inqrediyentlərə diqqət yetirmək vacibdir.
Günay
